CM Joseph Vijay: తమిళనాడు రాజకీయ చరిత్రలో ఒక సువర్ణ అధ్యాయం మొదలైంది. వెండితెరపై ‘దలపతి’గా కోట్ల మంది హృదయాలను గెలుచుకున్న జోసెఫ్ విజయ్, ఇప్పుడు నిజ జీవితంలో రాష్ట్ర సారథిగా బాధ్యతలు చేపట్టారు. ఆదివారం చెన్నైలోని జవహర్లాల్ నెహ్రూ ఇండోర్ స్టేడియం వేదికగా జరిగిన అట్టహాసమైన కార్యక్రమంలో విజయ్ తమిళనాడు ముఖ్యమంత్రిగా ప్రమాణ స్వీకారం చేశారు. గవర్నర్ రాజేంద్ర విశ్వనాథ్ అర్లేకర్ ఆయనతో ప్రమాణము చేయించారు.
తమిళనాడు రాజకీయాల్లో 1967 తర్వాత ఒక చారిత్రాత్మక మార్పు చోటుచేసుకుంది. గత ఆరు దశాబ్దాలుగా డీఎంకే లేదా ఏఐఏడీఎంకే పార్టీల మధ్యే సాగుతున్న అధికార మార్పిడికి విజయ్ నేతృత్వంలోని తమిళగ వెట్రి కజగం (TVK) తెరదించింది. ద్రవిడ దిగ్గజాల కోటను బద్దలు కొట్టి, ఒక మూడవ ప్రత్యామ్నాయంగా విజయ్ అధికార పీఠాన్ని అధిరోహించారు.
అంకెల్లో మెజారిటీ.. అండగా మిత్రపక్షాలు
గత కొద్ది రోజులుగా సాగిన ఉత్కంఠకు తెర దించుతూ, విజయ్ అసెంబ్లీలో తన బలాన్ని నిరూపించుకున్నారు. మొత్తం 234 స్థానాలున్న తమిళనాడు అసెంబ్లీలో మెజారిటీకి 118 సీట్లు అవసరం కాగా, విజయ్కు 120 మంది ఎమ్మెల్యేల మద్దతు లభించింది.
-
కాంగ్రెస్ హ్యాండ్: డీఎంకే కూటమి నుంచి బయటకు వచ్చి విజయ్కు మద్దతు తెలపాలని కాంగ్రెస్ తీసుకున్న నిర్ణయం ఈ గెలుపులో కీలక పాత్ర పోషించింది.
-
ఇతర పార్టీలు: వామపక్షాలు ఇంకా మరికొన్ని చిన్న పార్టీల మద్దతుతో విజయ్ సునాయాసంగా మేజిక్ ఫిగర్ను దాటారు.
సూపర్స్టార్ నుంచి సీఎంగా..
51 ఏళ్ల విజయ్, తన సినీ కెరీర్ లో అందనంత దూరంలో ఉన్నప్పుడే రాజకీయాల్లోకి రావడం ఒక సాహసంగా భావించినా, ఆయన పక్కా ప్రణాళికతో విజయం సాధించారు. అభిమానుల బలమే పునాదిగా ప్రారంభమైన టీవీకే, నేడు అధికార పార్టీగా ఎదిగింది. ప్రమాణ స్వీకార వేడుకకు తనయుడి విజయాన్ని చూసేందుకు విజయ్ తల్లిదండ్రులు హాజరవ్వగా, కాంగ్రెస్ అగ్రనేత రాహుల్ గాంధీతో పాటు టాలీవుడ్, కోలీవుడ్ నుంచి పలువురు సినీ తారలు మరియు రాజకీయ ప్రముఖులు హాజరై అభినందనలు తెలిపారు.
సరికొత్త ఆశలు.. భారీ లక్ష్యాలు
ద్రవిడ పార్టీల ఆధిపత్యం లేని ప్రభుత్వాన్ని చూడాలనుకున్న తమిళ ప్రజల ఆకాంక్ష విజయ్ రూపంలో నెరవేరింది. ఆయన తన మేనిఫెస్టోలో ప్రకటించిన విధంగా అవినీతి రహిత పాలన మరియు రాష్ట్ర ఆర్థికాభివృద్ధి దిశగా ఎటువంటి అడుగులు వేస్తారోనని దేశవ్యాప్తంగా ఆసక్తి నెలకొంది.