Donald Trump: అమెరికా అధ్యక్షుడు డొనాల్డ్ ట్రంప్ మరోసారి అంతర్జాతీయ రాజకీయాల్లో వేడిని పెంచారు. వ్యూహాత్మకంగా ఎంతో కీలకమైన గ్రీన్లాండ్ ద్వీపాన్ని ఎలాగైనా అమెరికా వశం చేసుకుంటుందని ఆయన కుండబద్దలు కొట్టారు. వైట్హౌస్లో చమురు కంపెనీల ప్రతినిధులతో జరిగిన సమావేశంలో మాట్లాడుతూ, గ్రీన్లాండ్ ప్రజలకు ఇష్టం ఉన్నా లేకపోయినా ఈ విషయంలో తాము ముందడుగు వేయక తప్పదని స్పష్టం చేశారు. ఒకవేళ అమెరికా గ్రీన్లాండ్ను తన ఆధీనంలోకి తీసుకోకపోతే, రష్యా లేదా చైనా ఆ ప్రాంతాన్ని ఆక్రమించే ప్రమాదం ఉందని ట్రంప్ ఆందోళన వ్యక్తం చేశారు. రష్యా, చైనా వంటి దేశాలు తమ పొరుగున ఉండటాన్ని తాము ఎంతమాత్రం సహించలేమని ఆయన ఘాటుగా వ్యాఖ్యానించారు.
ప్రస్తుతం గ్రీన్లాండ్ అనేది డెన్మార్క్ దేశం కింద స్వయంప్రతిపత్తి కలిగిన ప్రాంతంగా ఉంది. సుమారు 57 వేల జనాభా కలిగిన ఈ ద్వీపం, ఆర్కిటిక్ ప్రాంతంలో రక్షణ మరియు వాణిజ్య పరంగా అమెరికాకు ఎంతో అవసరమని ట్రంప్ భావిస్తున్నారు. 1951 నాటి ఒప్పందం ప్రకారం అమెరికాకు అక్కడ ఇప్పటికే సైనిక స్థావరం ఉన్నప్పటికీ, కేవలం లీజు ఒప్పందాలు గ్రీన్లాండ్ రక్షణకు సరిపోవని ఆయన అభిప్రాయపడ్డారు. గ్రీన్లాండ్ చుట్టూ ఉన్న జలాల్లో ఇప్పటికే రష్యా, చైనా నౌకలు తిరుగుతున్నాయని, అందుకే చర్చల ద్వారా సాధ్యం కాకపోతే కఠిన మార్గాలను అనుసరించైనా ఆ ప్రాంతాన్ని స్వాధీనం చేసుకుంటామని హెచ్చరించారు. ఈ విషయంలో గ్రీన్లాండ్ మరియు డెన్మార్క్ నేతలతో చర్చించేందుకు అమెరికా విదేశాంగ మంత్రి మార్కో రూబియో వచ్చే వారం పర్యటించనున్నారు.
ఇది కూడా చదవండి: Pawan Kalyan: కూటమిని బలహీనం చేయకండి..
మరోవైపు, వెనెజువెలా చమురు నిల్వలపై కూడా ట్రంప్ తన వ్యూహాన్ని వెల్లడించారు. వెనెజువెలాలోని పెట్రోలియం నిల్వలను వెలికితీయడం వల్ల అటు వెనెజువెలా ప్రజలకు, ఇటు అమెరికాకు ఎంతో ప్రయోజనం ఉంటుందని ఆయన పేర్కొన్నారు. దీనివల్ల ఇంధన ఉత్పత్తి పెరిగి, చమురు ధరలు తగ్గుతాయని ఆయన ఆశాభావం వ్యక్తం చేశారు. చమురు కంపెనీల యజమానులతో భేటీ అయిన ఆయన, అక్కడ పెట్టుబడులు పెట్టే దిశగా ప్రోత్సహిస్తున్నారు.
అయితే ట్రంప్ వ్యాఖ్యలపై యూరప్ దేశాలు తీవ్రంగా స్పందిస్తున్నాయి. గ్రీన్లాండ్ సొంతం చేసుకోవాలన్న అమెరికా ప్రయత్నాలను ఫ్రాన్స్, జర్మనీ, బ్రిటన్, డెన్మార్క్ వంటి నాటో మిత్రదేశాలు ఏకగ్రీవంగా తిరస్కరించాయి. గ్రీన్లాండ్ భవిష్యత్తును నిర్ణయించే అధికారం కేవలం ఆ ప్రాంత ప్రజలకు మరియు డెన్మార్క్కు మాత్రమే ఉంటుందని అవి స్పష్టం చేశాయి. అమెరికా ఆఫర్ చేస్తున్న నగదు చెల్లింపులు లేదా సైనిక ఒత్తిళ్లు అంతర్జాతీయ సంబంధాలను దెబ్బతీస్తాయని పలువురు నేతలు హెచ్చరిస్తున్నారు. అగ్రరాజ్యం అమెరికా మొండి పట్టుదల మరియు మిత్రదేశాల వ్యతిరేకత మధ్య ఈ ‘గ్రీన్లాండ్ వివాదం’ ఎలాంటి మలుపు తిరుగుతుందో వేచి చూడాలి.