Ketan Murder Case: యువ రియల్టర్ కేతన్ అగర్వాల్ అనుమానాస్పద మృతి కేసులో లోనావాలా రూరల్ పోలీసులు చేపట్టిన హత్య దర్యాప్తు కీలక దశకు చేరింది. ఈ కేసులో ప్రధాన నిందితులుగా ఉన్న సియా గోయల్, చేతన్ చౌదరిలకు నిజ నిర్ధరణ (పాలీగ్రాఫ్/లై డిటెక్టర్) పరీక్షలు నిర్వహించాలన్న పోలీసుల విజ్ఞప్తిని పుణె న్యాయస్థానం తోసిపుచ్చింది. నిందితుల సమ్మతి లేకుండా ఇటువంటి పరీక్షలను బలవంతంగా నిర్వహించలేమని స్పష్టం చేసిన కోర్టు.. వారికి 14 రోజుల జ్యుడీషియల్ కస్టడీ విధిస్తూ యరవాడ సెంట్రల్ జైలుకు తరలించాలని ఉత్తర్వులు జారీ చేసింది.
జ్యుడీషియల్ మేజిస్ట్రేట్ ఫస్ట్ క్లాస్ (JMFC) ఎ.ఎమ్. విభూతే ముందు ఈ విచారణ జరిగింది. నిందితుల తరపు న్యాయవాదులు పాలీగ్రాఫ్ పరీక్షను తీవ్రంగా వ్యతిరేకించగా.. సుప్రీంకోర్టు మార్గదర్శకాల ప్రకారం నిందితులు స్వచ్ఛందంగా అంగీకరిస్తే తప్ప లై డిటెక్టర్ పరీక్షకు అనుమతి ఇవ్వలేమని మేజిస్ట్రేట్ స్పష్టం చేశారు. జూన్ 23న అరెస్ట్ అయిన ఈ ఇద్దరూ జూలై 3 వరకు పోలీసు కస్టడీలో ఉన్నారు.
ఫోన్లలో సీక్రెట్ ‘కోడ్ లాంగ్వేజ్’.. గుట్టు విప్పిన డిజిటల్ సాక్ష్యాలు!
విచారణ సందర్భంగా లోనావాలా రూరల్ పోలీసులు న్యాయస్థానానికి సమర్పించిన నివేదికలో పలు షాకింగ్ అంశాలను వెల్లడించారు..
-
డిలీటెడ్ డేటా రికవరీ: నిందితులు ఇద్దరి మొబైల్ ఫోన్ల నుండి డిలీట్ చేసిన కాల్ డేటా, చాట్స్ ఇంకా ఇతర కీలక సమాచారాన్ని పోలీసులు రికవర్ చేశారు.
-
కోడ్ భాషలో సంభాషణలు: రికవర్ చేసిన డేటాలో నిందితులు ఇద్దరూ ఒక రహస్య కోడ్ భాషలో మాట్లాడుకున్నట్లు పోలీసులు గుర్తించారు. ఈ హత్య వెనుక మూడో వ్యక్తి ప్రమేయం లేదా ఏదైనా పెద్ద కుట్ర కోణం ఉందా అనే కోణంలో ఈ కోడ్ను డీకోడ్ చేయడానికి దర్యాప్తు సంస్థ ప్రయత్నిస్తోంది. దీనికి సంబంధించి చేతన్ స్నేహితుడిని కూడా అదుపులోకి తీసుకుని విచారిస్తున్నారు.
-
రెండో మొబైల్ సీజ్: ఎవరికీ తెలియకుండా సియా గోయల్ దాచిపెట్టిన మరో రహస్య మొబైల్ ఫోన్ను కూడా పోలీసులు స్వాధీనం చేసుకున్నారు. దీనిని త్వరలోనే ఫోరెన్సిక్ ల్యాబ్కు పంపనున్నారు.
క్షేత్రస్థాయిలో ‘మర్డర్ ప్లాన్’ రిహార్సల్స్..
కేసు దర్యాప్తు అధికారి, అసిస్టెంట్ పోలీస్ ఇన్స్పెక్టర్ మనోజ్ పవార్ కోర్టుకు దర్యాప్తు పురోగతిని వివరిస్తూ.. నిందితులు కేతన్ను ఎలా హత్య చేయాలో ముందుగానే ప్లాన్ చేసుకుని, ఆ ప్రాంతంలో రిహార్సల్స్ (మర్డర్ ప్లాన్ ప్రాక్టీస్) కూడా చేసినట్లు కనుగొన్నామన్నారు. ఆ స్పాట్లోనే పోలీసులు పంచనామా నిర్వహించారు. అలాగే నిందితురాలు సియా తన పాస్పోర్టును పారేసిన స్థలంలో అలాగే నేరం జరిగిన సమయంలో నిందితులు ధరించిన దుస్తులను కూడా పోలీసులు సీజ్ చేశారు.
కస్టడీ పొడిగింపును వ్యతిరేకించిన డిఫెన్స్..
నిందితుల ఫోన్ సంభాషణల వెనుక ఉన్న మూడో వ్యక్తి గుట్టు విప్పడానికి పోలీసు కస్టడీ అవసరమని అసిస్టెంట్ పబ్లిక్ ప్రాసిక్యూటర్ రాజశ్రీ విర్కుడ్ వాదించారు. అయితే, సియా గోయల్ తరపు న్యాయవాది విపుల్ దుషింగ్ దీనిని తీవ్రంగా వ్యతిరేకిస్తూ.. ఇప్పటికే రెండు మొబైల్ ఫోన్లను పోలీసులు సీజ్ చేసినందున, ఆ డేటాను విశ్లేషించడానికి పోలీసుల నైపుణ్యాన్ని వాడుకోవాలి తప్ప నిందితులను మళ్లీ కస్టడీకి కోరడం సరికాదన్నారు. చేతన్ చౌదరి తరపు న్యాయవాది రామ్ షహానే కూడా పోలీసుల అభ్యర్థనను తోసిపుచ్చాలని కోరారు.
అసలు ఏం జరిగిందంటే..?
రియల్ ఎస్టేట్ సంస్థ డైరెక్టర్గా వ్యవహరిస్తున్న 25 ఏళ్ల కేతన్ అగర్వాల్, జూన్ 18న పుణె జిల్లా మావల్ తాలూకాలోని లోహగడ్ కోట కొండపై నుంచి కిందపడి మృతి చెందాడు. మొదట దీనిని ప్రమాదవశాత్తు జరిగిన మరణంగా (Accidental Death) భావించినప్పటికీ, లోనావాలా పోలీసుల లోతైన విచారణలో సియా గోయల్, చేతన్ చౌదరిల ప్రమేయం బయటపడటంతో ఈ కేసును హత్య దర్యాప్తుగా మార్చారు. ప్రస్తుతం నిందితులు జైలుకు వెళ్లడంతో, ఫోరెన్సిక్ నివేదికలు మరియు డిజిటల్ డేటా డీకోడింగ్ ఆధారంగా పోలీసులు తదుపరి చార్జ్షీట్ దాఖలు చేయనున్నారు.