TG Inter Results 2026: ఇంటర్ ఫలితాలు విడుదల.. రిజల్ట్స్ లింక్స్, వాట్సాప్ ద్వారా చెక్ చేసుకునే విధానం ఇదే!

TG Inter Results 2026: తెలంగాణ రాష్ట్ర ఇంటర్మీడియట్ విద్యార్థుల నిరీక్షణకు తెరపడింది. 2026 విద్యా సంవత్సరానికి సంబంధించిన ఇంటర్ ప్రథమ, ద్వితీయ సంవత్సర ఫలితాలను రాష్ట్ర ఇంటర్ విద్యా బోర్డు నేడు అధికారికంగా విడుదల చేసింది. హైదరాబాద్‌లోని నాంపల్లిలో ఉన్న ఇంటర్ బోర్డు కార్యాలయంలో రాష్ట్ర ప్రభుత్వ ప్రజా సంబంధాల సలహాదారు కె. కేశవరావు, విద్యాశాఖ కార్యదర్శి యోగితారాణాతో కలిసి ఈ ఫలితాలను ప్రకటించారు. ఏకకాలంలోనే జనరల్ మరియు వొకేషనల్ కోర్సుల రిజల్ట్స్‌ను బోర్డు అందుబాటులోకి తీసుకువచ్చింది.

ఆన్‌లైన్‌లో ఫలితాలు చూసుకోవడం ఎలా?

విద్యార్థులు తమ మార్కులను తెలుసుకోవడానికి ఇంటర్ బోర్డు సూచించిన అధికారిక వెబ్‌సైట్లను సందర్శించాల్సి ఉంటుంది. ఫలితాల రద్దీ దృష్ట్యా సర్వర్ ఇబ్బందులు కలగకుండా రెండు ప్రత్యేక వెబ్‌సైట్లను అధికారులు కేటాయించారు.

1. ముందుగా https://tgbie.cgg.gov.in లేదా https://results.cgg.gov.in వెబ్‌సైట్‌లోకి వెళ్లాలి.

2. హోమ్ పేజీలో కనిపించే ‘TS Inter 1st Year Results 2026’ లేదా ‘TS Inter 2nd Year Results 2026’ లింక్‌పై క్లిక్ చేయాలి.

3. మీ హాల్ టికెట్ నంబర్‌ను నిర్దేశించిన బాక్సులో నమోదు చేయాలి.

4. సబ్మిట్ బటన్ నొక్కగానే మీ మార్కుల జాబితా స్క్రీన్‌పై కనిపిస్తుంది.

5. భవిష్యత్తు అవసరాల కోసం రిజల్ట్ కాపీని డౌన్‌లోడ్ చేసుకుని, ప్రింట్ తీసుకోవడం ఉత్తమం.

వాట్సాప్ ద్వారా ఫలితాలు: కొత్త సౌకర్యం

ఈ ఏడాది విద్యార్థుల సౌకర్యార్థం సాంకేతికతను జోడిస్తూ వాట్సాప్ ద్వారా కూడా ఫలితాలు పొందే వెసులుబాటును బోర్డు కల్పించింది. వెబ్‌సైట్ ఓపెన్ కాకపోయినా లేదా ఇంటర్నెట్ నెమ్మదిగా ఉన్నా ఈ పద్ధతి చాలా ఉపయోగకరంగా ఉంటుంది.

వాట్సాప్ ప్రాసెస్ ఇలా:

• మొదట మీ మొబైల్‌లో 8096958096 నంబర్‌ను సేవ్ చేసుకోండి.

• వాట్సాప్ ఓపెన్ చేసి ఆ నంబర్‌కు ‘Hi’ అని మెసేజ్ పంపండి.

• అక్కడ వచ్చే ఆప్షన్లలో ‘BIE Exam Result’ అని టైప్ చేయాలి.

• తర్వాత ‘Start Service’ పై క్లిక్ చేస్తే ఒక విండో ఓపెన్ అవుతుంది.

• అందులో ‘Check Result’ ఆప్షన్ ఎంచుకుని, మీ హాల్ టికెట్ నంబర్, సంవత్సరం (Year), విభాగం (General/Vocational) వివరాలు ఇస్తే వెంటనే మీ ఫలితాలు మెసేజ్ రూపంలో వస్తాయి.

ఈ ఏడాది ఫలితాల్లో ఉత్తీర్ణత శాతంపై విద్యాశాఖ సంతృప్తి వ్యక్తం చేసింది. విద్యార్థులు తమ మార్కులకు సంబంధించి ఏవైనా సందేహాలు ఉంటే బోర్డు హెల్ప్‌లైన్ నంబర్లను సంప్రదించవచ్చు. రీ-వెరిఫికేషన్ మరియు రీ-కౌంటింగ్ తేదీలను కూడా బోర్డు త్వరలోనే ప్రకటించనుంది.