Karnataka: కర్ణాటకలో బైక్ టాక్సీల నిర్వహణపై గత కొంతకాలంగా కొనసాగుతున్న ఉత్కంఠకు తెరదించుతూ రాష్ట్ర హైకోర్టు శుక్రవారం అత్యంత కీలకమైన తీర్పును వెలువరించింది. రాష్ట్ర ప్రభుత్వం గతంలో విధించిన నిషేధాన్ని పూర్తిగా ఎత్తివేస్తూ, ద్విచక్ర వాహనాలను కూడా రవాణా వాహనాలుగా వినియోగించుకోవచ్చని న్యాయస్థానం స్పష్టం చేసింది. చీఫ్ జస్టిస్ విభు బఖ్రూ, జస్టిస్ సీఎం జోషితో కూడిన డివిజన్ బెంచ్ ఈ మేరకు ఉత్తర్వులు జారీ చేస్తూ, ఏప్రిల్ 2025లో సింగిల్ బెంచ్ ఇచ్చిన నిషేధ ఆదేశాలను రద్దు చేసింది. కేవలం మోటార్ సైకిల్ అనే కారణంతో టాక్సీగా రిజిస్ట్రేషన్ చేయడాన్ని తిరస్కరించడం సరికాదని, చట్టబద్ధంగా వీటికి పర్మిట్లు మంజూరు చేయాలని ధర్మాసనం ప్రభుత్వానికి దిశానిర్దేశం చేసింది.
ఈ తీర్పుతో ఓలా, ఉబర్, రాపిడో వంటి అగ్రిగేటర్ సంస్థలతో పాటు రాష్ట్రవ్యాప్తంగా సుమారు 6 లక్షల మంది బైక్ టాక్సీ ఆపరేటర్లకు పెద్ద ఊరట లభించింది. భద్రతా పరమైన కారణాలు, ఆటో డ్రైవర్ల జీవనోపాధి దెబ్బతింటుందనే వాదనలతో ప్రభుత్వం గతంలో ఈ సేవలను నిలిపివేసింది. అయితే, మారుతున్న కాలంలో బైక్ టాక్సీలు సామాన్యులకు తక్కువ ఖర్చుతో కూడిన ప్రయాణ సాధనాలని, అందరికీ జీవనోపాధి పొందే హక్కు ఉందని కోర్టు అభిప్రాయపడింది. బైక్ టాక్సీలను ఇకపై వాణిజ్య వాహనాలుగా పరిగణించనుండటంతో, వాహన యజమానులు, అగ్రిగేటర్ సంస్థలు లైసెన్సుల కోసం కొత్తగా దరఖాస్తు చేసుకోవాలని కోర్టు సూచించింది.
Also Read: Iran: కమ్ముకున్న యుద్ధ మేఘాలు.. ఇరాన్ వైపు అమెరికా సైనికదళాలు
ప్రభుత్వం ఈ సేవలను నియంత్రించే క్రమంలో భద్రతా నిబంధనలు, షరతులను విధించే అధికారాన్ని న్యాయస్థానం కల్పించింది. మోటార్ వాహనాల చట్టం ప్రకారం అవసరమైన జాగ్రత్తలు తీసుకుంటూనే ఈ వ్యవస్థను క్రమబద్ధీకరించాలని కోర్టు తెలిపింది. గతంలో ఈ నిషేధం వల్ల లక్షలాది మంది డ్రైవర్లు ఉపాధి కోల్పోయారని, ఇప్పుడు వారి కుటుంబాలకు మళ్లీ భరోసా లభించిందని సామాజిక వర్గాలు భావిస్తున్నాయి. అగ్రిగేటర్ సంస్థలు సైతం ఈ నిర్ణయాన్ని స్వాగతిస్తూ, కోర్టు సూచనల మేరకు అనుమతులు పొందేందుకు సిద్ధమవుతున్నాయి.
హైకోర్టు వెలువరించిన ఈ సంచలన తీర్పుపై కర్ణాటక రవాణా శాఖ మంత్రి రామలింగారెడ్డి స్పందిస్తూ, న్యాయస్థానం ఇచ్చిన ఆదేశాలను క్షుణ్ణంగా పరిశీలిస్తామని తెలిపారు. ఉన్నతాధికారులతో చర్చించిన అనంతరం కొత్త విధానంపై తుది నిర్ణయం తీసుకుంటామని ఆయన పేర్కొన్నారు. బైక్ టాక్సీల పునఃప్రారంభం వల్ల ట్రాఫిక్ సమస్యలు తగ్గడమే కాకుండా, పట్టణ ప్రాంతాల్లో ప్రజలకు ప్రయాణ సౌలభ్యం మెరుగుపడే అవకాశం ఉంది.