Maoists: తెలంగాణ రాష్ట్ర పోలీస్ శాఖ చరిత్రలో ఒక కీలక పరిణామం చోటుచేసుకుంది. రాష్ట్ర డీజీపీ శివధర్రెడ్డి సమక్షంలో ఏకంగా 41 మంది మావోయిస్టులు లొంగిపోయారు. ఇందులో కీలక నేతలు ఉండటం విశేషం. కామారెడ్డికి చెందిన రాష్ట్ర కమిటీ కార్యదర్శి ఎర్రగొల్ల రవి, మంచిర్యాలకు చెందిన కనికారపు ప్రభంజన్తో పాటు ఒడిశా, ఛత్తీస్గఢ్ రాష్ట్రాలకు చెందిన ఆరుగురు డివిజన్ కమిటీ సభ్యులు, ఇద్దరు సెంట్రల్ విజన్ కమాండర్లు పోలీసుల ఎదుట లొంగిపోయారు. మిగిలిన వారంతా ఛత్తీస్గఢ్ ప్రాంతానికి చెందిన వారు. వీరంతా తమ వద్ద ఉన్న 24 తుపాకులను పోలీసులకు అప్పగించి, హింసా మార్గాన్ని వీడారు.
ముఖ్యమంత్రి రేవంత్ రెడ్డి ఇటీవల ‘పోలీసు అమరవీరుల దినోత్సవం’ సందర్భంగా ఇచ్చిన పిలుపు ఈ లొంగుబాటుకు ప్రధాన ప్రేరణగా నిలిచింది. 2025 ఏడాదిలో ఇప్పటివరకు మొత్తం 509 మంది మావోయిస్టులు జనజీవన స్రవంతిలో కలిశారు. మావోయిస్టు పార్టీ తమ క్యాడర్ను 2026 మార్చి నాటికి కొత్త ప్రాంతాలకు వెళ్లాలని ఆదేశించడం, తెలియని ప్రాంతాల్లో మనుగడ సాగించడం కష్టం కావడం, నిత్యావసర వస్తువుల కొరత వంటి కారణాలతో వారంతా బయటకు రావాలని నిర్ణయించుకున్నారు. ముఖ్యంగా పెద్ద నాయకులే లొంగిపోతుండటంతో కింది స్థాయి కార్యకర్తల్లో కూడా మార్పు మొదలైందని డీజీపీ వివరించారు.
ప్రభుత్వం వీరికి అండగా నిలుస్తుందని డీజీపీ హామీ ఇచ్చారు. లొంగిపోయిన 41 మందిపై మొత్తం రూ. 1.46 కోట్ల రివార్డు ఉంది. ఈ మొత్తాన్ని నిబంధనల ప్రకారం వారికే అందజేస్తారు. తక్షణ సహాయం కింద ఒక్కొక్కరికి రూ. 25 వేలు నగదు అందించారు. ఆయుధాలతో లొంగిపోయిన వారికి కేంద్ర ప్రభుత్వం నుండి కూడా ప్రత్యేక సాయం అందుతుంది. ఇతర రాష్ట్రాలకు చెందిన వారిని ఆయా ప్రభుత్వాలకు అప్పగించి, అక్కడ కూడా వారికి పునరావాసం కల్పించేలా చర్యలు తీసుకుంటామని వెల్లడించారు.
ప్రస్తుతం మావోయిస్టు పార్టీలో తెలంగాణకు చెందిన వారు కేవలం 54 మంది మాత్రమే ఉన్నారని, అందులో ఆరుగురు మాత్రమే రాష్ట్రంలో పనిచేస్తున్నారని డీజీపీ తెలిపారు. లొంగిపోయిన వారు అప్పగించిన ఆయుధాలన్నీ గతంలో పోలీసులు, ఆర్మీ నుండి దొంగిలించినవేనని గుర్తించారు. ఈ ఆయుధాల సీరియల్ నంబర్లను పరిశీలించి, అవి ఏ రాష్ట్ర పోలీసులకు చెందినవో వారికి తిరిగి అప్పగించనున్నట్లు ఆయన పేర్కొన్నారు. ఈ పరిణామం రాష్ట్రంలో శాంతిభద్రతల పరిరక్షణకు, మావోయిస్టు ప్రాబల్యం తగ్గడానికి ఒక శుభపరిణామంగా భావించవచ్చు.