Crime News: హైదరాబాద్లో ఇటీవల వరుసగా జరుగుతున్న నేరాలు నగరవాసులను ఆందోళనకు గురిచేస్తున్నాయి. తాజాగా బోరబండలో జరిగిన ఓ యువతి హత్య ఘటన స్థానికంగా తీవ్ర కలకలం సృష్టించింది. కేవలం తనతో సరిగ్గా మాట్లాడటం లేదనే చిన్న కారణంతో ఓ యువకుడు ఇంతటి దారుణానికి ఒడిగట్టడం అందరినీ షాక్కు గురిచేసింది.
హత్యకు అసలు కారణం ఏంటి? పోలీసులు తెలిపిన వివరాల ప్రకారం.. మృతురాలు ఖనీజ్ ఫాతిమా, నిందితుడు జహీర్ ఇద్దరూ గతంలో బంజారాహిల్స్లోని ఒక పబ్లో కలిసి పని చేసేవారు. ఆ సమయంలోనే వారిద్దరి మధ్య పరిచయం ఏర్పడి స్నేహంగా మారింది. అయితే, కొద్దిరోజుల క్రితం ఫాతిమా తన ఉద్యోగాన్ని మార్చి ‘ఊర్వశి’ బార్లో చేరింది. కొత్త ఉద్యోగంలో బిజీగా ఉండటం వల్ల జహీర్తో మాట్లాడటం తగ్గించింది. దీన్ని తట్టుకోలేకపోయిన జహీర్, ఆమె తనను నిర్లక్ష్యం చేస్తోందని కక్ష పెంచుకున్నాడు.
పథకం ప్రకారమే ఘాతుకం.. ఆదివారం నాడు మనం మాట్లాడుకుందాం రా అని పిలిచి, ఆమెతో గొడవకు దిగాడు. మాట మాట పెరగడంతో కోపంతో ఊగిపోయిన జహీర్, వెంట తెచ్చుకున్న ఆయుధంతో ఫాతిమాను కిరాతకంగా హత్య చేశాడు. యువతి మరణ వార్త తెలిసిన వెంటనే కుటుంబ సభ్యులు బోరబండ పోలీసులకు ఫిర్యాదు చేశారు.
పోలీసుల అదుపులో నిందితుడు కేసు నమోదు చేసుకున్న పోలీసులు వేగంగా స్పందించి నిందితుడు జహీర్ను అదుపులోకి తీసుకున్నారు. ప్రస్తుతం అతడిని విచారిస్తున్నారు. ఈ హత్య వెనుక ఇంకా ఏవైనా ఇతర కారణాలు ఉన్నాయా అనే కోణంలో పోలీసులు దర్యాప్తు చేస్తున్నారు. నిత్యం రద్దీగా ఉండే బోరబండ ప్రాంతంలో ఇలాంటి ఘటన జరగడంతో స్థానికులు భయాందోళన వ్యక్తం చేస్తున్నారు.