Yadadri Bhuvanagiri: యాదాద్రి భువనగిరి జిల్లా బీబీనగర్ మండలం గొల్లగూడెం గ్రామంలో ఒక విషాద ఘటన చోటుచేసుకుంది. అత్తింటి వారి వేధింపులు తట్టుకోలేక ఐశ్వర్య అనే వివాహిత తన ఇద్దరు చిన్నారులను చంపి, ఆ తర్వాత తాను కూడా ఉరివేసుకుని ప్రాణాలు తీసుకుంది. ఈ వార్త స్థానికంగా అందరినీ కంటతడి పెట్టిస్తోంది.
ఐశ్వర్య ఆత్మహత్యకు ముందు ఒక సూసైడ్ నోట్ రాసింది. ఆ లేఖలో తన ఆవేదననంతా వెళ్లగక్కింది. తన భర్త మహేష్ తనను ఎప్పుడూ నిర్లక్ష్యం చేసేవాడని, కనీసం బట్టలు కొనివ్వడానికి కూడా ఇష్టపడేవాడు కాదని ఆమె ఆ లేఖలో వాపోయింది. భర్తతో పాటు అత్తమామలు, ఆడపడుచు కూడా తనను తీవ్రంగా ఇబ్బంది పెట్టేవారని, వారి మాటలు విని భర్త తనను వేధించేవాడని ఆమె కన్నీటితో రాసింది.
ముఖ్యంగా తన బిడ్డల గురించి ఐశ్వర్య రాసిన మాటలు ప్రతి ఒక్కరినీ కలిచివేస్తున్నాయి. తన పిల్లలను గొప్పగా చదివించాలని ఆమె ఎన్నో కలలు కన్నదట. కానీ, తాను చనిపోయాక తన బిడ్డలను చూసుకునేవారు ఎవరూ ఉండరని, తనలాగే వారు కూడా కష్టాలు పడకూడదనే బాధతో వారిని కూడా తనతో పాటే తీసుకుపోతున్నట్లు ఆ లేఖలో పేర్కొంది. తన చావుకు కారణమైన వారు జీవితాంతం జైలులోనే ఉండాలని, అప్పుడే తన ఆత్మకు శాంతి కలుగుతుందని ఆమె కోరింది.
పోలీసులు ఘటనా స్థలానికి చేరుకుని ఐశ్వర్య రాసిన లేఖను స్వాధీనం చేసుకున్నారు. మృతదేహాలను పోస్టుమార్టం నిమిత్తం ఆసుపత్రికి తరలించారు. ఆ లేఖ ఆధారంగా కేసు నమోదు చేసుకున్న పోలీసులు, ఆమె భర్త మరియు అత్తింటి వారిపై విచారణ జరుపుతున్నారు. ఒక చిన్న కుటుంబం ఇలా చిన్నాభిన్నం కావడం గొల్లగూడెం గ్రామంలో విషాద ఛాయలు నింపింది.