Zelensky: ఉక్రెయిన్‌పై కొనసాగుతున్న యుద్ధం నేపధ్యంలో రష్యాతో వ్యాపార ఒప్పందాలు కొనసాగిస్తున్న దేశాలపై ఆర్థిక సుంకాలు విధించాల్సిందేనని ఉక్రెయిన్ అధ్యక్షుడు వోలోడిమిర్ జెలెన్స్కీ స్పష్టం చేశారు. ఇటీవల ABC న్యూస్‌కు ఇచ్చిన ఇంటర్వ్యూలో ఆయన మాట్లాడుతూ, “రష్యాతో వాణిజ్య సంబంధాలను కొనసాగించే దేశాలపై ఆంక్షలు, సుంకాలు విధించడమే సరైన మార్గం” అని వ్యాఖ్యానించారు.
జెలెన్స్కీ ఈ వ్యాఖ్యలు భారత ప్రధాని నరేంద్ర మోడీ ఇటీవల చైనాలో జరిగిన షాంఘై సహకార సంస్థ (SCO) శిఖరాగ్ర సమావేశంలో రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు జి జిన్‌పింగ్‌లతో కలిసి వేదిక పంచుకున్న నేపథ్యంలో రావడం గమనార్హం. మోడీ-పుతిన్‌లు ద్వైపాక్షిక చర్చల కోసం కలిసి ప్రయాణించిన దృశ్యాలు కూడా అప్పట్లో చర్చనీయాంశమయ్యాయి.
రష్యా ఇంధనంపై ప్రపంచ దేశాల ఆధారపడటం కొనసాగుతూనే ఉంది
ఉక్రెయిన్ యుద్ధం ప్రారంభమైనప్పటి నుంచి రష్యా చమురు, సహజ వాయువు విక్రయాల ద్వారా సుమారు 985 బిలియన్ డాలర్లు సంపాదించినట్లు సెంటర్ ఫర్ రీసెర్చ్ ఆన్ ఎనర్జీ అండ్ క్లీన్ ఎయిర్ నివేదిక వెల్లడించింది. రష్యా చమురు, గ్యాస్ కొనుగోళ్లలో భారత్, చైనా ముందంజలో ఉన్నాయని నివేదికలో పేర్కొన్నారు.
యూరోపియన్ యూనియన్ (EU) రష్యన్ ఇంధనంపై ఆధారాన్ని తగ్గించినప్పటికీ పూర్తిగా నిలిపివేయలేదు. 2027 నాటికి రష్యా ఇంధన దిగుమతులను పూర్తిగా నిలిపివేయాలనే ప్రణాళికను EU ఇటీవల ప్రకటించింది.
అమెరికా కఠిన వైఖరి – ట్రంప్ రెండో దశ ఆంక్షలు
అమెరికా అధ్యక్షుడు డొనాల్డ్ ట్రంప్ కూడా రష్యా చమురు కొనుగోలు చేసే దేశాలపై రెండవ దశ ఆంక్షలు అమలు చేసే అవకాశం ఉందని సంకేతాలు ఇచ్చారు. ఇటీవల అలాస్కాలో జరిగిన ట్రంప్-పుతిన్ చర్చలు విఫలమైన నేపథ్యంలో అమెరికా వ్యూహం ఆర్థిక ఒత్తిడిపై మరింత దృష్టి సారించింది.
ఇది కూడా చదవండి: Rajanna Sircilla: సిరిసిల్ల జేఎన్టీయూ కళాశాల ముందు విద్యార్థుల ధర్నా
US ట్రెజరీ కార్యదర్శి స్కాట్ బెసెంట్ మాట్లాడుతూ, “రష్యన్ చమురును కొనుగోలు చేసే దేశాలపై ద్వితీయ సుంకాలు విధిస్తే, మాస్కో ఆర్థిక వ్యవస్థపై భారీ ప్రభావం చూపుతుంది. ఇది పుతిన్‌ను చర్చల బల్లమీదకు తీసుకువస్తుంది” అని అన్నారు.
అమెరికా ఇప్పటికే భారత్‌పై సుంకాలు పెంచింది. భారత ఎగుమతులపై 25 శాతం జరిమానా సుంకం విధించగా, దిగుమతి సుంకాలను 50 శాతం వరకు పెంచింది. అయితే భారత ప్రభుత్వం ఈ చర్యలను ఖండిస్తూ, దేశ ఆర్థిక అవసరాలను దృష్టిలో ఉంచుకుని చమురు కొనుగోళ్లు కొనసాగిస్తామని స్పష్టం చేసింది.
భారత్ మధ్యవర్తిత్వ ప్రయత్నాలు కొనసాగుతూనే
ఉక్రెయిన్ యుద్ధం ముగించేందుకు భారత్ అనేక ప్రయత్నాలు చేస్తోంది. ప్రధాని మోడీ ఇటీవల పుతిన్, జెలెన్స్కీతో వేర్వేరుగా సుదీర్ఘ చర్చలు జరిపారు. ఈ సమస్యను శాంతియుతంగా పరిష్కరించడానికి భారత్ పలు మార్గాలను అన్వేషిస్తోందని ప్రభుత్వ వర్గాలు తెలిపాయి. అయితే ఈ పరిస్థితుల్లోనే ఇండియాపై జెలెన్స్కీ విమర్శలు చేయడం అంతర్జాతీయ వర్గాల్లో చర్చనీయాంశమైంది.