Pakistan: భారతదేశంపై సరిహద్దు ఆవల నుంచి కొనసాగుతున్న ఉగ్రదాడులను పూర్తిగా అరికట్టేంతవరకూ పాకిస్థాన్‌తో ఎలాంటి చర్చలు జరగవని భారత ప్రభుత్వం మళ్లీ స్పష్టంచేసింది. అయినప్పటికీ, పాకిస్థాన్ మాత్రం చర్చల అంశాన్ని తుడిచిపెట్టకుండా మళ్లీ మళ్లీ లేవనెత్తుతోంది. ఈ క్రమంలో పాకిస్థాన్ ప్రధాని షెహబాజ్ షరీఫ్, ఇరు దేశాల మధ్య నెలకొన్న వివాదాలపై అర్థవంతమైన చర్చలకు తమ ప్రభుత్వం సిద్ధంగా ఉందని తాజా ప్రకటన చేశారు.
సౌదీ అరేబియా యువరాజు మహమ్మద్ బిన్ సల్మాన్ (ఎంబీఎస్)తో ఇటీవల జరిగిన ఫోన్ సంభాషణలో షరీఫ్ ఈ అంశాన్ని ప్రస్తావించినట్టు రేడియో పాకిస్థాన్ వెల్లడించింది. జమ్మూకశ్మీర్ అంశం, ఉగ్రవాదం, వాణిజ్య సంబంధాలు, జలాల పంపిణీ వంటి కీలక సమస్యలపై భారత్‌తో చర్చించేందుకు పాకిస్థాన్ సిద్ధంగా ఉందని ఆయన పేర్కొన్నట్లు తెలిపింది.
ఇక పశ్చిమాసియా ప్రాంతంలో నెలకొన్న తాజా రాజకీయ పరిణామాలపై కూడా ఈ ఫోన్ సంభాషణలో చర్చలు జరిగినట్లు తెలుస్తోంది. భారత్–పాక్ మధ్య ఉన్న ఉద్రిక్తతలను ఎత్తి చూపుతూ, చర్చల ద్వారా పరిష్కార మార్గం వెతకాల్సిన అవసరం ఉందని షరీఫ్ అభిప్రాయపడినట్టు సమాచారం.
గతంలో, జమ్మూ కశ్మీర్‌లోని పహల్గామ్ ప్రాంతంలో జరిగిన ఘోర ఉగ్రదాడి తర్వాత, భారత ప్రభుత్వం పాక్‌పై మిలిటరీ చర్యలు చేపట్టిన విషయం తెలిసిందే. ఈ పరిణామాల నేపథ్యంలో పాకిస్థాన్, అంతర్జాతీయ మద్దతు కోసం ప్రయత్నాలు ముమ్మరం చేసింది. సౌదీ అరేబియా, ఇరాన్, అజర్‌బైజాన్ వంటి దేశాలతో సంప్రదింపులు సాగించింది.
ఈ నేపథ్యంలో పాక్‌తో చర్చల అంశంపై భారత్ తేల్చి చెప్పింది — “ఉగ్రవాదం పూర్తిగా ఆగితే తప్ప చర్చల గురించి మాటే లేదు.” ఉగ్రవాద చర్యలు కొనసాగుతూనే, శాంతి చర్చలు జరగలేవని భారత్ స్పష్టం చేసింది. “నీరు మరియు రక్తం కలిసి ప్రవహించలేవు” అనే మాటను పునఃస్మరించుతూ, చర్చలకు మార్గం లేదు అని భారత వైఖరి గట్టిగా చెప్పింది.