Medchal: సమాజంలో గురువును దైవంతో సమానంగా చూస్తాం. కానీ, కొందరు చేస్తున్న పనులు ఆ పవిత్రమైన బంధానికే మచ్చ తెస్తున్నాయి. మేడ్చల్-మల్కాజ్గిరి జిల్లాలో అచ్చం ఇలాంటి ఘటనే ఒకటి వెలుగులోకి వచ్చింది. విద్యాబుద్ధులు నేర్పించి విద్యార్థులను ప్రయోజకులను చేయాల్సిన ఒక టీచర్, తన వద్దే చదువుకుంటున్న మైనర్ బాలికను ప్రేమ పేరుతో వంచించి, రహస్యంగా పెళ్లి చేసుకున్నాడు. ఈ దారుణం ఆలస్యంగా వెలుగులోకి రావడంతో పోలీసులు సదరు టీచర్పై పోక్సో (POCSO) కేసు నమోదు చేశారు.
అసలు ఏం జరిగింది?
పోచారం డివిజన్లోని ఒక ప్రైవేట్ పాఠశాలలో పర్రే మైటీన్ (27) అనే వ్యక్తి ఫిజిక్స్ టీచర్గా పని చేస్తున్నాడు. అదే స్కూల్లో పదో తరగతి చదువుతున్న ఒక విద్యార్థినిపై అతను కన్నేశాడు. ఆమె అమాయకత్వాన్ని ఆసరాగా చేసుకుని, మాయమాటలతో ప్రేమలోకి దింపాడు. అంతటితో ఆగకుండా, ఎవరికీ తెలియకుండా ఆ మైనర్ బాలికను పెళ్లి కూడా చేసుకున్నాడు. కొన్ని రోజుల పాటు ఈ విషయాన్ని అత్యంత రహస్యంగా ఉంచినప్పటికీ, నిజం ఎంతో కాలం దాగలేదు.
నిజం బయటపడిందిలా..
సుమారు 20 రోజుల క్రితం, సదరు బాలిక మెడలో పసుపు తాడు (తాళి) ఉండటాన్ని ఆమె తల్లి గమనించింది. అనుమానం వచ్చి నిలదీయడంతో, ఆ బాలిక తన టీచర్తో జరిగిన పెళ్లి విషయం బయటపెట్టింది. షాక్కు గురైన కుటుంబ సభ్యులు వెంటనే పాఠశాల యాజమాన్యాన్ని సంప్రదించారు. అయితే, స్కూల్ నిర్వాహకులు బాధ్యతాయుతంగా వ్యవహరించాల్సింది పోయి, నిర్లక్ష్యంగా సమాధానాలు చెప్పడంతో బాధితురాలి తల్లిదండ్రులు పోలీసులను ఆశ్రయించారు.
పోలీసుల యాక్షన్.. ప్రశ్నార్థకమైన విద్యావ్యవస్థ
బాధితుల ఫిర్యాదు మేరకు పోలీసులు నిందితుడైన టీచర్ పర్రే మైటీన్పై పోక్సో చట్టం కింద కేసు నమోదు చేసి రిమాండ్కు తరలించారు. ఈ ఘటన విద్యా వ్యవస్థలో భద్రతపై అనేక ప్రశ్నలను లేవనెత్తుతోంది.
- చట్టాల పట్ల అవగాహన ఉండాల్సిన టీచర్లు ఇలాంటి నేరాలకు పాల్పడటం దేనికి సంకేతం?
- జైలుకు వెళ్లినా బెయిల్ మీద బయటకు రావచ్చనే ధీమానా?
- ఇలాంటి వారు సమాజంలో తిరుగుతుంటే విద్యార్థుల భవిష్యత్తు ఏమవ్వాలి?
గురువులే ఇలాంటి పనులకు పాల్పడితే, విద్యార్థులు ఎవరిని ఆదర్శంగా తీసుకోవాలనే ఆందోళన సర్వత్రా వ్యక్తమవుతోంది. బాధ్యతారాహిత్యంగా వ్యవహరించిన స్కూల్ యాజమాన్యంపై కూడా కఠిన చర్యలు తీసుకోవాలని స్థానికులు డిమాండ్ చేస్తున్నారు.