Electricity Bill: నిత్యావసర వస్తువుల ధరలు, పెరిగిన ఖర్చులతో సతమతమవుతున్న తెలంగాణ ప్రజలకు రాష్ట్ర విద్యుత్ నియంత్రణ మండలి (TSERC) భారీ షాక్ ఇచ్చింది. విద్యుత్ పంపిణీ సంస్థల (డిస్కంల) సర్దుబాటు ఛార్జీల (ట్రూ-అప్ ఛార్జీలు – True-up Charges) పేరుతో వినియోగదారులపై వేల కోట్ల రూపాయల అదనపు భారం మోపేందుకు అధికారికంగా గ్రీన్ సిగ్నల్ ఇచ్చింది.
రాష్ట్రంలోని రెండు ప్రధాన విద్యుత్ పంపిణీ సంస్థలైన టీజీఎస్పీడీసీఎల్ (TGSPDCL), టీజీఎన్పీడీసీఎల్ (TGNPDCL) సమర్పించిన పిటిషన్లను పరిశీలించిన కమిషన్.. ఏకంగా రూ. 7,635.22 కోట్ల వసూళ్లకు ఆమోదం తెలుపుతూ అధికారిక ఉత్తర్వులు జారీ చేసింది. దీంతో వచ్చే నెల, అంటే నవంబర్ 1 నుంచి జారీ చేసే విద్యుత్ బిల్లుల్లో ఈ అదనపు మోత మొదలుకానుంది.
అసలేంటీ ట్రూ-అప్ ఛార్జీలు? ఎందుకు వసూలు చేస్తున్నారు?
సాధారణంగా విద్యుత్ సంస్థలు అంచనా వేసిన వ్యయానికి, వాస్తవంగా కరెంట్ కొనుగోలు చేయడానికి అయిన ఖర్చుకు మధ్య వ్యత్యాసం ఉన్నప్పుడు దాన్ని ‘ట్రూ-అప్ ఛార్జీలు’గా లెక్కించి వినియోగదారుల నుంచి వసూలు చేస్తుంటాయి.
-
2022-23 ఆర్థిక సంవత్సరం: విద్యుత్ కొనుగోలు వాస్తవ వ్యయం సర్దుబాటు.
-
2023-24 ఆర్థిక సంవత్సరం: సంస్థల రెవెన్యూ లోటు/సర్దుబాటు మొత్తం.
-
ఈ రెండు ఆర్థిక సంవత్సరాలకు సంబంధించి తేలిన వ్యత్యాసమే ఈ రూ. 7,635.22 కోట్లు. సుప్రీంకోర్టు, విద్యుత్ అప్పిలేట్ ట్రిబ్యునల్ (APTEL) మార్గదర్శకాల ప్రకారం.. విద్యుత్ ఛార్జీలు వాస్తవ వ్యయాలకు అనుగుణంగా ఉండాలన్న నిబంధనలు, రెగ్యులేటరీ ఆస్తుల లిక్విడేషన్ గడువును పరిగణనలోకి తీసుకుని ఈఆర్సీ ఈ తుది నిర్ణయం తీసుకుంది.
ఎవరిపై ఎంత భారం? – రైతులకు ఊరట..
మొత్తం రూ. 7,635.22 కోట్లలో ప్రభుత్వం అమలు చేస్తున్న ఉచిత విద్యుత్ విధానానికి అనుగుణంగా వ్యవసాయ రంగానికి కమిషన్ పూర్తి మినహాయింపునిచ్చింది.
-
వ్యవసాయ వాటా (రూ. 2,214.99 కోట్లు):ఈ మొత్తాన్ని రైతులపై వేయకుండా, నేరుగా రాష్ట్ర ప్రభుత్వమే సబ్సిడీ రూపంలో డిస్కంలకు చెల్లించాలని ఈఆర్సీ స్పష్టం చేసింది. ఇందులో దక్షిణ డిస్కం (ఎస్పీడీసీఎల్) వాటా రూ. 1,442.49 కోట్లు కాగా, ఉత్తర డిస్కం (ఎన్పీడీసీఎల్) వాటా రూ. 772.50 కోట్లుగా ఉంది.
