Kavitha: తెలంగాణ రాజకీయాల్లో మరో కీలక పరిణామం చోటుచేసుకోబోతోంది. మాజీ ఎమ్మెల్సీ, తెలంగాణ జాగృతి అధ్యక్షురాలు కల్వకుంట్ల కవిత సొంత రాజకీయ పార్టీని ప్రకటించేందుకు సిద్ధమయ్యారు. ఈ నెల మార్చి 27న, శ్రీరామనవమి పర్వదినాన్ని పురస్కరించుకుని ఉదయం 8 గంటలకు నిజామాబాద్ వేదికగా ఆమె తన కొత్త పార్టీని అధికారికంగా ప్రకటించనున్నారు. ఇందుకోసం ఇప్పటికే అన్ని ఏర్పాట్లు పూర్తయ్యాయి. తన మెట్టినిల్లు అయిన నిజామాబాద్ నుంచే పార్టీ జెండా, గుర్తు మరియు విధివిధానాలను ఆమె వెల్లడించే అవకాశం ఉందని జాగృతి వర్గాలు స్పష్టం చేస్తున్నాయి.
శ్రీరామనవమి రోజే ప్రకటన.. షెడ్యూల్ ఇదే!
శుక్రవారం (మార్చి 27) ఉదయం కవిత నిజామాబాద్ జిల్లాలో పర్యటించనున్నారు. ఆ రోజు ఆమె కార్యక్రమాల వివరాలు ఇలా ఉన్నాయి:
-
ఉదయం 8:00 గంటలకు: నిజామాబాద్లోని తెలంగాణ జాగృతి కార్యాలయంలో మీడియా సమావేశం (Press Meet) నిర్వహిస్తారు. అక్కడే పార్టీ పేరు మరియు భవిష్యత్ కార్యాచరణను ప్రకటిస్తారు.
-
ఉదయం 9:30 గంటలకు: ప్రసిద్ధ శ్రీ రఘునాథ ఆలయం (ఖిల్లా రాంమందిర్)లో జరిగే సీతారాముల కళ్యాణోత్సవంలో పాల్గొని ప్రత్యేక పూజలు నిర్వహిస్తారు.
-
నియోజకవర్గ ప్రకటన: ఈ సందర్భంగా తాను రాబోయే ఎన్నికల్లో ఏ నియోజకవర్గం నుంచి పోటీ చేయబోతున్నారో కూడా కవిత స్పష్టత ఇచ్చే అవకాశం ఉంది.
పార్టీ పేరు: ‘తెలంగాణ ప్రజా జాగృతి’ (TPJ)
కవిత స్థాపించబోయే పార్టీ పేరు ‘తెలంగాణ ప్రజా జాగృతి’ (TPJ) అని దాదాపు ఖరారైంది. ఈ పేరుతో పార్టీ రిజిస్ట్రేషన్ కోసం ఆమె ఇప్పటికే కేంద్ర ఎన్నికల సంఘానికి దరఖాస్తు చేసుకున్నారు. అయితే, రిజిస్ట్రేషన్ ప్రక్రియలో ఆలస్యం జరుగుతుండటంతో ఆమె ఢిల్లీ హైకోర్టును కూడా ఆశ్రయించారు. తన పార్టీ రిజిస్ట్రేషన్ ప్రక్రియను వేగవంతం చేసేలా ఎన్నికల సంఘాన్ని ఆదేశించాలని కోరుతూ దాఖలు చేసిన పిటిషన్ ద్వారా పార్టీ పేరు ‘తెలంగాణ ప్రజా జాగృతి’ అని స్పష్టమైంది.
రాజకీయ వ్యూహం ఏమిటి?
బీఆర్ఎస్ (BRS) పార్టీలో కీలక నేతగా ఉన్న కవిత, ఇప్పుడు సొంతంగా పార్టీ పెడుతుండటం రాష్ట్ర రాజకీయాల్లో చర్చనీయాంశమైంది. తెలంగాణ అస్తిత్వం, సంస్కృతిని కాపాడుతూనే, ప్రజల పక్షాన పోరాడటమే ఈ పార్టీ ప్రధాన ఉద్దేశమని ఆమె అనుచరులు చెబుతున్నారు. నిజామాబాద్ కేంద్రంగా ఆమె తన రాజకీయ ప్రస్థానాన్ని మళ్ళీ బలంగా ప్రారంభించాలని భావిస్తున్నారు. ఈ పార్టీ ప్రకటనతో తెలంగాణలో రాజకీయ సమీకరణాలు ఎలా మారతాయో వేచి చూడాలి.