Bonalu 2026: తెలంగాణ ప్రజలు ఎంతో పవిత్రంగా, వైభవంగా జరుపుకునే ఆషాఢ బోనాల ఉత్సవాలు నేటి నుంచి (జూలై 16, 2026) ఘనంగా ప్రారంభమవుతున్నాయి. ప్రతి ఏటా ఆషాఢ మాసంలో జరిగే ఈ వేడుకలు.. గోల్కొండ కోటపై ఉన్న శ్రీ జగదాంబిక మహంకాళి అమ్మవారికి మొదటి బోనం సమర్పించడంతో మొదలవుతాయి. ఈ రోజు నుంచి నెల రోజుల పాటు హైదరాబాద్తో పాటు రాష్ట్రవ్యాప్తంగా బోనాల పండుగ వాతావరణం కనిపించనుంది.
బోనాల ప్రారంభం సందర్భంగా లంగర్ హౌస్ నుండి గోల్కొండ కోట వరకు పెద్ద శోభాయాత్ర (ఊరేగింపు) జరగనుంది. డప్పు చప్పుళ్లు, పోతురాజుల నృత్యాలు, జానపద కళారూపాలతో ఈ యాత్ర సాగుతుంది.
కుమ్మరుల సంఘం భక్తులు అమ్మవారికి మొదటి బోనం సమర్పిస్తారు. ప్రభుత్వం తరపున అసెంబ్లీ స్పీకర్ గడ్డం ప్రసాద్, మంత్రులు కొండా సురేఖ, పొన్నం ప్రభాకర్ లు లంగర్ హౌస్లో అమ్మవారి పట్టు వస్త్రాలకు పూజలు చేసి, అనంతరం ఆలయంలో సమర్పిస్తారు.
నెల రోజుల బోనాల షెడ్యూల్..
గోల్కొండ బోనాలతో ప్రారంభమయ్యే ఈ ఉత్సవాలు వారం వారం నగరంలోని ప్రముఖ ఆలయాల్లో కింది విధంగా జరుగుతాయి:
- రెండో ఆదివారం: బల్కంపేట ఎల్లమ్మ అమ్మవారి బోనాల ఉత్సవం జరుగుతుంది. ఆ తర్వాతి మంగళవారం అమ్మవారికి ఘనంగా కళ్యాణోత్సవం నిర్వహిస్తారు.
- మూడో ఆదివారం: సికింద్రాబాద్లోని ప్రసిద్ధ ఉజ్జయిని మహంకాళి అమ్మవారి బోనాలు అత్యంత వైభవంగా జరుగుతాయి.
- నాలుగో ఆదివారం: హైదరాబాద్ పాతబస్తీలోని లాల్ దర్వాజా సింహవాహిని మహంకాళి అమ్మవారి బోనాలతో ఈ ఆషాఢ వేడుకలు ముగుస్తాయి.
భక్తుల కోసం ప్రత్యేక ఏర్పాట్లు
బోనాల పండుగ కోసం హైదరాబాద్లోని ప్రధాన అమ్మవారి ఆలయాలన్నింటినీ రంగురంగుల విద్యుత్ దీపాలతో అందంగా అలంకరించారు. ఎండలు, రద్దీని దృష్టిలో ఉంచుకుని భక్తులకు ఇబ్బంది లేకుండా తాగునీరు, ప్రత్యేక వైద్య శిబిరాలు ఏర్పాటు చేశారు. ట్రాఫిక్ సమస్యలు రాకుండా, ఎలాంటి అవాంఛనీయ సంఘటనలు జరగకుండా పోలీసులు భారీ బందోబస్తుతో పటిష్టమైన భద్రతను ఏర్పాటు చేశారు.