Sophia Qureshi: జమ్మూ కశ్మీర్‌లోని పహల్గామ్‌లో ఉగ్రవాదుల దాడికి జవాబుగా భారత సైన్యం మరోసారి తన ధైర్యాన్ని, సమర్థతను ప్రపంచానికి చాటిచెప్పింది. మే 7వ తేదీ బుధవారం తెల్లవారుజామున, భారత వాయుసేన పాక్ ఆక్రమిత కశ్మీర్ (POK)తో పాటు పాకిస్తాన్‌లోని తొమ్మిది ఉగ్రవాద కేంద్రాలపై మెరుపుదాడులు చేసింది. ఈ దాడిలో అనేకమంది ఉగ్రవాదులు హతమయ్యారు. ఈ చర్యకు భారత సైన్యం “ఆపరేషన్ సిందూర్” అని పేరు పెట్టింది.
ఈ ఆపరేషన్ ప్రత్యేకత ఏమిటంటే, దానిపై మీడియా సమావేశంలో మాట్లాడిన వారిలో ఇద్దరు మహిళా అధికారులు ఉన్నారు. వారే లెఫ్టినెంట్ కల్నల్ సోఫియా ఖురేషీ (ఇండియన్ ఆర్మీ) మరియు వింగ్ కమాండర్ వ్యోమికా సింగ్ (ఎయిర్ ఫోర్స్). ఈ ఇద్దరి హాజరు మహిళల భాగస్వామ్యం ఎంత ప్రధానమో చాటింది.
లెఫ్టినెంట్ కల్నల్ సోఫియా ఖురేషీ – భారత ఆర్మీలో అద్భుత పాత్ర
సోఫియా ఖురేషీ 1981లో గుజరాత్‌లోని వడోదరలో జన్మించారు. బయోకెమిస్ట్రీలో పీజీ చదివిన ఆమె, 1999లో చెన్నైలోని ఆఫీసర్స్ ట్రైనింగ్ అకాడమీ ద్వారా భారత సైన్యంలో అడుగుపెట్టారు. ఆమె తాత సైన్యంలో పనిచేసిన పూర్వ సైనికుడు కాగా, ఆమె తండ్రి సైన్యంలో మతగురువుగా సేవలందించారు. సోఫియా ఖురేషీ భర్త మేజర్ తాజుద్దీన్ ఖురేషీ మెకనైజ్డ్ ఇన్ఫాంట్రీ అధికారిగా సేవలందిస్తున్నారు. వారికి సమీర్ అనే కుమారుడు ఉన్నాడు.
ఇది కూడా చదవండి: Prabhas: సింహాచలంలో దుర్ఘటన: ప్రభాస్ 2 లక్షల సాయం!
సోఫియా ఖురేషీ 2006లో ఐక్యరాజ్యసమితి కాంగో మిషన్‌లో శాంతి బలగాల పరిశీలకురాలిగా పనిచేసారు. అనంతరం, 2010 నుండి ఐక్యరాజ్యసమితి శాంతి చర్యల్లో పాల్గొంటూ, పలు అంతర్జాతీయ మిషన్లలో తన సేవలందించారు. పంజాబ్ సరిహద్దులో జరిగిన ఆపరేషన్ పరాక్రమ్‌లో ఆమె చేసిన సేవలకు పలు ప్రశంసాపత్రాలు లభించాయి.
2016లో జరిగిన “ఎక్సర్సైజ్ ఫోర్స్ 18” అనే అంతర్జాతీయ మిలటరీ డ్రిల్లో భారత బలగాలకు నాయకత్వం వహించడం గర్వకారణం. ఇందులో పాల్గొన్న 18 దేశాల బృందాల్లో ఆమె ఒక్కరే మహిళా లీడర్‌గా ఉన్నారు.
మహిళా అధికారుల ప్రాతినిధ్యం – భారత సైన్యంలో కొత్త అధ్యాయం
ఆపరేషన్ సిందూర్ వంటి అధిక అంతర్జాతీయ దృష్టి గల దాడుల్లో మహిళా అధికారుల ప్రాతినిధ్యం దేశ మహిళలకు స్ఫూర్తిదాయకం. లెఫ్టినెంట్ కల్నల్ సోఫియా ఖురేషీ మాట్లాడుతూ, “కేవలం కాల్పులు ఆపించడం కాదు, అక్కడి ప్రజలకు మానవతా సహాయం చేయడం కూడా మా బాధ్యత,” అని తెలిపారు. ఇదే మీడియా సమావేశంలో వింగ్ కమాండర్ వ్యోమికా సింగ్ మాట్లాడుతూ, మహిళలు యుద్ధ రంగాల్లో ఏ పాత్రనైనా సమర్థవంతంగా పోషించగలరని చెప్పకనే చెప్పారు.
భారత సైన్యం ఈ చర్యతో ఒక ప్రకటన చేసింది – దాడులకు మౌనంగా సహించం. ఉగ్రవాదానికి ఖచ్చితంగా సమాధానం ఉంటుంది. ఇక ఆ సమాధానం వెనుక మహిళా సైనికుల శక్తి కూడా ఉందన్న విషయాన్ని దేశం గర్వంగా గుర్తుంచుకుంటోంది.