Johny Master: తెలుగు సినీ పరిశ్రమలో డ్యాన్స్ మాస్టర్స్ శేఖర్ మాస్టర్, జానీ మాస్టర్ మధ్య పెద్ద గొడవ జరిగిందంటూ సోషల్ మీడియాలో వస్తున్న వార్తలపై జానీ మాస్టర్ క్లారిటీ ఇచ్చారు. డ్యాన్సర్స్ అసోసియేషన్ (TFTDDA) ఎన్నికలు, కొత్త సభ్యత్వాల విషయంలో ఇరు వర్గాల మధ్య ఆదివారం పెద్ద వాగ్వాదం జరిగిందని, ఇద్దరూ కొట్టుకున్నారంటూ కొన్ని వీడియోలు యూట్యూబ్లో వైరల్ అయ్యాయి. ఈ వివాదంపై జానీ మాస్టర్, ఆయన భార్య సుమలత సోమవారం ఒక ప్రెస్ మీట్ పెట్టి అసలు నిజాలను బయటపెట్టారు.
మా మధ్య ఎలాంటి యుద్ధాలు లేవు: జానీ మాస్టర్
శేఖర్ మాస్టర్తో తనకు ఎలాంటి గొడవలు లేవని, తమ మధ్య యుద్ధం జరుగుతోందంటూ వస్తున్న వార్తలన్నీ అబద్ధాలని జానీ మాస్టర్ స్పష్టం చేశారు.
-
వైరల్ వీడియోల వెనుక నిజం: యూనియన్లో సీక్రెట్ బ్యాలెట్ పద్ధతిలో ఎన్నికలు జరపడంపై చర్చించడానికి తామంతా ఒకచోట చేరామని జానీ చెప్పారు. ఆ సమయంలో యూనియన్ సమస్యలపై ఇరు వర్గాల మధ్య గట్టిగా చర్చ జరిగిందని, ఆ వీడియోలను పట్టుకుని ఇద్దరూ తిట్టుకున్నారు, కొట్టుకున్నారంటూ ఫేక్ వార్తలు రాశారని మండిపడ్డారు.
-
శేఖర్ మాస్టర్తో బంధం: “శేఖర్ అన్న చాలా మంచి వ్యక్తి. ఆయన ఎప్పటికీ నాకు అన్నలాంటి వాడే. మాకు ఏ కష్టం వచ్చినా ఒకరికోసం ఒకరం పరుగెత్తుకుంటూ వెళ్తాం. ఇక్కడ ఎవరూ శత్రువులు కాదు. ఒకే ఇంట్లో ఉండే చిన్న చిన్న అభిప్రాయభేదాలు మాత్రమే మా మధ్య ఉన్నాయి” అని జానీ క్లారిటీ ఇచ్చారు.
రంగంలోకి దిగిన మెగాస్టార్ చిరంజీవి
ఈ గొడవ వీడియోలు చూసి మెగాస్టార్ చిరంజీవి కూడా కాస్త అప్సెట్ అయ్యారని జానీ మాస్టర్ వెల్లడించారు. సోమవారం మధ్యాహ్నం చిరంజీవి గారు స్వయంగా తన షూటింగ్ స్పాట్కు జానీ మాస్టర్, శేఖర్ మాస్టర్ ఇద్దరినీ పిలిపించుకున్నారు. ముగ్గురూ కలిసి కూర్చుని హ్యాపీగా లంచ్ (భోజనం) చేశారని, చిరంజీవితో కలిసి తామిద్దరం భోజనం చేస్తున్న ఫోటో, వీడియోలను జానీ మీడియాకు చూపించారు. సినిమాల గురించి, డ్యాన్స్ స్టెప్పుల గురించి ఎన్నో విషయాలు మాట్లాడుకున్నామని చెబుతూ.. తమకు ఎప్పుడూ మద్దతుగా నిలిచే చిరంజీవి గారికి జానీ ప్రత్యేక ధన్యవాదాలు తెలిపారు.
తప్పులను ప్రశ్నిస్తే దుష్ప్రచారం చేస్తున్నారు: సుమలత
డ్యాన్సర్స్ అసోసియేషన్ అధ్యక్షురాలు, జానీ మాస్టర్ భార్య సుమలత ఈ గొడవలపై మరో కోణాన్ని బయటపెట్టారు.
అసోసియేషన్లో గత కొన్నేళ్లుగా కొన్ని తప్పులు జరుగుతున్నాయని, కొందరు వ్యక్తులు డ్యాన్సర్ల దగ్గర డబ్బులు దోచుకుంటున్నారని ఆమె ఆరోపించారు. నిర్మాతల దగ్గర ఎక్కువ మొత్తం డబ్బులు తీసుకుని, అసోసియేషన్ రికార్డులలో తక్కువ చూపిస్తున్నారని.. ఒక ప్రెసిడెంట్గా ఈ అన్యాయాన్ని తాను ప్రశ్నించినందుకే తనపై కొందరు దుష్ప్రచారం చేస్తున్నారని ఆవేదన వ్యక్తం చేశారు. అలాంటి తప్పులు చేసిన కొందరిని అసోసియేషన్ నుంచి సస్పెండ్ చేశామని, ఆ తర్వాత వాళ్లే రాజీనామా చేశారని తెలిపారు. తాము గెలిచినప్పటి నుంచి అసోసియేషన్లో ఎన్ని మంచి పనులు చేసినా కావాలనే కొందరు వేలెత్తి చూపుతున్నారని ఆమె స్పష్టం చేశారు.