Sai Krishna Case: ఆంధ్ర ప్రదేశ్ రాష్ట్రవ్యాప్తంగా సంచలనం సృష్టించిన రౌడీషీటర్ సాయికృష్ణ లాకప్ డెత్ కేసులో దర్యాప్తు వేగవంతం కావడంతో నిందితులైన పోలీసులు ఒక్కొక్కరుగా పట్టుబడుతున్నారు. ఈ కేసులో ఇవాళ ఉదయమే కృష్ణలంక క్రైమ్ కానిస్టేబుల్ బాబురావును ప్రత్యేక విచారణ బృందం (SIT) అధికారులు అరెస్ట్ చేసి కోర్టులో హాజరుపరచగా.. సాయంత్రానికి భయంతో మరో ఇద్దరు హెడ్ కానిస్టేబుళ్లు స్వయంగా లొంగిపోయారు.
కృష్ణలంక పోలీస్ స్టేషన్కు చెందిన హెడ్ కానిస్టేబుళ్లు అశోక్, నాని.. సూర్యారావుపేటలోని అసిస్టెంట్ కమిషనర్ ఆఫ్ పోలీస్ (ACP) కార్యాలయానికి వచ్చి లొంగిపోయారు. ఈ తాజా పరిణామంతో సాయికృష్ణ లాకప్ డెత్ వ్యవహారం మరిన్ని కీలక మలుపులు తిరుగుతోంది. వీరిద్దరి లొంగుబాటుతో ఈ కేసులో ఇప్పటివరకు అరెస్టయిన/లొంగిపోయిన నిందితుల సంఖ్య నాలుగుకు (4) చేరింది.
నిందితుల లొంగుబాటుతో అసలు నిజాలు వెలుగులోకి..
లొంగిపోయిన హెడ్ కానిస్టేబుళ్లు అశోక్, నానిలను సిట్ అధికారులు వెంటనే తమ అదుపులోకి తీసుకుని రహస్య ప్రాంతంలో విచారిస్తున్నట్లు సమాచారం. ఈ విచారణలో ప్రధానంగా రెండు ప్రశ్నలపై పోలీసులు దృష్టి సారించారు:
-
ఆ రోజు రాత్రి లాకప్లో ఏం జరిగింది? సాయికృష్ణపై థర్డ్ డిగ్రీ ప్రయోగించిన సమయంలో అక్కడ ఎవరెవరు ఉన్నారు?
-
మృతదేహాన్ని ఏం చేశారు? సాయికృష్ణ పోలీసుల దెబ్బలకు మరణించిన తర్వాత నిందితులు ఆ శవాన్ని ఎక్కడ మాయం చేశారు? దానికి ఎవరెవరు సహకరించారు?
పోలీసుల మిస్సింగ్ డ్రామాను రట్టు చేసిన సిట్ (SIT)
గతంలో రౌడీషీటర్ సాయికృష్ణ కనిపించడం లేదంటూ అతని తల్లి విజయలక్ష్మి హైకోర్టులో ‘హెబియస్ కార్పస్’ పిటిషన్ దాఖలు చేయడంతో ఈ వ్యవహారం వెలుగులోకి వచ్చింది. పోలీసులు మొదట దీనిని సాధారణ మిస్సింగ్ కేసుగా చిత్రీకరించే ప్రయత్నం చేశారు. అయితే ఈ కేసు రాజకీయంగా తీవ్ర దుమారం రేపడంతో రాష్ట్ర ప్రభుత్వం ప్రత్యేకంగా సిట్ (SIT) ను ఏర్పాటు చేసింది.
సిట్ రంగంలోకి దిగి జరిపిన శాస్త్రీయ దర్యాప్తులో.. కృష్ణలంక సీఐ నాగరాజు ఆధ్వర్యంలో పోలీసులు సాయికృష్ణను విచక్షణారహితంగా కొట్టడం వల్లే అతను పోలీస్ కస్టడీలోనే మరణించాడని పక్కా ఆధారాలతో తేలింది. దీంతో ఈ కేసులో ప్రధాన నిందితుడిగా ఉన్న సస్పెండెడ్ సీఐ నాగరాజును ఇప్పటికే సిట్ అరెస్ట్ చేసింది. తాజాగా ఇవాళ కానిస్టేబుల్ బాబురావు అరెస్ట్ కావడం, మరో ఇద్దరు హెడ్ కానిస్టేబుళ్లు లొంగిపోవడంతో ఖాకీల గుండెల్లో రైళ్లు పరిగెడుతున్నాయి. సాయికృష్ణ చనిపోయిన రోజున స్టేషన్లో డ్యూటీలో ఉన్న మిగతా సిబ్బంది జాబితాను కూడా సేకరిస్తున్న సిట్ అధికారులు.. ఈ దారుణంలో భాగస్వాములైన ప్రతి ఒక్కరినీ కటకటాల్లోకి నెట్టేందుకు సిద్ధమవుతున్నారు.