AP News: ప్రకాశం జిల్లా గిద్దలూరు పట్టణంలో పట్టపగలే ఒక వ్యక్తి కిడ్నాప్కు గురవ్వడం స్థానికంగా పెద్ద కలకలం రేపింది. రాచర్ల రోడ్డులో వెళ్తున్న బాల అంకయ్య అనే వ్యక్తిని, ఒక మహీంద్రా థార్ వాహనంలో వచ్చిన నలుగురు వ్యక్తులు బలవంతంగా కారులోకి ఎక్కించుకుని తీసుకెళ్లారు. ఈ దృశ్యాన్ని చూసిన స్థానికులు వెంటనే అప్రమత్తమై పోలీసులకు సమాచారం అందించారు. దీంతో పోలీసులు వెంటనే రంగంలోకి దిగి కిడ్నాపర్ల వాహనాన్ని వెంబడించి, కంభం రహదారి వద్ద వారిని అదుపులోకి తీసుకున్నారు.
పోలీసుల ప్రాథమిక విచారణలో ఈ కిడ్నాప్కు డబ్బుల లావాదేవీలే ప్రధాన కారణమని తేలింది. వెల్లుపల్లి గ్రామానికి చెందిన నాగ మోహన్ రావు అనే వ్యక్తికి, బాధితుడు బాల అంకయ్యకు మధ్య గత కొంతకాలంగా ఆర్థిక పరమైన వివాదాలు నడుస్తున్నాయి. బాల అంకయ్య సుమారు 4 లక్షల రూపాయల అప్పు తీసుకున్నారని, అందులో కేవలం ఒక లక్ష రూపాయలు మాత్రమే తిరిగి ఇచ్చారని సమాచారం. ఈ వివాదం ప్రస్తుతం కోర్టులో కూడా నడుస్తోంది.
అయితే, కోర్టులో కేసు ఉండగానే నాగ మోహన్ రావు కుమారుడు మహేష్ మరియు అతని స్నేహితులు కలిసి ఈ కిడ్నాప్కు పాల్పడినట్లు బాధితుడు పోలీసులకు ఫిర్యాదు చేశాడు. కానీ, తాము కిడ్నాప్ చేయలేదని, కేవలం బాకీ ఉన్న డబ్బుల విషయం మాట్లాడటానికే అంకయ్యను తీసుకెళ్లామని నిందితులు చెబుతున్నారు. ఈ విషయంలో పోలీసులు అన్ని కోణాల్లోనూ దర్యాప్తు చేస్తున్నారు.
ప్రస్తుతం నిందితులను, బాధితుడిని పోలీస్ స్టేషన్కు తరలించి వాంగ్మూలాలు సేకరిస్తున్నారు. ఇది నిజంగానే కిడ్నాప్ చేయాలనే ఉద్దేశంతో జరిగిందా? లేదా కేవలం భయపెట్టడానికి ప్రయత్నించారా? అనే విషయాలను పోలీసులు నిశితంగా పరిశీలిస్తున్నారు. పూర్తి విచారణ అనంతరం అసలు నిజానిజాలను వెల్లడిస్తామని అధికారులు తెలిపారు.