Tamil Nadu Politics: తమిళనాడు రాజకీయాలు ఇప్పుడు దేశవ్యాప్తంగా హాట్ టాపిక్గా మారాయి. అసెంబ్లీ ఎన్నికల ఫలితాలు వచ్చి నాలుగు రోజులు గడుస్తున్నా, ప్రభుత్వం ఏర్పాటుపై ఇంకా ప్రతిష్టంభన కొనసాగుతూనే ఉంది. 108 స్థానాలతో అతిపెద్ద పార్టీగా అవతరించిన ‘తమిళగ వెట్రి కళగం’ (TVK) అధినేత విజయ్కు ప్రభుత్వం ఏర్పాటు చేసే అవకాశం ఇవ్వకపోవడంపై రాజకీయ వర్గాల్లో తీవ్ర చర్చ జరుగుతోంది. విజయ్ ఇప్పటికే రెండుసార్లు గవర్నర్ రాజేంద్ర ఆర్లేకర్ను కలిసి అనుమతి కోరినప్పటికీ, గవర్నర్ నుంచి సానుకూల స్పందన రాకపోవడంతో టీవీకే శ్రేణులు రోడ్డెక్కాయి.
గవర్నర్ తీరును నిరసిస్తూ శుక్రవారం చెన్నైలోని లోక్ భవన్ ముందు టీవీకే కార్యకర్తలు, కాంగ్రెస్ మద్దతుదారులు భారీ ఎత్తున ఆందోళన చేపట్టారు. విజయ్ను వెంటనే ప్రభుత్వం ఏర్పాటు చేయాలని డిమాండ్ చేస్తూ ప్లకార్డులతో నిరసన తెలిపారు. పరిస్థితి ఉద్రిక్తంగా మారడంతో పోలీసులు రంగ ప్రవేశం చేసి నిరసనకారులను అదుపులోకి తీసుకున్నారు. విజయ్కు అటు రాజకీయంగా, ఇటు సినీ రంగం నుంచి కూడా మద్దతు పెరుగుతుండటంతో ఈ వివాదం మరింత ముదిరేలా కనిపిస్తోంది.
మరోవైపు, తమిళ రాజకీయాల్లో అనూహ్యమైన పొత్తులు తెరపైకి వస్తున్నాయి. విజయ్ ప్రభావాన్ని అడ్డుకునేందుకు బద్ధశత్రువులైన డీఎంకే, అన్నాడీఎంకే పార్టీలు చేతులు కలిపే అవకాశం ఉందన్న వార్తలు రాజకీయ విశ్లేషకులను ఆశ్చర్యానికి గురిచేస్తున్నాయి. ద్రవిడ ఉనికిని కాపాడుకోవడమే లక్ష్యంగా ఈ రెండు పార్టీలు ఏకం కావచ్చని ప్రచారం జరుగుతోంది. ఈ పరిణామాలతో తమిళనాడులో ఎప్పుడు ఏం జరుగుతుందో అన్న ఉత్కంఠ నెలకొంది.
ఈ క్రమంలోనే డీఎంకే అధినేత ఎం.కె. స్టాలిన్ ఒక సంచలన ప్రకటన చేసి అందరినీ షాక్కు గురిచేశారు. ఒకవేళ తమ కూటమి అధికారంలోకి వస్తే తాను ముఖ్యమంత్రిని కానని, తమిళ సూపర్ స్టార్ రజనీకాంత్ను ముఖ్యమంత్రిని చేస్తానంటూ ఆయన ప్రకటించారు. స్టాలిన్ చేసిన ఈ ‘ట్విస్ట్’ ఇప్పుడు తమిళనాట రాజకీయ సమీకరణాలను పూర్తిగా మార్చేస్తోంది. అటు విజయ్ పట్టుదల, ఇటు స్టాలిన్ వ్యూహాలతో తమిళనాడు పాలిటిక్స్ ఒక సినిమా క్లైమాక్స్ను తలపిస్తున్నాయి.