Pawan Kalyan: ఆంధ్రప్రదేశ్ పారిశ్రామిక అభివృద్ధిలో చారిత్రాత్మక ఘట్టం ఆవిష్కృతమైంది. అనకాపల్లి జిల్లా రాజయ్యపేటలో సోమవారం జరిగిన ఆర్సెల్లార్ మిట్టల్ స్టీల్ ప్లాంట్ భూమిపూజ కార్యక్రమంలో ఉపముఖ్యమంత్రి పవన్ కళ్యాణ్ పాల్గొన్నారు. ముఖ్యమంత్రి చంద్రబాబు నాయుడు, కేంద్రమంత్రి కుమారస్వామి మరియు ఆర్సెల్లార్ మిట్టల్ అధినేత లక్ష్మీ మిట్టల్తో కలిసి ఆయన ఈ మెగా ప్రాజెక్టుకు శంకుస్థాపన చేశారు. ఈ సందర్భంగా పవన్ కళ్యాణ్ మాట్లాడుతూ.. రాష్ట్ర భవిష్యత్తును మార్చే ఇంతటి భారీ పరిశ్రమకు పునాది వేయడం సంతోషంగా ఉందన్నారు.
చంద్రబాబు నాయకత్వానికే సాధ్యం
రాష్ట్రానికి పెట్టుబడులు రావాలంటే దార్శనికత కలిగిన నాయకుడు ఉండాలని తాను ఎన్నికల సమయంలోనే చెప్పానని పవన్ గుర్తు చేశారు. లక్ష్మీ మిట్టల్ వంటి అంతర్జాతీయ స్థాయి పారిశ్రామికవేత్తను ఒప్పించి, ఏపీకి తీసుకురావడం కేవలం రాజకీయ ధురంధరుడైన చంద్రబాబు వల్లే సాధ్యమైంది. ఏపీకి పెట్టుబడులు వస్తున్నాయంటే దానికి కారణం చంద్రబాబు అని కేంద్ర హోంమంత్రి అమిత్ షా కూడా గతంలోనే చెప్పారు” అని పవన్ కొనియాడారు. రాజధాని అమరావతి నిర్మాణం మరియు పారిశ్రామికాభివృద్ధిలో సీఎం అనుభవం రాష్ట్రానికి ఎంతో అవసరమని ఆయన పేర్కొన్నారు.
ఉత్తరాంధ్ర దిశానిర్దేశం మార్చే ప్రాజెక్టు
గతంలో అనంతపురం జిల్లాలో కియా (KIA) పరిశ్రమ రావడం వల్ల ఆ ప్రాంత రూపురేఖలే మారిపోయాయని, ఇప్పుడు ఈ స్టీల్ ప్లాంట్ ద్వారా ఉత్తరాంధ్ర దశ తిరగబోతోందని పవన్ కళ్యాణ్ ధీమా వ్యక్తం చేశారు.
-
ఉద్యోగ అవకాశాలు: ఈ ప్లాంట్ ద్వారా ప్రత్యక్షంగా మరియు పరోక్షంగా లక్ష మందికి ఉపాధి లభిస్తుందని, ఇందులో మెజారిటీ అవకాశాలు స్థానిక ఉత్తరాంధ్ర యువతకే దక్కుతాయని ఆయన వెల్లడించారు.
-
అత్యాధునిక సాంకేతికత: ఇది దేశంలోనే అతిపెద్ద ‘ఇంటిగ్రేటెడ్ గ్రీన్ ఫీల్డ్ స్టీల్ ప్లాంట్’ అని, అత్యాధునిక సాంకేతికతతో కాలుష్యం లేకుండా దీనిని నిర్మించబోతున్నారని తెలిపారు.
పెట్టుబడిదారుల్లో పెరిగిన విశ్వాసం
ఆర్సెలార్ మిట్టల్ వంటి దిగ్గజ సంస్థ ఏపీలో రూ.1.36 లక్షల కోట్లు పెట్టుబడి పెట్టడం చూస్తుంటే, ఇతర కంపెనీల్లో కూడా రాష్ట్రం పట్ల నమ్మకం పెరిగిందని పవన్ అన్నారు. రాష్ట్ర ప్రభుత్వం పారిశ్రామికవేత్తలకు పూర్తి సహకారం అందిస్తుందని, యువతకు ఉద్యోగాలే లక్ష్యంగా కూటమి ప్రభుత్వం పనిచేస్తుందని ఆయన స్పష్టం చేశారు.