Pawan Kalyan: ఆంధ్రప్రదేశ్ ఉప ముఖ్యమంత్రి, జనసేన అధినేత కొణిదెల పవన్ కళ్యాణ్ ఆరోగ్య పరీక్షల నిమిత్తం తన సతీమణి అన్నా కొణిదెల (అన్నా లెజ్ నోవా) తో కలిసి మహారాష్ట్ర రాజధాని ముంబైకి వెళ్లారు. గత కొంతకాలంగా ఆయన రెండు భుజాల తీవ్ర కండరాల నొప్పులతో (Shoulder Muscle Injury) బాధపడుతున్నారు. ముంబైలోని ప్రముఖ కార్పొరేట్ హాస్పిటల్ అయిన కోకిలాబెన్ ధీరూభాయ్ అంబానీ ఆసుపత్రిలో పవన్ కళ్యాణ్కు వైద్యులు ప్రత్యేక పరీక్షలు నిర్వహించనున్నారు.
ఈ పరీక్షల అనంతరం ఆయనకు శస్త్రచికిత్స (Surgery) అవసరమా లేదా కేవలం మందులు, ఫిజియోథెరపీతో నయం చేయవచ్చా అనే విషయంపై డాక్టర్లు ఒక తుది నిర్ణయానికి రానున్నారు.
ఒత్తిడితో కూడిన షెడ్యూల్.. ఆరోగ్యంపై ఎఫెక్ట్
ఏపీ డిప్యూటీ సీఎంగా బాధ్యతలు స్వీకరించినప్పటి నుండి పవన్ కళ్యాణ్ విశ్రాంతి లేకుండా పనిచేస్తున్నారు. ఒకవైపు ప్రభుత్వ శాఖల ప్రక్షాళన, అధికారులతో వరుస సమీక్షలు, క్షేత్రస్థాయి పర్యటనలు చేస్తూనే.. మరోవైపు పార్టీకి సంబంధించిన వ్యవహారాలను కూడా ఆయనే పర్యవేక్షిస్తున్నారు.
దీనికి తోడు గతంలో ఒప్పుకున్న సినిమా షూటింగ్లను పూర్తి చేసేందుకు పవన్ తీవ్రంగా శ్రమించారు. ఈ విపరీతమైన శారీరక ఒత్తిడి కారణంగా ఆయన రెండు భుజాలకు సంబంధించిన కండరాలు చిట్లినట్లు (Torn Muscles) తెలుస్తోంది. అలాగే భుజాల కదలికలకు కీలకమైన ‘రొటేటర్ కఫ్’ (Rotator Cuff) తీవ్రంగా దెబ్బతినడంతో ఆయన నొప్పితో ఇబ్బంది పడుతున్నారు.
కేబినెట్ భేటీలకూ హాజరుకాలేని పరిస్థితి!
గతంలోనే ఈ నొప్పులకు పవన్ కళ్యాణ్ ప్రాథమిక చికిత్స తీసుకున్నప్పటికీ, డాక్టర్లు సూచించిన విధంగా పూర్తిస్థాయిలో రెస్ట్ తీసుకోకుండానే తిరిగి విధుల్లో చేరిపోయారు. నిరంతరం ప్రయాణాలు, కూర్చోవడం వల్ల ఈ నొప్పి మరింత తీవ్రరూపం దాల్చింది.
ఇటీవల జరిగిన రాష్ట్ర మంత్రివర్గ (Cabinet) సమావేశాల్లో కూడా భుజాల నొప్పుల వల్ల ఆయన ఎక్కువసేపు కూర్చోలేకపోయారని, కొన్ని భేటీల నుండి మధ్యలోనే హఠాత్తుగా వెళ్లాల్సి వచ్చిందని పార్టీ వర్గాలు చెబుతున్నాయి. ఈ నేపథ్యంలోనే తాత్కాలిక ఉపశమనం కాకుండా, సమస్యకు శాశ్వత పరిష్కారం కోసం ముంబైలోని నిపుణులైన వైద్యులను సంప్రదించాలని పవన్ నిర్ణయించుకున్నారు.
ముంబై హాస్పిటల్లో జరిగే పరీక్షల నివేదికలు వచ్చిన తర్వాతే డిప్యూటీ సీఎం తదుపరి చికిత్స విధానం మరియు ఆయన రాజకీయ, సినిమా షెడ్యూల్స్పై ఒక స్పష్టత రానుంది.