Army vehicle: జమ్మూకశ్మీర్లోని దోడా జిల్లాలో ఒక విషాదకర సంఘటన చోటుచేసుకుంది. భారత సైన్యానికి చెందిన ఒక వాహనం ప్రమాదవశాత్తు లోయలో పడిపోయింది. ఈ భయంకరమైన ప్రమాదంలో 10 మంది ఆర్మీ జవాన్లు అక్కడికక్కడే ప్రాణాలు కోల్పోయారు. మరికొంతమంది తీవ్రంగా గాయపడ్డారు. ఈ ఘటన భదేర్వాహ్-చంబా రహదారిలోని ఖన్నీ అనే కొండ ప్రాంతంలో జరిగింది.
ప్రమాదం జరిగిన సమయంలో ఆ బుల్లెట్ ప్రూఫ్ వాహనంలో మొత్తం 17 మంది సిబ్బంది ఉన్నట్లు అధికారులు గుర్తించారు. ప్రయాణిస్తున్న సమయంలో వాహనం అదుపుతప్పి పక్కనే ఉన్న లోతైన లోయలోకి దూసుకెళ్లింది. సమాచారం అందుకున్న వెంటనే ఆర్మీ బలగాలు మరియు స్థానిక పోలీసులు రంగంలోకి దిగి సహాయక చర్యలు చేపట్టారు. గాయపడిన వారిని మెరుగైన చికిత్స కోసం ఉధంపుర్లోని మిలిటరీ ఆసుపత్రికి తరలించారు.
ప్రస్తుతం అక్కడ సహాయక చర్యలు కొనసాగుతున్నాయి. దేశ రక్షణ కోసం వెళ్తున్న జవాన్లు ఇలా ప్రమాదానికి గురికావడం అందరినీ కలచివేస్తోంది. మరణించిన జవాన్ల కుటుంబాల్లో ఈ వార్త తీవ్ర విషాదాన్ని నింపింది. ఈ ఘటనకు సంబంధించి పూర్తి వివరాలు తెలియాల్సి ఉంది.