Bus Accident: నంద్యాల జిల్లా శిరివెళ్ల మండలం శిరివెళ్లమెట్ట వద్ద బుధవారం అర్ధరాత్రి దాటిన తర్వాత ఒక భయంకరమైన రోడ్డు ప్రమాదం జరిగింది. నెల్లూరు నుండి హైదరాబాద్ వెళ్తున్న ఏఆర్బీసీవీఆర్ (ARBCVR) ట్రావెల్స్కు చెందిన ప్రైవేటు బస్సు టైరు ఒక్కసారిగా పేలిపోవడంతో ఈ ఘోరం చోటుచేసుకుంది. నియంత్రణ కోల్పోయిన బస్సు డివైడర్ను దాటి అవతలి రోడ్డుపైకి దూసుకెళ్లి, ఎదురుగా వస్తున్న కంటైనర్ లారీని బలంగా ఢీకొట్టింది. ఢీకొన్న వెంటనే మంటలు చెలరేగడంతో రెండు వాహనాలు పూర్తిగా అగ్నికి ఆహుతయ్యాయి.
ఈ ప్రమాదంలో ముగ్గురు వ్యక్తులు సజీవ దహనమయ్యారు. బస్సు డ్రైవర్ ఓబులేసు (కడప నివాసి) తో పాటు లారీ డ్రైవర్ మరియు క్లీనర్ మంటల్లో చిక్కుకుని అక్కడికక్కడే ప్రాణాలు కోల్పోయారు. మంటల తీవ్రత ఎంతలా ఉందంటే వారి మృతదేహాలు గుర్తుపట్టలేని విధంగా కాలిపోయాయి. బస్సులో ఉన్న 36 మంది ప్రయాణికులు తృటిలో ప్రాణాపాయం నుండి బయటపడ్డారు. పది మందికి పైగా గాయపడగా, వారిని నంద్యాల ప్రభుత్వ ఆసుపత్రికి తరలించారు. వీరిలో శ్రీనివాసరెడ్డి, హరీష్, సునీత వంటి హైదరాబాద్ వాసులు కూడా ఉన్నారు.
ఇది కూడా చదవండి: Teena Sravya: మేడారంలో కుక్కకు తులాభారం..నటి టీనా శ్రావ్య క్షమాపణ
ఈ ప్రమాదంలో ప్రయాణికులందరూ క్షేమంగా బయటపడటం వెనుక కొందరు సాహసవీరుల కృషి ఉంది. మంటలు వ్యాపిస్తున్న సమయంలో అటుగా వెళ్తున్న ఒక డీసీఎం డ్రైవర్ మరియు బస్సు క్లీనర్ సురేంద్ర వెంటనే స్పందించారు. బస్సు అద్దాలను పగులగొట్టి ప్రయాణికులు కిటికీల గుండా బయటకు వచ్చేలా చేయడంతో పెను ప్రమాదం తప్పింది. ప్రాణాలతో బయటపడిన ప్రయాణికులు క్లీనర్ సురేంద్రకు కన్నీళ్లతో కృతజ్ఞతలు తెలిపారు. ఎస్పీ సునీల్ షెరాన్ ఆసుపత్రిలో బాధితులను పరామర్శించి, క్లీనర్ సాహసాన్ని అభినందించారు.
ప్రమాద సమయంలో కంటైనర్ లారీలో కొత్త బైక్లను రవాణా చేస్తున్నారు, అవి కూడా మంటల్లో బూడిదయ్యాయి. ప్రయాణికుల లగేజీ మొత్తం కాలిపోయినా, ప్రాణాలతో బయటపడినందుకు వారు ఊపిరి పీల్చుకున్నారు. ఫైర్ ఇంజిన్లు ఘటనా స్థలానికి చేరుకుని మంటలను ఆర్పివేశాయి. ప్రస్తుతం పోలీసులు కేసు నమోదు చేసి దర్యాప్తు చేస్తున్నారు.