Hate Speech Bill: తెలంగాణ సమాజంలో విద్వేషాలను అరికట్టేందుకు రాష్ట్ర ప్రభుత్వం కీలక నిర్ణయం తీసుకుంది. సమాజంలో అశాంతిని రేకెత్తించేలా మాట్లాడినా, సోషల్ మీడియాలో పోస్టులు పెట్టినా కఠిన చర్యలు తీసుకునేలా రూపొందించిన ‘హేట్ స్పీచ్ బిల్లు’ను ప్రభుత్వం అసెంబ్లీలో ప్రవేశపెట్టింది. ఇప్పటికే రాష్ట్ర మంత్రిమండలి ఆమోదం పొందిన ఈ బిల్లును, స్పీకర్ ప్రస్తుతం సెలెక్ట్ కమిటీ పరిశీలనకు పంపారు. కులం, మతం, ప్రాంతం లేదా లింగం పేరుతో ఇతరులను దూషించినా, రెచ్చగొట్టేలా వ్యవహరించినా ఈ కొత్త చట్టం ద్వారా కఠిన శిక్షలు తప్పవు.
శిక్షలు మరియు జరిమానాలు చాలా కఠినం
ఈ బిల్లు ప్రకారం విద్వేష పూరిత ప్రసంగాలు లేదా పోస్టులు పెట్టినట్లు మొదటిసారి నిరూపితమైతే, నిందితులకు ఏడేళ్ల వరకు జైలు శిక్ష పడే అవకాశం ఉంది. దీనితో పాటు రూ. 50 వేల జరిమానా కూడా విధిస్తారు. ఒకవేళ ఇదే తప్పును రెండోసారి చేస్తే, శిక్షా కాలం పదేళ్లకు పెరుగుతుంది మరియు జరిమానా రూ. లక్ష వరకు ఉంటుంది. ముఖ్యంగా ఈ నేరాలను ‘నాన్-బెయిలబుల్’ (వెంటనే బెయిల్ రాని) కింద పరిగణించడం గమనార్హం. కేవలం మాటల ద్వారానే కాకుండా, రాతలు, ఎలక్ట్రానిక్ మాధ్యమాలు, సోషల్ మీడియా ద్వారా పంచుకునే సమాచారం కూడా ఈ చట్టం పరిధిలోకి వస్తుంది.
సర్వీస్ ప్రొవైడర్లకు కూడా ఆదేశాలు
సోషల్ మీడియాలో విచ్చలవిడిగా సాగుతున్న అసభ్యకర కంటెంట్, రెచ్చగొట్టే సందేశాలకు చెక్ పెట్టే అధికారం ఈ బిల్లు అధికారులకు కల్పిస్తుంది. ఏదైనా అభ్యంతరకర పోస్టులు ఉంటే వాటిని వెంటనే తొలగించాలని ఇంటర్నెట్ సర్వీస్ ప్రొవైడర్లను లేదా ఎలక్ట్రానిక్ మీడియా సంస్థలను ఆదేశించే అధికారం అధికారులకు ఉంటుంది. మతం, జాతి, కులం, వర్గం, భాష లేదా నివాసం వంటి అంశాల ఆధారంగా ఎవరినీ తక్కువ చేసి మాట్లాడకూడదని ప్రభుత్వం ఈ బిల్లు ద్వారా స్పష్టం చేస్తోంది.
ఎందుకీ నిర్ణయం?
ఇటీవల కాలంలో సోషల్ మీడియాలో వ్యక్తిగత దూషణలు, సమాజంలో చిచ్చు పెట్టే ప్రసంగాలు విపరీతంగా పెరిగిపోయాయని ప్రభుత్వం భావిస్తోంది. సభలు, సమావేశాల్లోనే కాకుండా ఫేస్బుక్, వాట్సాప్, ఎక్స్ (ట్విట్టర్) వంటి వేదికలపై ఇష్టం వచ్చినట్లు మాట్లాడి తప్పించుకోవడం ఇకపై సాధ్యం కాదు. ప్రజల మధ్య శాంతిభద్రతలను కాపాడటమే లక్ష్యంగా ప్రభుత్వం ఈ కఠిన చట్టాన్ని తీసుకువస్తోంది. కాబట్టి సోషల్ మీడియా వినియోగదారులు తమ పోస్టుల విషయంలో మరింత జాగ్రత్తగా ఉండాలని నిపుణులు సూచిస్తున్నారు.