RCB vs KKR: ఐపీఎల్ 2026 సీజన్లో రాయల్ ఛాలెంజర్స్ బెంగళూరు (RCB) తమ విజయయాత్రను కొనసాగిస్తూ పాయింట్ల పట్టికలో మళ్లీ అగ్రస్థానానికి చేరుకుంది. రాయ్పూర్లోని షహీద్ వీర్ నారాయణ్ సింగ్ అంతర్జాతీయ స్టేడియంలో కోల్కతా నైట్ రైడర్స్ (KKR)తో జరిగిన ఉత్కంఠభరిత పోరులో ఆర్సీబీ 6 వికెట్ల తేడాతో ఘనవిజయం సాధించింది. విరాట్ కోహ్లీ అజేయ సెంచరీతో చెలరేగడంతో, కేకేఆర్ నిర్దేశించిన 193 పరుగుల భారీ లక్ష్యాన్ని ఆర్సీబీ మరో 5 బంతులు మిగిలి ఉండగానే ఛేదించింది.
విరాట్ కోహ్లీ రికార్డు సెంచరీ
193 పరుగుల లక్ష్య ఛేదనలో ఆర్సీబీకి ఆరంభంలోనే ఎదురుదెబ్బ తగిలింది. యువ ఆటగాడు జాకబ్ బెథెల్ (15) 4వ ఓవర్లోనే పెవిలియన్ చేరి మరోసారి నిరాశపరిచాడు. అయితే, ఓపెనర్గా వచ్చిన విరాట్ కోహ్లీ తన కెరీర్లో అత్యుత్తమ ఇన్నింగ్స్ల్లో ఒకటి ఆడాడు. కేవలం 58 బంతుల్లోనే సెంచరీ పూర్తి చేసుకున్న విరాట్, మొత్తం 60 బంతుల్లో 11 ఫోర్లు, 3 సిక్సర్లతో 105 పరుగులు చేసి అజేయంగా నిలిచాడు. ఐపీఎల్ చరిత్రలో విరాట్కు ఇది 9వ సెంచరీ కావడం విశేషం.
కోహ్లీకి తోడుగా కన్నడిగుడు దేవదత్ పడిక్కల్ (39) బాధ్యతాయుతమైన ఇన్నింగ్స్ ఆడాడు. వీరిద్దరూ రెండో వికెట్కు 92 పరుగుల కీలక భాగస్వామ్యాన్ని నెలకొల్పి జట్టును విజయపథంలో నడిపించారు. మధ్యలో రజత్ పాటిదార్ (11), టిమ్ డేవిడ్ (2) త్వరగా అవుటైనప్పటికీ, జితేష్ శర్మ (8*) తో కలిసి కోహ్లీ మ్యాచ్ను ముగించాడు. కేకేఆర్ బౌలర్లలో కార్తీక్ త్యాగి 3 వికెట్లు తీసి ఆకట్టుకున్నాడు.
రఘువంశీ, రింకు మెరుపులు వృధా
అంతకుముందు టాస్ ఓడి బ్యాటింగ్కు దిగిన కేకేఆర్ నిర్ణీత 20 ఓవర్లలో 3 వికెట్ల నష్టానికి 192 పరుగులు చేసింది. ఆరంభంలో ఫిన్ అలెన్ (18), అజింక్య రహానే (19) వికెట్లు కోల్పోయినప్పటికీ, యువ సంచలనం అంగ్క్రిష్ రఘువంశీ అద్భుత ఇన్నింగ్స్ ఆడాడు. రఘువంశీ 46 బంతుల్లో 7 ఫోర్లు, 3 సిక్సర్లతో 71 పరుగులు సాధించాడు. చివర్లో రింకు సింగ్ (49*) కేవలం 29 బంతుల్లోనే విరుచుకుపడి జట్టుకు భారీ స్కోరు అందించాడు. ఆర్సీబీ బౌలర్లలో భువనేశ్వర్ కుమార్, జోష్ హేజిల్వుడ్ మరియు రసిక్ సలాం దార్ తలో వికెట్ పడగొట్టారు. చివరి ఓవర్లలో ఆర్సీబీ బౌలర్లు కచ్చితమైన లెంగ్త్తో బౌలింగ్ చేసి కేకేఆర్ స్కోరును నియంత్రించారు.
ప్లే-ఆఫ్స్ దిశగా ఆర్సీబీ
ఈ విజయంతో 12 మ్యాచ్లు ఆడిన ఆర్సీబీ 8 విజయాలతో 16 పాయింట్లు సాధించి పట్టికలో మొదటి స్థానానికి ఎగబాకింది. దీనితో బెంగళూరు ప్లే-ఆఫ్ స్థానం దాదాపు ఖరారైపోయింది. మిగిలిన రెండు మ్యాచ్ల్లో (పంజాబ్ కింగ్స్ మరియు సన్రైజర్స్ హైదరాబాద్తో) ఒక్కటి గెలిచినా ఆర్సీబీ టాప్-2లో నిలిచే అవకాశం ఉంటుంది.