మెగాస్టార్ చిరంజీవి నటిస్తున్న క్రేజీ పాన్ ఇండియా మూవీ విశ్వంభర. దసరా సందర్భంగా ఈ మూవీ టీజర్ ను మేకర్స్ విడుదల చేసింది. గ్రాండ్‌ విజువల్స్‌తో ఈ టీజర్ ను వదిలారు. మెగా అభిమానులు, సినీ ప్రేక్షకులను టీజర్ బాగా ఆకట్టుకుంటోంది. అయితే, దీనిపై యాంటీ ఫ్యాన్స్ సోషల్ మీడియాలో ట్రోల్ చేస్తున్నారు. వీఎఫ్ క్స్ బాగా లేవని, టీజర్ యాడ్ లాగా ఉందంటూ పనిగట్టుకుని మరి ట్రోల్స్ చేస్తున్నారు. ఇక, దీనికంటే నాగార్జున నటించిన ఢమరుకం మూవీ గ్రాఫిక్స్ బాగా ఉన్నాయంటూ నెగిటీవ్ ప్రచారం చేస్తున్నారు.
అయితే, టీజర్ మాత్రం సోషల్‌మీడియాలో ట్రెండ్‌ అవుతోంది. బింబిసార ఫేం వశిష్ఠ దర్శకత్వం వహిస్తున్న ఈ సినిమాను యు.వి.క్రియేషన్స్‌ పతాకంపై విక్రమ్, వంశీ, ప్రమోద్‌ లు నిర్మిస్తున్నారు. సోషియో ఫాంటసీ నేపథ్యంలో రూపొందుతున్న ఈ మూవీకి కీరవాణి స్వరాలు అందిస్తున్నారు. ఇప్పటివరకూ చిరంజీవి నటించిన సినిమాలతో పోలిస్తే, అత్యున్నత సాంకేతిక పరిజ్ఞానంతో ఈ మూవీని తెరకెక్కిస్తున్నారు. దాదాపు రూ.200 కోట్ల భారీ బడ్జెట్‌తో తీర్చిదిద్దుతున్నట్లు టాక్‌. చిరంజీవి కెరీర్‌లోనే అత్యధిక బడ్జెట్‌తో రూపొందుతున్న సినిమాగా ఇది నిలిచిపోనుంది. ఈ సినిమా కోసం 13 భారీ సెట్‌లతో విభిన్న ప్రపంచాన్ని సృష్టించారు. ఇంతకుముందెన్నడూ చూడని సరికొత్త అవతారంలో చిరంజీవి కనిపించనున్నారు. ఇందులో త్రిష, అషికా రంగనాథ్ లు హీరోయిన్లుగా నటిస్తున్నారు. కాగా సంక్రాంతి బరి నుంచి ఈ సినిమా తప్పుకుంది. రామ్ చరణ్ గేమ్ ఛేంజర్ మూవీ కోసం ఈ సినిమాను వాయిదా వేస్తున్నట్లు మేకర్స్ ప్రకటించారు.