Dont Buy Gold: మధ్యప్రాచ్య దేశాలలో నెలకొన్న ఉద్రిక్త పరిస్థితుల వల్ల ప్రపంచవ్యాప్తంగా చమురు సంక్షోభం తలెత్తింది. ఈ నేపథ్యంలో, దేశ ఆర్థిక వ్యవస్థను కాపాడుకునేందుకు ప్రధాని నరేంద్ర మోదీ ఇటీవల ఒక ఆసక్తికరమైన విజ్ఞప్తి చేశారు. పెళ్లిళ్ల కోసం కనీసం ఏడాది పాటు బంగారం కొనడం మానుకోవాలని ఆయన దేశ ప్రజలను కోరారు. వినడానికి ఇది కొంత ఆశ్చర్యంగా అనిపించినప్పటికీ, దీని వెనుక దేశ విదేశీ మారక నిల్వలను ఇంకా రూపాయి విలువను రక్షించాలనే బలమైన ఆర్థిక కారణం దాగి ఉంది.
భారతదేశంలో బంగారం అంటే కేవలం ఆభరణం మాత్రమే కాదు, అది ఒక సెంటిమెంట్ అలాగే ఆపత్కాల పొదుపు. అయితే, దేశ ప్రయోజనాల దృష్ట్యా ప్రధాని చేసిన ఈ విజ్ఞప్తి వెనుక ఉన్న ఆర్థిక సమీకరణాలను మనం అర్థం చేసుకోవాలి.
చమురు ధరల పెరుగుదల – పెరిగిన దిగుమతి భారం
పశ్చిమాసియాలో యుద్ధ వాతావరణం వల్ల అంతర్జాతీయ మార్కెట్లో ముడి చమురు ధరలు బ్యారెల్కు 70 డాలర్ల నుండి ఒక్కసారిగా 126 డాలర్లకు పెరిగాయి. భారత్ తన చమురు అవసరాలలో 85 శాతం విదేశాల నుండి దిగుమతి చేసుకుంటుంది. చమురు ధరలు పెరిగిన ప్రతిసారీ, మనం విదేశీ మారక ద్రవ్యాన్ని (డాలర్లను) భారీగా వెచ్చించాల్సి ఉంటుంది. దీనివల్ల దేశ ఖజానాపై విపరీతమైన భారం పడుతోంది.
బంగారం మరియు డాలర్ల మధ్య సంబంధం
చమురు లాగే, బంగారం కూడా భారత్లో అత్యధికంగా దిగుమతి చేసుకునే వస్తువులలో ఒకటి. మనం విదేశాల నుండి బంగారం కొనాలన్నా అంతర్జాతీయ మార్కెట్లో అమెరికన్ డాలర్లలోనే చెల్లింపులు చేయాలి.
-
రూపాయిపై ఒత్తిడి: ఒకవైపు చమురు దిగుమతుల కోసం ఎక్కువ డాలర్లు ఖర్చు చేస్తూ, మరోవైపు బంగారం కోసం కూడా డాలర్లు ఖర్చు చేస్తే.. మార్కెట్లో డాలర్కు డిమాండ్ పెరిగి, రూపాయి విలువ పడిపోతుంది.
-
కరెంట్ అకౌంట్ డెఫిసిట్: దిగుమతుల కోసం మనం చేసే ఖర్చు పెరిగే కొద్దీ దేశ ఆర్థిక లోటు (Current Account Deficit) పెరుగుతుంది. ఇది దేశ ఆర్థిక స్థిరత్వాన్ని దెబ్బతీస్తుంది.
పొదుపు మంత్రం – దేశ ప్రయోజనం
ప్రధాని మోదీ కేవలం బంగారం కొనుగోళ్లు ఆపమని మాత్రమే కాకుండా, పెట్రోల్ మరియు డీజిల్ వినియోగాన్ని కూడా తగ్గించాలని కోరారు. వీలైనంత వరకు వర్క్ ఫ్రమ్ హోమ్ (WFH) పద్ధతిని అనుసరించడం వల్ల ఇంధనం ఆదా అవుతుందని, తద్వారా విదేశీ కరెన్సీని పొదుపు చేయవచ్చని ఆయన ఆకాంక్షించారు. ఈ క్లిష్ట సమయంలో విలాసవంతమైన ఖర్చులను తగ్గించుకోవడం ద్వారా దేశ ఆర్థిక వ్యవస్థను ఇంధన సంక్షోభం నుండి రక్షించవచ్చని ప్రభుత్వం భావిస్తోంది.