70th Filmfare Awards 2026: దక్షిణాది సినీ పరిశ్రమలో అత్యంత ప్రతిష్టాత్మకమైన 70వ సౌత్ ఫిల్మ్ఫేర్ అవార్డ్స్ 2026 వేడుకకు ముహూర్తం ఖరారైంది. చిత్రపరిశ్రమలో ఉత్తమ ప్రతిభ కనబరిచిన నటీనటులు, సాంకేతిక నిపుణులను గౌరవించే ఈ వేడుకను ఈ నెల ఫిబ్రవరి 21న కేరళలోని కొచ్చి వేదికగా నిర్వహించనున్నారు. తాజాగా విడుదలైన నామినేషన్ల జాబితాను పరిశీలిస్తే, 2024 సంవత్సరంలో విడుదలైన తెలుగు చిత్రాలు ఇతర భాషలకు గట్టి పోటీనిస్తూ మునుపెన్నడూ లేని విధంగా సత్తా చాటాయి.
టాలీవుడ్ బాక్సాఫీస్ హిట్స్ వర్సెస్ క్లాసిక్స్
గత ఏడాది తెలుగు చిత్ర పరిశ్రమకు ఒక స్వర్ణయుగం అని చెప్పవచ్చు. ఒకవైపు భారీ బడ్జెట్ పాన్ ఇండియా చిత్రాలు, మరోవైపు బలమైన కంటెంట్ ఉన్న చిన్న సినిమాలు బాక్సాఫీస్ను షేక్ చేశాయి. ఈ ప్రభావం ఫిల్మ్ఫేర్ నామినేషన్లలో స్పష్టంగా కనిపిస్తోంది. ముఖ్యంగా పుష్ప 2: ది రూల్, కల్కి 2898 ఏడీ, మరియు హనుమాన్ వంటి భారీ చిత్రాలతో పాటు 35 చిన్న కథ కాదు, లక్కీ భాస్కర్ వంటి వైవిధ్యమైన సినిమాలు వివిధ విభాగాల్లో పోటీ పడుతున్నాయి.
నామినేషన్ల హోరాహోరీ.. ఎవరు ఏ విభాగంలో?
ఉత్తమ చిత్రం & దర్శకత్వం: ఉత్తమ చిత్రాల రేసులో మాస్ మసాలా నుండి సోషియో ఫాంటసీ వరకు అన్నీ పోటీపడుతున్నాయి. కల్కి 2898 ఏడీ, హనుమాన్, పుష్ప 2, కమిటీ కుర్రోళ్లు వంటి చిత్రాలు ఈ జాబితాలో నిలిచాయి. దర్శకుల విభాగంలో నాగ్ అశ్విన్, సుకుమార్, ప్రశాంత్ వర్మ మరియు వెంకీ అట్లూరి తమ మేకింగ్ స్టైల్తో నామినేట్ అయ్యారు.
ఉత్తమ నటుడు & నటి: ఉత్తమ నటుడి విభాగంలో పోటీ చాలా తీవ్రంగా ఉంది. ఐకాన్ స్టార్ అల్లు అర్జున్ (పుష్ప 2), జూనియర్ ఎన్టీఆర్ (దేవర), మరియు నాని (సరిపోదా శనివారం) వంటి స్టార్ హీరోలు తలపడుతున్నారు. వీరితో పాటు దుల్కర్ సల్మాన్, సిద్ధూ జొన్నలగడ్డ కూడా రేసులో ఉన్నారు. నటీమణుల విభాగంలో నివేదా థామస్ (35 చిన్న కథ కాదు), రష్మిక మందన్న (పుష్ప 2), అనుపమ పరమేశ్వరన్ మరియు ప్రియాంక మోహన్ మధ్య గట్టి పోటీ నెలకొంది.
ప్రత్యేక ఆకర్షణగా సపోర్టింగ్ రోల్స్: ఈసారి నామినేషన్లలో లెజెండరీ నటుడు అమితాబ్ బచ్చన్ (కల్కి 2898 ఏడీ) ఉత్తమ సహాయ నటుడి విభాగంలో నిలవడం విశేషం. ఫహద్ ఫాజిల్ (పుష్ప 2), ఎస్జే సూర్య (సరిపోదా శనివారం) మరియు సత్య (మత్తు వదలరా 2) కూడా ఈ రేసులో ఉండటంతో ఫలితంపై ఆసక్తి పెరిగింది.
దక్షిణాది సినిమాల సత్తా
దక్షిణాదిలోని నాలుగు భాషల చిత్రాలకు ఒకే వేదికపై అవార్డులు అందించడం ఫిల్మ్ఫేర్ ప్రత్యేకత. తెలుగు చిత్రాలతో పాటు మలయాళం నుండి ఆడుజీవితం, మంజుమ్మెల్ బాయ్స్ వంటి చిత్రాలు జాతీయ స్థాయిలో గుర్తింపు పొంది ఇక్కడ పోటీ పడుతున్నాయి. ఈ వేడుక కేవలం విజేతలను ప్రకటించడమే కాకుండా, సౌత్ సినిమా సత్తాను ప్రపంచానికి చాటిచెప్పే గొప్ప సంబరంగా మారనుంది. మరి ఫిబ్రవరి 21న ఆ ‘నల్ల సుందరి’ని ముద్దాడే అదృష్టం ఎవరికి దక్కుతుందో చూడాలి!