Wipro: కొత్త ఏడాది 2026ను ఐటీ దిగ్గజం విప్రో తన ఉద్యోగులకు గట్టి నిబంధనలతో ప్రారంభించింది. ఇప్పటివరకు హైబ్రిడ్ పని విధానంలో కొంత వెసులుబాటు కల్పించిన సంస్థ, జనవరి 1 నుండి నిబంధనలను మరింత కఠినతరం చేస్తూ కీలక ఉత్తర్వులు జారీ చేసింది. కేవలం ఆఫీస్కు వస్తే సరిపోదని, అక్కడ గడిపే సమయంపై కూడా స్పష్టమైన కాలపరిమితిని విధిస్తూ హెచ్ఆర్ విభాగం ఉద్యోగులకు ఈమెయిల్స్ పంపింది.
6 గంటల నిబంధన.. ఏమాత్రం తగ్గినా సగం రోజు సెలవే!
విప్రో నూతన పాలసీ ప్రకారం, ఉద్యోగులు ఆఫీస్కు రావాల్సిన మూడు రోజుల్లో కనీసం 6 గంటల సమయాన్ని క్యాంపస్లోనే గడపాలి. మీ ‘ఇన్’ మరియు ‘అవుట్’ పంచ్ల మధ్య ఈ ఆరు గంటల వ్యవధి తప్పనిసరి. ఒకవేళ ఎవరైనా ఆరు గంటల కంటే తక్కువ సమయం ఆఫీస్లో ఉంటే, ఆ రోజును ‘హాఫ్ డే లీవ్’ (సగం రోజు సెలవు) గా పరిగణించి వారి లీవ్ బ్యాలెన్స్ నుండి కట్ చేస్తారు. అయితే, కంపెనీ పని గంటల్లో ఎలాంటి తగ్గింపు లేదు. మొత్తం 9.5 గంటల పని దినంలో 6 గంటలు ఆఫీస్లో పూర్తి చేసి, మిగిలిన సమయాన్ని ఇంటి నుండి పని చేస్తూ కేటాయించిన పనులను పూర్తి చేయాల్సి ఉంటుంది.
ఇది కూడా చదవండి: Viral News: ఏంట్రా బాబు ఇది.. దొంగతనం చేయడానికి వచ్చి.. ఎగ్జాస్ట్ ఫ్యాన్ లో ఇరుక్కుపోయాడు..
తగ్గిన రిమోట్ వర్క్ వెసులుబాటు
గతంలో విప్రో తన ఉద్యోగులకు ఏడాదికి 30 రోజుల వరకు అదనపు రిమోట్ వర్క్ సౌకర్యాన్ని కల్పించేది. ఇందులో 15 రోజులు సొంత అనారోగ్యం కోసం, మరో 15 రోజులు కుటుంబ సభ్యుల సంరక్షణ కోసం కేటాయించేవారు. కానీ, కొత్త నిబంధనల ప్రకారం ఈ సౌలభ్యాన్ని కూడా తగ్గించారు. ఇకపై ప్రత్యేక పరిస్థితుల్లో అందుబాటులో ఉండే రిమోట్ వర్క్ డేస్ సంఖ్యను 15 నుండి 12 రోజులకు కుదించారు. దీనివల్ల ఉద్యోగులు ఆఫీస్ వాతావరణానికి మరింతగా అలవాటు పడాలని సంస్థ భావిస్తోంది.
ఎందుకు ఈ మార్పు?
జట్లలో స్థిరత్వాన్ని పెంచడం, ఉద్యోగుల మధ్య ప్రత్యక్ష సహకారాన్ని (Collaboration) పెంపొందించడం ఈ నిర్ణయం వెనుక ఉన్న ప్రధాన ఉద్దేశమని విప్రో పేర్కొంది. హైబ్రిడ్ మోడల్ భవిష్యత్తుకు అనువైనదే అయినప్పటికీ, అందులో జవాబుదారీతనం ఉండాలని సంస్థ స్పష్టం చేస్తోంది. 2024 అక్టోబర్లోనే ఈ దిశగా అడుగులు వేసిన విప్రో, ఇప్పుడు 2026 ఆరంభం నుండి దీన్ని క్షేత్రస్థాయిలో పక్కాగా అమలు చేస్తోంది.
కేవలం విప్రో మాత్రమే కాదు, ప్రస్తుతం మెజారిటీ ఐటీ కంపెనీలు తమ ‘వర్క్ ఫ్రమ్ హోమ్’ వెసులుబాటును క్రమంగా తగ్గిస్తూ, ఉద్యోగులను కార్యాలయాలకు రప్పించేందుకు కఠిన నిబంధనలను అమలు చేస్తున్నాయి. విప్రో తీసుకున్న ఈ తాజా నిర్ణయం ఐటీ నిపుణుల్లో ఎలాంటి చర్చకు దారితీస్తుందో చూడాలి.