Medaram Jatara: మేడారం మహాజాతరకు వెళ్లే భక్తులకు తెలంగాణ ప్రభుత్వం ఒక అద్భుతమైన అవకాశాన్ని కల్పించింది. జాతర రద్దీని తట్టుకుంటూనే, అమ్మవార్లను దర్శించుకోవాలనుకునే వారి కోసం పర్యాటక శాఖ ఆధ్వర్యంలో హెలికాప్టర్ సేవలు ప్రారంభమయ్యాయి. ఈ నెల 31వ తేదీ వరకు భక్తులకు ఈ సేవలు అందుబాటులో ఉంటాయి.
ముఖ్యంగా మేడారం పరిసరాలను ఆకాశం నుండి వీక్షించాలనుకునే వారి కోసం ‘జాయ్ రైడ్స్’ (Joy Rides) ఏర్పాటు చేశారు. మేడారం సమీపంలోని పడిగాపూర్ హెలిప్యాడ్ నుండి ఈ రైడ్ ప్రారంభమవుతుంది. సుమారు 6 నుంచి 7 నిమిషాల పాటు సాగే ఈ విహంగ వీక్షణానికి ఒక్కో వ్యక్తికి రూ. 4,800 ఛార్జీగా నిర్ణయించారు. జాతర వైభవాన్ని ఆకాశం నుండి చూడాలనుకునే భక్తులకు ఇది ఒక ప్రత్యేక అనుభూతిని ఇస్తుంది.
ఇది కూడా చదవండి: Tranfers: 42 మంది మున్సిపల్ కమిషనర్ల బదిలీ.. తక్షణమే విధుల్లో చేరాలని ఆదేశం
మరోవైపు హన్మకొండ నుండి నేరుగా మేడారం చేరుకోవాలనుకునే వారి కోసం కూడా ప్రత్యేక సర్వీసులు ఉన్నాయి. హన్మకొండ ఆర్ట్స్ అండ్ సైన్స్ కాలేజీ గ్రౌండ్స్ నుండి మేడారం వరకు రానుపోను ప్రయాణానికి ఒక్కొక్కరికి రూ. 35,999 ఛార్జీ వసూలు చేస్తారు. ఈ సేవలు ప్రతిరోజూ ఉదయం 8 గంటల నుండి సాయంత్రం 5:30 గంటల వరకు మాత్రమే అందుబాటులో ఉంటాయి.
ఈ హెలికాప్టర్ సేవల ద్వారా భక్తులు ప్రయాణ సమయాన్ని ఆదా చేసుకోవడమే కాకుండా, తాడ్వాయి మరియు ఎలుబాక ప్రాంతాల అందాలను ఏరియల్ వ్యూలో చూసే అవకాశం లభిస్తుంది. టిక్కెట్ల బుకింగ్ మరియు ఇతర వివరాల కోసం భక్తులు 8530004309 లేదా 9676320139 ఫోన్ నంబర్లలో సంప్రదించవచ్చు.