Kondagattu: జగిత్యాల జిల్లాలోని ప్రముఖ పుణ్యక్షేత్రం కొండగట్టు అంజనేయస్వామి సన్నిధిలో మరో ప్రమాదం చోటుచేసుకుంది. స్వామివారిని దర్శించుకుని మొక్కులు చెల్లించుకున్న భక్తులు, తిరుగు ప్రయాణంలో ఘాట్ రోడ్డుపై వస్తుండగా వారు ప్రయాణిస్తున్న ఆటో అదుపుతప్పింది. వేగంగా వెళ్తున్న ఆటో ఒక్కసారిగా పక్కనే ఉన్న గోడను బలంగా ఢీకొట్టింది. ఈ ప్రమాదంలో ఆటోలో ఉన్న నలుగురు భక్తులకు తీవ్ర గాయాలయ్యాయి.
ప్రమాదం జరిగిన వెంటనే గమనించిన స్థానికులు, పోలీసులు హుటాహుటిన అక్కడికి చేరుకుని సహాయక చర్యలు చేపట్టారు. గాయపడిన వారిని వెంటనే చికిత్స నిమిత్తం దగ్గరలోని ఆసుపత్రికి తరలించారు. ప్రస్తుతం వారికి వైద్యులు చికిత్స అందిస్తున్నారని, ఎవరికీ ప్రాణాపాయం లేదని అధికారులు స్పష్టం చేయడంతో అందరూ ఊపిరి పీల్చుకున్నారు. ఆటోను అతివేగంగా నడపడం వల్లే ఈ ప్రమాదం జరిగి ఉండొచ్చని పోలీసులు ప్రాథమికంగా అంచనా వేస్తున్నారు.
కొండగట్టు ఘాట్ రోడ్డు అనగానే గతంలో జరిగిన ఘోర ప్రమాదం అందరికీ గుర్తుకొస్తుంది. 2018లో జరిగిన బస్సు ప్రమాదంలో 60 మందికి పైగా ప్రాణాలు కోల్పోయారు. ఈ నేపథ్యంలో, ఘాట్ రోడ్డుపై ప్రయాణించే వాహనదారులు చాలా జాగ్రత్తగా ఉండాలని పోలీసులు మరోసారి హెచ్చరిస్తున్నారు. ముఖ్యంగా మలుపుల వద్ద వేగాన్ని తగ్గించి, అప్రమత్తంగా వాహనాలు నడపాలని వారు సూచిస్తున్నారు.