-
సాధారణ వినియోగదారులపై భారం (రూ. 5,420.23 కోట్లు):రైతులను మినహాయించగా మిగిలిన రూ. 5,420.23 కోట్ల భారీ మొత్తాన్ని గృహ (డొమెస్టిక్), వాణిజ్య (కమర్షియల్), పారిశ్రామిక (ఇండస్ట్రియల్) వినియోగదారుల నుంచే వసూలు చేయనున్నారు.
-
ఎస్పీడీసీఎల్ (హైదరాబాద్ & దక్షిణ తెలంగాణ) పరిధిలో: అత్యధికంగా రూ. 4,222.93 కోట్లు.
-
ఎన్పీడీసీఎల్ (వరంగల్ & ఉత్తర తెలంగాణ) పరిధిలో: రూ. 1,197.30 కోట్లు.
-
యూనిట్‌కు ఎంత పడుతుంది? ఎన్ని నెలల పాటు వసూలు చేస్తారు?..
వినియోగదారులపై ఒకేసారి తీవ్ర ఆర్థిక భారం పడకుండా ఉండేందుకు వీలుగా ఈ వసూళ్లను సుదీర్ఘ కాలపరిమితితో నెలల వారీగా విభజించారు.
-
మొదటి నెల (నవంబర్ 2026):వసూళ్లు ప్రారంభమయ్యే తొలి నెలలో ప్రతి యూనిట్‌కు 30 పైసల చొప్పున ట్రూ-అప్ ఛార్జీ వసూలు చేస్తారు.
-
రెండో నెల నుంచి (డిసెంబర్ 2026 నుంచి):ఆ తర్వాతి నెల నుంచి భారాన్ని పెంచి, ప్రతి యూనిట్‌కు 50 పైసల చొప్పున వసూలు చేయనున్నారు.
-
వసూలు కాలపరిమితి:
-
ఎస్పీడీసీఎల్ పరిధిలో: ఏకంగా 29 నెలల పాటు (దాదాపు రెండున్నరేళ్లు) ఈ అదనపు వసూళ్లు కొనసాగుతాయి.
-
ఎన్పీడీసీఎల్ పరిధిలో: 26 నెలల పాటు ఈ ఛార్జీలను వసూలు చేస్తారు.
-
-
వినియోగదారులు ఆయా ఆర్థిక సంవత్సరాల్లో వాడిన సగటు విద్యుత్ వినియోగం ఆధారంగా ఈ నెలవారీ భారాన్ని లెక్కించి బిల్లులో కలుపుతారు.
బిల్లులో ప్రత్యేకంగా చూపించాల్సిందే – ఈఆర్సీ కీలక ఆదేశాలు..
ట్రూ-అప్ ఛార్జీల వసూళ్లలో వినియోగదారులకు స్పష్టత, పారదర్శకత ఉండాలని ఈఆర్సీ డిస్కంలను ఆదేశించింది:
-
ఈ అదనపు ఛార్జీలను కరెంట్ బిల్లులోని ఇతర పద్దులతో కలపకూడదు.
-
ఏ ఆర్థిక సంవత్సరానికి సంబంధించి ఎంత మొత్తం ట్రూ-అప్ వసూలు చేస్తున్నారో బిల్లులో ప్రత్యేక లైన్ ఐటెమ్ (Line Item) రూపంలో స్పష్టంగా విడిగా ముద్రించి చూపించాలి.
కాగా, తెలంగాణలో వ్యవసాయానికి ప్రత్యేకంగా విద్యుత్ అందించేందుకు ‘తెలంగాణ రైతు పవర్ డిస్ట్రిబ్యూషన్ కార్పొరేషన్ లిమిటెడ్’ (RPDCL) పేరిట మూడో విద్యుత్ పంపిణీ సంస్థను ఏర్పాటు చేయనుండటం, దానికి సంబంధించిన లైసెన్స్ ప్రక్రియల కారణంగానే గతంలో ఈ ట్రూ-అప్ నిర్ణయంపై కొంతకాలం జాప్యం జరిగింది. ఎట్టకేలకు ఈఆర్సీ ఆమోదం తెలపడంతో వచ్చే నెల నుంచి సామాన్య, మధ్యతరగతి గృహస్తులకు, వ్యాపారులకు కరెంట్ బిల్లుల మోత తప్పేలా లేదు.