CM Vijay: తమిళనాడు ముఖ్యమంత్రిగా విజయ్ పదవీ బాధ్యతలు స్వీకరించిన వారం రోజుల తర్వాత ఎట్టకేలకు మంత్రివర్గ శాఖల కేటాయింపు పూర్తయింది. ఈ నూతన మంత్రివర్గంలో సీఎం విజయ్ అత్యంత కీలకమైన నిర్ణయం తీసుకున్నారు. పబ్లిక్ డిపార్ట్మెంట్, హోం, పోలీస్ మరియు సాధారణ పరిపాలనతో సహా ఏకంగా 17 ప్రధాన శాఖలను తన పరిధిలోనే ఉంచుకుంటూ పరిపాలనపై పూర్తి పట్టు సాధించారు.
శాఖల కేటాయింపు ఆలస్యానికి కారణం ఇదేనా?
ఈ నెల 10వ తేదీన ముఖ్యమంత్రిగా విజయ్, ఆయనతో పాటు మరో 9 మంది మంత్రులుగా ప్రమాణ స్వీకారం చేసిన సంగతి తెలిసిందే. అయితే వారం రోజులుగా మంత్రులకు శాఖలు కేటాయించకపోవడంపై రాజకీయ వర్గాల్లో తీవ్ర చర్చ నడిచింది.
కూటమిలోని కాంగ్రెస్ పార్టీకి ఏయే పోర్ట్ఫోలియోలు ఇవ్వాలి, అలాగే అన్నాడీఎంకే (ADMK) అసంతృప్త వర్గానికి ప్రాధాన్యత ఇవ్వాలా వద్దా అనే అంశాలపై విజయ్ జరిపిన సుదీర్ఘ సంప్రదింపుల వల్లే ఈ ఆలస్యం జరిగినట్లు తెలుస్తోంది. విమర్శలు వెల్లువెత్తిన నేపథ్యంలో, ఎట్టకేలకు ఈ రోజు శాఖల కేటాయింపు అధికారికంగా ముగిసింది.
ఎన్నికల హామీని నిలబెట్టుకున్న ‘దళపతి’
తన ఎన్నికల ప్రచారంలో మహిళా సంక్షేమం, యువజన సంక్షేమ శాఖలను తానే స్వయంగా పర్యవేక్షిస్తానని విజయ్ ప్రకటించారు. అన్నట్టుగానే ఇప్పుడు ముఖ్యమంత్రి అయ్యాక ఆ శాఖలను తన వద్దే ఉంచుకున్నారు.
సీఎం విజయ్ పరిధిలో ఉన్న కొన్ని ముఖ్యమైన శాఖలు:
-
హోం మరియు పోలీస్ శాఖ: శాంతిభద్రతల నియంత్రణ.
-
సాధారణ పరిపాలన: ఐఏఎస్, ఐపీఎస్, ఐఎఫ్ఎస్ అధికారుల బదిలీలు ఇంకా నియామకాలు.
-
మహిళా, శిశు మరియు వృద్ధుల సంక్షేమం: బలహీన వర్గాల రక్షణ.
-
మున్సిపల్ పరిపాలన & పట్టణాభివృద్ధి: మంచినీటి సరఫరా మరియు నగరాల అభివృద్ధి.
ఉదయనిధి స్టాలిన్ శాఖపై కన్ను: విశేషంగా, గత డీఎంకే ప్రభుత్వంలో డిప్యూటీ సీఎంగా ఉన్న ఉదయనిధి స్టాలిన్ పర్యవేక్షించిన ‘ప్రత్యేక పథకాల అమలు’ (Special Schemes Implementation) శాఖను కూడా విజయ్ తన అధీనంలోనే ఉంచుకోవడం గమనార్హం.
ఏమిటి ఈ ‘ప్రత్యేక పథకాల అమలు శాఖ’?
తమిళనాడు రాజకీయ చరిత్రలోనే అత్యంత కీలకమైన విభాగంగా దీనిని పరిగణిస్తారు. గత ప్రభుత్వ హయాంలోనే ఈ ప్రత్యేక శాఖను ప్రారంభించారు.
-
విధులు: ఏదైనా ఒక నిర్దిష్ట రంగానికే పరిమితం కాకుండా, ప్రభుత్వంలోని ప్రతి శాఖలో ముఖ్యమంత్రి ప్రవేశపెట్టే ప్రతిష్టాత్మక పథకాలను సమన్వయం చేయడం మరియు నిరంతరం పర్యవేక్షించడం (Monitoring) ఈ శాఖ ముఖ్య ఉద్దేశం.
-
ప్రాధాన్యత: ఈ శాఖ ద్వారా సీఎం విజయ్ మిగిలిన అన్ని శాఖల మంత్రులతో, అధికారులతో నేరుగా కనెక్ట్ అయి, క్షేత్రస్థాయిలో ప్రభుత్వ పథకాలు ప్రజలకు అందుతున్నాయో లేదో స్వయంగా సమీక్షించనున్నారు.