YS Jagan: వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డి తాజాగా జరిగిన ప్రెస్ మీట్లో ప్రస్తుత కూటమి ప్రభుత్వంపై, ముఖ్యంగా సీఎం చంద్రబాబు నాయుడుపై తీవ్ర స్థాయిలో విరుచుకుపడ్డారు. గత వైసీపీ ప్రభుత్వ హయాంలో తాము ఎంతో ప్రతిష్టాత్మకంగా చేపట్టిన భూముల రీ-సర్వే ఘనతను చంద్రబాబు తన ఖాతాలో వేసుకోవాలని చూడటం సరికాదని ఆయన మండిపడ్డారు. సుమారు 80 ఏళ్ల వయసున్న చంద్రబాబు, తన సుదీర్ఘ రాజకీయ జీవితంలో ఎప్పుడైనా ఇలాంటి సాహసోపేతమైన భూ సర్వే కార్యక్రమాన్ని తలపెట్టారా అని జగన్ ప్రశ్నించారు.
రీ-సర్వే ప్రక్రియ కేవలం మాటలతో ముగిసింది కాదని, దీని వెనుక అత్యాధునిక సాంకేతిక పరిజ్ఞానం ఉందని జగన్ వివరించారు. భూములను కచ్చితంగా కొలవడానికి హెలికాప్టర్లు, డ్రోన్లు మరియు 3,640 అత్యాధునిక జీఎన్ఎస్ఎస్ పరికరాలను వాడినట్లు తెలిపారు. దాదాపు 40 వేల మంది సిబ్బందికి ప్రత్యేక శిక్షణ ఇచ్చి, కేవలం 5 సెంటీమీటర్ల తేడా కూడా లేకుండా భూములను కొలిచామని ఆయన గుర్తు చేశారు. వివాదాల పరిష్కారం కోసం ప్రతి మండలంలో మొబైల్ మెజిస్ట్రేట్లను నియమించి, రైతులకు మేలు చేకూర్చామన్నారు.
ఈ సర్వే ప్రక్రియ అంతా కేంద్ర ప్రభుత్వ సంస్థ అయిన ‘సర్వే ఆఫ్ ఇండియా’తో ఒప్పందం కుదుర్చుకుని పారదర్శకంగా నిర్వహించామని జగన్ స్పష్టం చేశారు. మన రాష్ట్రంలో జరిగిన ఈ భూ సర్వే విధానాన్ని చూసి నీతి ఆయోగ్ తో పాటు కేరళ, ఉత్తరాఖండ్, మహారాష్ట్ర వంటి రాష్ట్రాలు కూడా మెచ్చుకున్నాయని ఆయన తెలిపారు. ఏపీ ప్రభుత్వం చేసిన ఈ కృషికి కేంద్రం నుంచి ‘ప్లాటినమ్ గ్రేడ్’ గుర్తింపుతో పాటు రూ. 400 కోట్ల రాయితీ కూడా లభించిందని, ఈ ప్రాజెక్టు కోసం తాము రూ. 6 వేల కోట్లు ఖర్చు చేశామని వివరించారు.
ఎన్నికల సమయంలో రీ-సర్వేపై ప్రజలను భయపెట్టి, ఇప్పుడు అదే సర్వేను తమదిగా చెప్పుకోవడం చంద్రబాబు ద్వంద్వ విధానానికి నిదర్శనమని జగన్ విమర్శించారు. వైసీపీ హయాంలో ఇచ్చిన పాస్ పుస్తకాలనే వాడుతూ, కేవలం రంగులు మార్చి తమ ముద్ర వేసుకోవాలని చూడటం హాస్యాస్పదమని అన్నారు. పాతిన సర్వే రాళ్లపై ఉన్న పేర్లను చెరపడానికి కోట్ల రూపాయల ప్రజా ధనాన్ని వృథా చేస్తున్నారని, కొత్తగా ఇస్తున్న పుస్తకాల్లో తప్పులు దొర్లుతున్నాయని ఆరోపించారు. నిజాలను ఎంత తొక్కిపెట్టినా ప్రజలకు అన్నీ తెలుస్తాయని జగన్ ఈ సందర్భంగా హెచ్చరించారు.