Weather Report: తెలుగు రాష్ట్రాల ప్రజలకు వాతావరణ శాఖ అదిరిపోయే చల్లని కబురు చెప్పింది. గత కొన్ని రోజులుగా భానుడి భగభగలకు, తీవ్రమైన ఎండలకు అల్లాడిపోతున్న జనం ఎప్పుడెప్పుడా అని ఎదురుచూస్తున్న నైరుతి రుతుపవనాలు ఎట్టకేలకు ఆంధ్రప్రదేశ్లోకి ప్రవేశించాయి. జూన్ 6వ తేదీన ఇవి ఏపీని తాకినట్లు అమరావతి వాతావరణ కేంద్రం అధికారికంగా ప్రకటించింది. దీనివల్ల రాబోయే రోజుల్లో ఎండల తీవ్రత తగ్గి, వాతావరణం చల్లబడనుండటంతో ప్రజలు ఊపిరి పీల్చుకుంటున్నారు.
ఈ రుతుపవనాలు ప్రస్తుతం ఏపీలోని కొన్ని ప్రాంతాలతో పాటు అరేబియా సముద్రం, కర్ణాటక, గోవా, తమిళనాడులోని చాలా ప్రాంతాల్లోకి విస్తరించాయి. రాబోయే రెండు మూడు రోజుల్లో ఇవి మరింత ముందుకు సాగడానికి వాతావరణ పరిస్థితులు చాలా అనుకూలంగా ఉన్నాయి. దీనివల్ల ఏపీతో పాటు తెలంగాణలోని మరికొన్ని ప్రాంతాలకు కూడా ఈ రుతుపవనాలు త్వరలోనే విస్తరించనున్నాయని అధికారులు చెబుతున్నారు.
ఈ రుతుపవనాల ప్రభావంతో రాబోయే మూడు రోజుల పాటు ఆంధ్రప్రదేశ్లో విస్తారంగా వర్షాలు కురిసే అవకాశం ఉంది. ఉత్తర కోస్తా, దక్షిణ కోస్తా ఆంధ్రాలో అక్కడక్కడ తేలికపాటి నుంచి మోస్తరు వర్షాలు పడవచ్చు. అయితే కొన్ని చోట్ల మాత్రం ఎండ తీవ్రత వల్ల వడగాలులు కూడా వీచే ప్రమాదం ఉంది. రాయలసీమ ప్రాంతంలో ఆదివారం రోజు ఒకటి రెండు చోట్ల భారీ వర్షాలు కురిసే అవకాశం ఉందని అధికారులు హెచ్చరించారు. వర్షం పడే సమయంలో గంటకు 40 నుంచి 50 కిలోమీటర్ల వేగంతో బలమైన ఈదురుగాలులు వీస్తాయని, ఉరుములు, మెరుపులు కూడా వస్తాయని తెలిపారు. రాబోయే ఐదు రోజుల్లో ఉష్ణోగ్రతలు క్రమంగా తగ్గుముఖం పడతాయని వెల్లడించారు.
ఇక తెలంగాణ విషయానికి వస్తే.. జార్ఖండ్ నుంచి ఛత్తీస్గఢ్ మీదుగా తెలంగాణ వరకు ఒక వాతావరణ ద్రోణి కొనసాగుతోంది. దీనివల్ల రాబోయే రెండు మూడు రోజుల్లో నైరుతి రుతుపవనాలు తెలంగాణలోకి కూడా ప్రవేశించనున్నాయి. దీని ప్రభావంతో శని, ఆది, సోమవారాల్లో రాష్ట్రంలోని పలు జిల్లాల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉంది.
తెలంగాణలో కూడా వర్షాలు పడే సమయంలో ఉరుములు, మెరుపులతో పాటు గంటకు 40 నుంచి 50 కిలోమీటర్ల వేగంతో ఈదురుగాలులు వీస్తాయని హైదరాబాద్ వాతావరణ కేంద్రం హెచ్చరించింది. ఈ వర్షాల వల్ల రానున్న నాలుగు రోజుల్లో రాష్ట్రంలో ఎండల తీవ్రత తగ్గి, గరిష్ట ఉష్ణోగ్రతలు 2 నుంచి 3 డిగ్రీల వరకు క్రమంగా తగ్గే అవకాశం ఉందని అధికారులు స్పష్టం చేశారు. మొత్తానికి వచ్చే మూడు రోజులు తెలుగు రాష్ట్రాల్లో ఎండల వేడి తగ్గి, వానలు పలకరించబోతున్నాయి.