Mamata Banerjee: మహారాష్ట్ర రాజకీయాల్లో పెను సంచలనం రేపిన ఉప ముఖ్యమంత్రి అజిత్ పవార్ విమాన ప్రమాద ఘటనపై పశ్చిమ బెంగాల్ ముఖ్యమంత్రి మమతా బెనర్జీ తీవ్రంగా స్పందించారు. బుధవారం ఉదయం బారామతిలో జరిగిన ఈ ఘోర ప్రమాదంలో అజిత్ పవార్తో పాటు మరో ఐదుగురు ప్రాణాలు కోల్పోవడం దేశవ్యాప్తంగా దిగ్భ్రాంతిని కలిగించింది. ఈ నేపథ్యంలో, ఈ ప్రమాదం వెనుక ఏదైనా కుట్ర దాగి ఉందేమో అన్న అనుమానాలను మమతా బెనర్జీ వ్యక్తం చేశారు.
ఈ ఘటనపై నిష్పక్షపాతంగా, పారదర్శకంగా దర్యాప్తు జరగాలని ఆమె డిమాండ్ చేశారు. ముఖ్యంగా ప్రస్తుత దర్యాప్తు సంస్థలపై నమ్మకం లేదని పేర్కొంటూ, సుప్రీంకోర్టు పర్యవేక్షణలో ఉన్నత స్థాయి విచారణ జరపాలని కోరారు. రాజకీయ నాయకుల భద్రతపై ఈ ప్రమాదం అనేక ప్రశ్నలను లేవనెత్తుతోందని ఆమె ఆందోళన వ్యక్తం చేశారు. అజిత్ పవార్ ఇటీవల బీజేపీ నేతృత్వంలోని మహాయుతి కూటమిని వీడి, తిరిగి తన బాబాయ్ శరద్ పవార్ చెంతకు చేరాలని భావిస్తున్నట్లు వార్తలు వస్తున్న తరుణంలో ఈ ప్రమాదం జరగడం అనేక అనుమానాలకు తావిస్తోందని ఆమె వ్యాఖ్యానించారు.
Also Read: Nara Lokesh: తిరుమల లడ్డూ వివాదం.. జగన్పై మంత్రి లోకేష్ ఫైర్!
జనవరి 28వ తేదీన బారామతిలో ఎన్నికల ప్రచారానికి వెళ్తుండగా ఉదయం 8:48 గంటలకు ఈ ప్రమాదం చోటుచేసుకుంది. ఈ విషాదకర ఘటనపై ఆర్జేడీ అధినేత లాలూ ప్రసాద్ యాదవ్, కాంగ్రెస్ ఎంపీ గౌరవ్ గొగోయ్ వంటి ప్రముఖ నేతలు కూడా సంతాపం వ్యక్తం చేస్తూ, దీనిపై సమగ్ర విచారణ జరపాలని కేంద్రాన్ని కోరారు. బీజేపీని వ్యతిరేకించే నాయకుల రక్షణ విషయంలో రాజీ పడకూడదని, వాస్తవాలను ప్రజల ముందుకు తీసుకురావాలని మమతా బెనర్జీ నొక్కి చెప్పారు. అజిత్ పవార్ మృతి ఆయన కుటుంబానికే కాకుండా మహారాష్ట్ర రాజకీయాలకు తీరని లోటని పేర్కొంటూ, శరద్ పవార్ కుటుంబ సభ్యులకు ఆమె తన ప్రగాఢ సానుభూతిని తెలియజేశారు.