Thalapathy Vijay: తమిళనాడు అసెంబ్లీ ఎన్నికల ఫలితాల్లో ఊహించని సంచలనం నమోదైంది. ప్రముఖ నటుడు విజయ్ నేతృత్వంలోని ‘తమిళగ వెట్రి కళగం’ (TVK) పార్టీ తన తొలి ప్రయత్నంలోనే రికార్డు స్థాయి విజయానికి చేరువలో ఉంది. దశాబ్దాలుగా తమిళ రాజకీయాలను శాసిస్తున్న డీఎంకే వంటి బలమైన పార్టీలకు షాక్ ఇస్తూ, టీవీకే దాదాపు 100కు పైగా స్థానాల్లో ఆధిక్యం ప్రదర్శించడం విశేషం. మేజిక్ ఫిగర్ 118కి చేరువవుతూ అధికారం వైపు అడుగులు వేస్తోంది. పార్టీ స్థాపించిన అతి తక్కువ సమయంలోనే విజయ్ ఈ స్థాయిలో ఓటర్ల మనసు గెలవడానికి ఆయన ప్రకటించిన ‘7 సూపర్ హామీలే’ ప్రధాన కారణమని రాజకీయ విశ్లేషకులు చెబుతున్నారు.
ప్రజలపై బలమైన ప్రభావం చూపిన పథకాల్లో ముఖ్యంగా మహిళా ఓటర్లను ఆకర్షించినవి మూడు ఉన్నాయి. మహిళలకు నెలకు రూ. 2,500 ఆర్థిక సాయం, ఏడాదికి 6 గ్యాస్ సిలిండర్లు ఉచితంగా అందజేయడం, మరియు ఆడబిడ్డల పెళ్లికి 8 గ్రాముల బంగారాన్ని కానుకగా ఇస్తామన్న హామీలు టీవీకేకు భారీగా ఓట్లను సంపాదించిపెట్టాయి. వీటితో పాటు ప్రభుత్వ బస్సుల్లో మహిళలకు ఉచిత ప్రయాణం కల్పించడం, విద్యార్థుల చదువుల కోసం ఏటా రూ. 15 వేల సాయం అందిస్తామన్న నిర్ణయాలు మధ్యతరగతి, పేద కుటుంబాల్లో విజయ్ పట్ల నమ్మకాన్ని పెంచాయి.
యువత మరియు రైతుల మద్దతు కూడా ఈ విజయంలో కీలక పాత్ర పోషించింది. చదువు పూర్తి చేసుకుని ఉద్యోగాల కోసం ఎదురుచూస్తున్న నిరుద్యోగులకు ‘భృతి’ ప్రకటించడం యువతను టీవీకే వైపు తిప్పుకుంది. డిగ్రీ చేసిన వారికి నెలకు రూ. 4,000, డిప్లొమా చేసిన వారికి రూ. 2,500 ఇస్తామని విజయ్ హామీ ఇచ్చారు. అలాగే వ్యవసాయ రంగంలో విప్లవాత్మకమైన రైతు రుణమాఫీ హామీ రైతుల్లో ధైర్యాన్ని నింపింది. 5 ఎకరాల లోపు ఉన్న చిన్న రైతుల రుణాలను పూర్తిగా మాఫీ చేస్తామని, ఆ పైన ఉన్న వారికి 50 శాతం వరకు మినహాయింపు ఇస్తామని ప్రకటించడం గ్రామీణ ప్రాంతాల్లో పార్టీకి బలాన్ని చేకూర్చింది.
అయితే, ఈ భారీ విజయంతో పాటు విజయ్ ముందు పెద్ద సవాలు కూడా ఉంది. ఎన్నికల ప్రచారంలో ఇచ్చిన ఈ ఖరీదైన హామీలను ఆచరణలోకి తీసుకురావడం, రాష్ట్ర ఆర్థిక వ్యవస్థపై భారం పడకుండా పథకాలను అమలు చేయడం ఆయనకు పరీక్షగా మారనుంది. ఒక నటుడిగా వెండితెరపై రికార్డులు సృష్టించిన విజయ్, ఇప్పుడు రాజకీయ యవనికపై ముఖ్యమంత్రిగా ప్రజా ప్రతినిధిగా ఏ మేరకు రాణిస్తారో వేచి చూడాలి.