Crime News: కన్నవారిని కాదనుకుని, ప్రేమించిన వాడే లోకమనుకుని వెళ్లిన ఒక నవవధువు జీవితం నెల రోజులకే అర్ధాంతరంగా ముగిసిపోయింది. కట్నం కోసం అత్తింటివారు చేసిన మానసిక, శారీరక వేధింపులను తట్టుకోలేక, పుట్టింటికి వచ్చిన నెల రోజులకే ఆమె బలవన్మరణానికి పాల్పడింది. గుండెల్ని పిండేసే ఈ విషాద ఉదంతం చాట్రాయి మండలం చనుబండ శివారు సూరంపాలెం గ్రామంలో మంగళవారం చోటు చేసుకుంది.
ప్రేమ వివాహం.. పోలీసుల ఆశ్రయం:
పోలీసులు ఇంకా స్థానికులు తెలిపిన వివరాల ప్రకారం.. సూరంపాలెం గ్రామానికి చెందిన కందుకూరి రవి 108 అంబులెన్సు డ్రైవర్ కి ఇద్దరు కుమార్తెలు అందులో పెద్ద కుమార్తె మోహన చంద్రలేఖ (22). ఈమె ఎన్టీఆర్ జిల్లా విస్సన్నపేటలో డిగ్రీ చదువుతోంది. ఈ క్రమంలోనే ముసునూరు మండలం రమణక్కపేటకు చెందిన ఆరెళ్ల లితిన్ అనే యువకుడితో ఆమెకు పరిచయం ఏర్పడి, అది కాస్తా ప్రేమగా మారింది.
పెద్దలు తమ పెళ్లికి ఒప్పుకోరనే భయంతో.. వీరిద్దరూ గత నెల 23వ తేదీన రహస్యంగా వివాహం చేసుకున్నారు. అనంతరం తమకు ఇరువైపుల పెద్దల నుండి ముప్పు ఉందంటూ ముసునూరు పోలీస్ స్టేషన్ను ఆశ్రయించారు. పోలీసులు ఇరువర్గాల తల్లిదండ్రులను పిలిపించి కౌన్సిలింగ్ ఇచ్చారు. అయితే, తాను మేజర్ నని, లితిన్తోనే ఉంటానని చంద్రలేఖ స్పష్టం చేయడంతో పోలీసులు ఆమెను భర్తతో పాటు పంపించివేశారు.
కట్నం లేదంటూ సూటిపోటి మాటలు.. చేతులు చేసుకునే వరకు!
కట్న కనకాలు లేకుండా వట్టి చేతులతో ఇంట్లోకి అడుగుపెట్టావంటూ పెళ్లయిన రెండు మూడు రోజుల నుంచే చంద్రలేఖకు అత్తింటి వేధింపులు మొదలయ్యాయి. భర్త లితిన్ కి చెప్పిన ప్రయోజనం లేకపోవడం. అత్త, ఇతర బంధువులు కలిసి ఆమెను మానసికంగా వేధించేవారు. అల్లారుముద్దుగా పెంచిన తల్లిదండ్రులను కాదని వచ్చి తప్పు చేశాననే ఆవేదనతో చంద్రలేఖ మొదట్లో అంతా మౌనంగా భరించింది.
కానీ, రోజురోజుకూ అత్తింటివారి వేధింపులు మితిమీరిపోయి.. చివరికి ఆమెపై చేయిచేసుకునే (శారీరక దాడి) వరకు వెళ్లాయి. దీంతో తట్టుకోలేకపోయిన చంద్రలేఖ తన తండ్రికి ఫోన్ చేసి.. “నన్ను ఇక్కడి నుండి త్వరగా తీసుకెళ్లకపోతే చనిపోతాను” అంటూ విలపించింది. దీంతో తండ్రి ఆదివారం రాత్రి ఆమెను తిరిగి పుట్టింటికి తీసుకువచ్చారు.
న్యాయం జరిగేలోపే అనంత లోకాలకు..
సోమవారం నాడు చంద్రలేఖ తన తండ్రితో కలిసి పోలీస్ స్టేషన్కు వెళ్లి, అత్తింటివారు పెడుతున్న బాధలను ఎస్సైకి వివరించింది. దీనిపై స్పందించిన పోలీసులు.. మంగళవారం ఇరు కుటుంబాలను పిలిపించి మాట్లాడి ఒక నిర్ణయం తీసుకుందామని చెప్పారు. అయితే ఇంటికి వచ్చినప్పటి నుండి చంద్రలేఖ తీవ్ర మనోవేదనకు గురైంది. “తప్పు చేసి మిమ్మల్ని నలుగురిలో నవ్వులపాలు చేశాను” అంటూ తల్లిదండ్రుల వద్ద ఏడ్చింది.
మంగళవారం ఉదయం తల్లిదండ్రులు తమ దైనందిన పనుల్లో నిమగ్నమై ఉన్న సమయంలో, చంద్రలేఖ ఇంట్లో ఎవరూ లేనిది చూసి ఉరివేసుకుంది. గమనించిన కుటుంబ సభ్యులు ఆమెను వెంటనే విస్సన్నపేట ప్రభుత్వ ఆసుపత్రికి తరలించినప్పటికీ.. ఆమె అప్పటికే మృతి చెందినట్లు వైద్యులు ధృవీకరించారు.
కేసు నమోదు.. దర్యాప్తు ప్రారంభం
ఘటనపై సమాచారం అందుకున్న నూజివీడు డీఎస్పీ ప్రసాద్ స్వయంగా ఘటనా స్థలాన్ని సందర్శించి, కుటుంబ సభ్యుల నుండి వివరాలు సేకరించారు. మృతురాలి తండ్రి కందుకూరి రవి ఇచ్చిన లిఖితపూర్వక ఫిర్యాదు మేరకు విస్సన్నపేట/ముసునూరు పరిధిలోని ఎస్సై రామకృష్ణ కేసు నమోదు చేసి, అత్తింటి వేధింపుల కోణంలో దర్యాప్తు జరుపుతున్నారు. డిగ్రీ చదువుతూ ఎంతో ఉజ్వల భవిష్యత్తు ఉన్న యువతి ఇలా ప్రేమించి మోసపోయి ప్రాణాలు కోల్పోవడంతో గ్రామంలో తీవ్ర విషాద ఛాయలు అలముకున్నాయి.