Vijayawada highway: సంక్రాంతి పండుగ సెలవులు ప్రారంభమవడంతో యాదాద్రి పంతంగి టోల్ప్లాజా వద్ద భారీ వాహన రద్దీ ఏర్పడింది. నగరాల్లో పనిచేసే వారి బృందాలు కుటుంబాలతో కలిసి సొంత ఊళ్లకు చేరుకునేందుకు బయలుదేరడంతో హైదరాబాద్ నుంచి విజయవాడ దిశగా వాహనాల వరుస కిలోమీటర్ల దూరం వరకూ కొనసాగుతోంది.
పెదకాపర్తి, చిట్యాల పరిసర ప్రాంతాల్లో ట్రాఫిక్ నత్తనడకన కదులుతోంది. భోగి, సంక్రాంతి పండుగల కారణంగా రాబోయే రెండు రోజుల్లో ఈ రద్దీ మరింత పెరిగే అవకాశం ఉందని అధికారులు అంచనా వేస్తున్నారు.
గత నాలుగు రోజుల్లోనే రెండు లక్షలకుపైగా వాహనాలు పంతంగి టోల్గేట్ ద్వారా ప్రయాణించినట్లు అంచనా. టోల్ సిబ్బంది అదనపు లేన్లు తెరిచి వాహనాలను క్లియర్ చేయడానికి ప్రయత్నించినప్పటికీ, ఊళ్లకు చేరాలనే ఆత్రతలో బయలుదేరిన వాహనదారులతో రద్దీ తగ్గడం లేదు.
ప్రయాణికులు ముందుగా బయలుదేరడం, FASTag రీచార్జ్ చేసుకోవడం, అవసరమైతే ప్రత్యామ్నాయ మార్గాలు ఉపయోగించడం మంచిదని సూచిస్తున్నారు.