Ramchander Rao: తెలంగాణలో కాంగ్రెస్ పార్టీ అధికారంలోకి వచ్చి రెండేళ్లు పూర్తవుతున్నా, ఎన్నికల సమయంలో ఇచ్చిన ఏ ఒక్క వాగ్దానాన్ని కూడా సరిగ్గా అమలు చేయలేదని భాజపా రాష్ట్ర అధ్యక్షుడు రామచందర్ రావు తీవ్రస్థాయిలో విమర్శించారు. కాంగ్రెస్ ప్రభుత్వం ప్రజలను మోసపూరిత వాగ్దానాలతో నమ్మించి ఓట్లు పొందిందని, కానీ క్షేత్రస్థాయిలో ప్రజలకు మేలు జరిగింది ఏమీ లేదని ఆయన మండిపడ్డారు. ఈ మేరకు ప్రభుత్వం వైఫల్యాలను ఎండగడుతూ ఒక ‘ఛార్జ్షీట్’ను కూడా విడుదల చేశారు.
ముఖ్యంగా నిరుద్యోగులు, విద్యార్థులు మరియు ప్రభుత్వ ఉద్యోగుల సమస్యలపై రామచందర్ రావు ప్రభుత్వాన్ని నిలదీశారు. నిరుద్యోగులకు ఇస్తామన్న రూ. 4,000 భృతి ఏమైందని, అలాగే విద్యార్థులకు అందాల్సిన ఫీజు రీయింబర్స్మెంట్ ఎందుకు ఆగిపోయిందని ఆయన ప్రశ్నించారు. ప్రభుత్వ ఉద్యోగులకు కనీసం సకాలంలో జీతాలు కూడా ఇవ్వలేని స్థితిలో రాష్ట్ర ప్రభుత్వం ఉందని ఆయన ఆవేదన వ్యక్తం చేశారు. విద్యా, వైద్య రంగాలను ఈ ప్రభుత్వం పూర్తిగా గాలికొదిలేసిందని విమర్శించారు.
స్థానిక సంస్థల ఎన్నికల నిర్వహణపై స్పందిస్తూ, కేవలం కేంద్ర ప్రభుత్వం నుంచి వచ్చే నిధులను పొందేందుకే మున్సిపల్ ఎన్నికలు నిర్వహించాలని చూస్తున్నారని ఆయన ఆరోపించారు. రాష్ట్ర ప్రభుత్వ పథకాలు ప్రజలకు చేరడం లేదని, కానీ కేంద్రం అందిస్తున్న పథకాలు మాత్రం నేరుగా లబ్ధిదారుల ఖాతాల్లోకి చేరుతున్నాయని ఈ సందర్భంగా గుర్తు చేశారు. రాబోయే రోజుల్లో కాంగ్రెస్ వైఫల్యాలను ప్రజల్లోకి బలంగా తీసుకెళ్తామని ఆయన స్పష్టం చేశారు.