Shubman Gill: భారత టెస్ట్ క్రికెట్ జట్టు కెప్టెన్ శుభ్మన్ గిల్ సరికొత్త చరిత్ర లిఖించాడు. ముల్లన్పూర్లోని మహారాజా యాద్విందర్ సింగ్ అంతర్జాతీయ క్రికెట్ స్టేడియంలో ఆఫ్ఘనిస్తాన్తో ప్రారంభమైన ఏకైక టెస్ట్ మ్యాచ్లో గిల్ అద్భుత సెంచరీతో చెలరేగి, ప్రపంచ క్రికెట్లో పలు అరుదైన రికార్డులను తన ఖాతాలో వేసుకున్నాడు. కెప్టెన్గా బాధ్యతలు స్వీకరించిన ఏడాది కాలంలోనే 1,000 టెస్ట్ పరుగులు పూర్తి చేసిన తొలి భారతీయ కెప్టెన్గా గిల్ సరికొత్త రికార్డు సృష్టించాడు.
శనివారం నాటి మ్యాచ్ ముగిసే సమయానికి 103 పరుగులతో నాటౌట్గా నిలిచిన భారత కెప్టెన్.. ఆదివారం నాటి రెండో రోజు ఆటలో 177 బంతుల్లో 126 పరుగులు చేసి ఔటయ్యాడు. దీంతో కెప్టెన్గా తన తొలి 15 ఇన్నింగ్స్లను 82.8 సగటుతో 1076 పరుగులతో ముగించాడు.
బ్రాడ్మన్ తర్వాత గిల్లే అత్యుత్తమం!
టెస్ట్ క్రికెట్ సుదీర్ఘ చరిత్రలో కనీసం 1000 పరుగులు చేసిన కెప్టెన్ల జాబితాను పరిశీలిస్తే.. క్రికెట్ దిగ్గజం సర్ డాన్ బ్రాడ్మన్ (101.5 సగటు) తర్వాత ప్రపంచంలోనే అత్యుత్తమ బ్యాటింగ్ సగటు (82.8) కలిగిన రెండవ కెప్టెన్గా శుభ్మన్ గిల్ నిలిచాడు.
ఈ జాబితాలో గిల్ తర్వాత స్థానాల్లో ఉన్న దిగ్గజాలు:
కుమార సంగక్కర: 69.6 సగటు (1601 పరుగులు)
స్టీవ్ స్మిత్: 68.1 సగటు (4425 పరుగులు)
మహేల జయవర్ధనే: 59.1 సగటు (3665 పరుగులు)
2025లో ఇంగ్లాండ్ పర్యటనకు ముందు టీమిండియా పగ్గాలు చేపట్టిన గిల్కు.. కెప్టెన్గా ఇది 6వ టెస్ట్ సెంచరీ కావడం విశేషం. గిల్ తన కెప్టెన్సీలో సాధించిన అర్ధ సెంచరీలలో ఒక్కదానిని మినహా మిగతా అన్నింటినీ సెంచరీలు (Conversion Rate)గా మార్చడం అతని నిలకడకు నిదర్శనం.
తొలి 15 ఇన్నింగ్స్లలో పరుగుల వరద!
కెప్టెన్గా బాధ్యతలు చేపట్టిన మొదటి 15 ఇన్నింగ్స్లలో అత్యధిక పరుగులు చేసిన ప్రపంచ బ్యాట్స్మెన్ల జాబితాలో గిల్ మూడో స్థానాన్ని కైవసం చేసుకున్నాడు:
డాన్ బ్రాడ్మన్ (ఆస్ట్రేలియా): 1244 పరుగులు
గ్రాహం గూచ్ (ఇంగ్లాండ్): 1094 పరుగులు
శుభ్మన్ గిల్ (భారత్): 1076 పరుగులు
స్టీవ్ స్మిత్ (ఆస్ట్రేలియా): 1050 పరుగులు
అలస్టైర్ కుక్ (ఇంగ్లాండ్): 1047 పరుగులు
సునీల్ గవాస్కర్ (భారత్): 1031 పరుగులు
అలాగే అత్యంత వేగంగా (15 ఇన్నింగ్స్లలో) 1000 పరుగులు పూర్తి చేసిన కెప్టెన్ల సరసన కూడా గిల్ చేరాడు. ఈ రికార్డులో బ్రాడ్మన్ (11 ఇన్నింగ్స్) అగ్రస్థానంలో ఉండగా, హామండ్, కుక్, గవాస్కర్ (14 ఇన్నింగ్స్) తర్వాతి స్థానాల్లో ఉన్నారు. గిల్, స్మిత్, గూచ్లు 15 ఇన్నింగ్స్లలో ఈ మైలురాయిని అందుకున్నారు.
భారీ స్కోరుతో భారత్ డిక్లేర్.. కష్టాల్లో ఆఫ్ఘనిస్తాన్!
ఈ మ్యాచ్లో కెప్టెన్ గిల్తో పాటు భారత బ్యాట్స్మెన్లు సమిష్టిగా రాణించారు. కన్నడిగుడైన కేఎల్ రఘువేలి (100) సెంచరీతో మెరవగా.. వికెట్ కీపర్ రిషబ్ పంత్ (81), సాయి సుదర్శన్ (81) మరియు వాషింగ్టన్ సుందర్ (నాటౌట్ 52) పరుగులతో అదరగొట్టారు. దీంతో భారత్ తన తొలి ఇన్నింగ్స్ను 564/8 భారీ స్కోరు వద్ద డిక్లేర్ చేసింది.
అనంతరం తొలి ఇన్నింగ్స్ ప్రారంభించిన ఆఫ్ఘనిస్తాన్ జట్టుకు భారత బౌలర్లు చుక్కలు చూపించారు. రెండో రోజు ఆట ముగిసే సమయానికి ఆఫ్ఘనిస్తాన్ 5 వికెట్లు కోల్పోయి 115 పరుగులు మాత్రమే చేయగలిగింది. ప్రస్తుతం రెహ్మత్ షా 43 పరుగులతో క్రీజులో ఉన్నాడు. భారత బౌలర్లలో మానవ్ సుతార్ 3 వికెట్లతో చెలరేగగా, ప్రసిద్ధ్ కృష్ణ 2 వికెట్లు పడగొట్టి ప్రత్యర్థిని కోలుకోలేని దెబ్బతీశారు.