Road Accident: రంగారెడ్డి జిల్లా మోకిల ప్రాంతంలో గురువారం తెల్లవారుజామున ఒక భయంకరమైన రోడ్డు ప్రమాదం జరిగింది. అతి వేగంగా వెళ్తున్న ఒక కారు మీర్జాగూడ సమీపంలో రోడ్డు పక్కన ఉన్న చెట్టును బలంగా ఢీకొట్టింది. ఈ ప్రమాద ధాటికి కారు పూర్తిగా నుజ్జునుజ్జు అయిపోయింది. కారులో ప్రయాణిస్తున్న ఐదుగురిలో నలుగురు విద్యార్థులు అక్కడికక్కడే ప్రాణాలు కోల్పోవడం స్థానికంగా తీవ్ర విషాదాన్ని నింపింది.
ఈ ప్రమాదంలో మరణించిన వారిని సూర్యతేజ, సుమిత్, శ్రీనిఖిల్ మరియు రోహిత్గా పోలీసులు గుర్తించారు. వీరిలో ముగ్గురు ఐసీఎఫ్ఏఐ (ICFAI) యూనివర్సిటీలో చదువుతుండగా, ఒకరు ఎంజీఐటీ (MGIT) కళాశాలకు చెందిన విద్యార్థి. వీరంతా తమ చదువుల కోసం హైదరాబాద్లో ఉంటూ, మోకిల ప్రాంతం నుండి తిరిగి వస్తుండగా ఈ ప్రమాదం సంభవించింది.
ప్రమాదం జరిగిన సమయంలో కారులో ఉన్న నక్షత్ర అనే విద్యార్థిని తీవ్ర గాయాలతో బయటపడింది. సమాచారం అందుకున్న వెంటనే పోలీసులు ఘటనా స్థలానికి చేరుకుని, ఆమెను అత్యవసర చికిత్స కోసం దగ్గరలోని ఆసుపత్రికి తరలించారు. ప్రస్తుతం ఆమె పరిస్థితి విషమంగా ఉన్నట్లు సమాచారం. అతి వేగమే ఈ ప్రమాదానికి ప్రధాన కారణమని ప్రాథమికంగా భావిస్తున్నారు. పోలీసులు కేసు నమోదు చేసుకుని పూర్తి స్థాయిలో విచారణ జరుపుతున్నారు.