Film News: తెలుగు సినీ పరిశ్రమలో మరో షాకింగ్ విషయం వెలుగులోకి వచ్చింది. ఒక యువకుడిని హీరోగా పరిచయం చేస్తానని నమ్మించి, కోట్ల రూపాయలు వసూలు చేసి మోసం చేశారనే ఆరోపణలతో టాలీవుడ్ ప్రముఖ దర్శకుడు గుడ్లూరి అశోక్ బాబుపై సైబరాబాద్ పోలీసుల ఎకనామిక్ అఫెన్సెస్ వింగ్ (EOW) కేసు నమోదు చేసింది. ఈ భారీ మోసం వ్యవహారంలో నిర్మాత విజయలక్ష్మి పేరు కూడా బయటకు రావడంతో పోలీసులు ఆమెను కూడా విచారిస్తున్నారు. బాధిత యువకుడి తండ్రి హనుమంతరావు పోలీసులకు ఇచ్చిన ఫిర్యాదుతో ఈ విషయం బయటపడింది.
బాధితుడు హనుమంతరావు ఫిర్యాదు ప్రకారం.. తన కొడుకును పెద్ద సినిమాతో హీరోగా లాంచ్ చేస్తానని దర్శకుడు అశోక్ బాబు నమ్మబలికాడు. సినిమా ఖర్చుల కోసం అంటూ రకరకాల కారణాలు చెప్పి విడతల వారీగా మొత్తం రూ.3.5 కోట్లు తీసుకున్నాడు. అయితే, డబ్బులు చేతికి అందినా చాలా రోజులు గడుస్తున్నా సినిమా షూటింగ్ ప్రారంభించలేదు. దీనిపై నిలదీయగా.. తీసుకున్న డబ్బులు కూడా తిరిగి ఇవ్వకుండా కాలయాపన చేస్తూ మోసగించాడు. దీంతో మోసపోయామని గ్రహించిన తండ్రి పోలీసులను ఆశ్రయించారు.
హనుమంతరావు ఇచ్చిన ఫిర్యాదుతో రంగంలోకి దిగిన సైబరాబాద్ ఈఓడబ్ల్యూ (EOW) అధికారులు దర్శకుడు అశోక్ బాబు, నిర్మాత విజయలక్ష్మిలను విచారణకు హాజరుకావాలని ఆదేశించారు. వీరి మధ్య జరిగిన డబ్బు లావాదేవీలు, సినిమా ఒప్పందాలు (అగ్రిమెంట్లు), బ్యాంక్ అకౌంట్ వివరాలపై పోలీసులు గట్టిగా ఆరా తీస్తున్నారు. విచారణ పూర్తయిన తర్వాత నిందితులపై తదుపరి కఠిన చర్యలు తీసుకునే అవకాశం ఉంది.
దర్శకుడు గుడ్లూరి అశోక్ బాబు టాలీవుడ్లో మంచి గుర్తింపు ఉన్న దర్శకుడు. ఆయన డైరెక్షన్లో వచ్చిన ‘ఆకాశరామన్న’, నాని హీరోగా నటించిన ‘పిల్ల జమీందార్’, అనుష్క లీడ్ రోల్లో వచ్చిన ‘భాగమతి’ వంటి సినిమాలు బాక్సాఫీస్ వద్ద మంచి విజయాన్ని సాధించాయి. అంతటి క్రేజ్ ఉన్న స్టార్ డైరెక్టర్ ఇలా కోట్ల రూపాయల మోసం కేసులో ఇరుక్కోవడం ప్రస్తుతం సినీ వర్గాల్లో తీవ్ర చర్చనీయాంశంగా మారింది. ఈ ఆరోపణలపై దర్శకుడు అశోక్ బాబు, నిర్మాత విజయలక్ష్మి త్వరలోనే కోర్టు లేదా మీడియా ముందు ఎలా స్పందిస్తారో చూడాలి.