Teenmar Mallanna: బీసీలకు 42 శాతం రిజర్వేషన్ల అమలు డిమాండ్తో ఇటీవల ఆత్మహత్యాయత్నానికి పాల్పడి చికిత్స పొందుతూ మృతి చెందిన యువకుడు సాయి ఈశ్వర్ చారీ అంత్యక్రియలు నేడు (శనివారం) జరగనున్నాయి. ఈ నేపథ్యంలో, అంత్యక్రియలకు హాజరుకావడానికి సిద్ధమైన ఎమ్మెల్సీ తీన్మార్ మల్లన్నను పోలీసులు హౌస్ అరెస్ట్ చేశారు.
ఎమ్మెల్సీ మల్లన్న హౌస్ అరెస్ట్:
ఫిర్జాదిగూడలోని చెన్నారెడ్డి ఎన్క్లేవ్లో ఉన్న తీన్మార్ మల్లన్న ఇంటి వద్ద పోలీసులు పెద్ద సంఖ్యలో మోహరించారు. సాయి ఈశ్వర్ అంత్యక్రియలకు వెళ్లకుండా పోలీసులు మల్లన్నను అడ్డుకున్నారు. దీనిపై మల్లన్న తీవ్ర ఆగ్రహం వ్యక్తం చేస్తూ, పోలీసుల తీరును ఖండిస్తూ ఒక వీడియోను సోషల్ మీడియాలో పోస్ట్ చేశారు. శాంతియుత అంత్యక్రియలకు వెళ్లే హక్కును కూడా అడ్డుకోవడంపై విమర్శలు వెల్లువెత్తుతున్నాయి.
ఎమ్మెల్సీ తీన్మార్ మల్లన్న హౌస్ అరెస్ట్..
బీసీలకు 42 శాతం రిజర్వేషన్లు కల్పించాలని తీన్మార్ మల్లన్న ఆఫీస్ ముందు ఆత్మహత్య చేసుకున్న సాయి ఈశ్వరాచారి
నేడు ఈశ్వరాచారి అంత్యక్రియల నేపథ్యంలో తీన్మార్ మల్లన్నను హౌస్ అరెస్ట్ చేసిన పోలీసులు
తనను ఎందుకు హౌస్ అరెస్ట్ చేశారంటూ పోలీసులను… pic.twitter.com/d8qL8BcQgW
— ChotaNews App (@ChotaNewsApp) December 6, 2025
బీసీల రిజర్వేషన్ల కోసం సాయి ఈశ్వర్ ఆత్మహత్య:
రెండు రోజుల క్రితం, సాయి ఈశ్వర్ (యువకుడు) బీసీలకు 42% రిజర్వేషన్లు కల్పించాలని కోరుతూ ఎమ్మెల్సీ తీన్మార్ మల్లన్న కార్యాలయం ఎదుట ఆత్మహత్యాయత్నానికి పాల్పడ్డాడు. తనపై పెట్రోల్ పోసుకుని నిప్పంటించుకోగా, స్థానికులు వెంటనే మంటలు ఆర్పి ఆసుపత్రికి తరలించారు. అయితే, శరీరంలోని ప్రధాన భాగాలు కాలిపోవడంతో చికిత్స పొందుతూ సాయి ఈశ్వర్ శుక్రవారం తుది శ్వాస విడిచారు.
ఇది కూడా చదవండి: Harivarasanam Song: హరివరాసనం పాట రచయిత ఎవరు?
గాంధీ ఆసుపత్రి వద్ద ఉద్రిక్తత:
సాయి ఈశ్వర్ మృతితో శుక్రవారం గాంధీ ఆసుపత్రి వద్ద ఉద్రిక్త వాతావరణం నెలకొంది. సాయి ఈశ్వర్కు న్యాయం చేయాలంటూ బీసీ సంఘాలు, కార్యకర్తలు పెద్ద ఎత్తున ఆందోళనకు దిగారు.
ఎమ్మెల్సీ తీన్మార్ మల్లన్న, బీసీ జేఏసీ చైర్మన్ శ్రీనివాస్ గౌడ్తో పాటు బీసీ సంఘాల నేతలు ఆందోళనలో పాల్గొన్నారు. ఈ సందర్భంగా నాయకులు మాట్లాడుతూ, ఇది ముమ్మాటికీ కేంద్ర, రాష్ట్ర ప్రభుత్వాలు చేసిన ‘రాజకీయ హత్య’ అని ఆరోపించారు. రాష్ట్ర ముఖ్యమంత్రి రేవంత్ రెడ్డి, కేంద్ర మంత్రి కిషన్ రెడ్డిలే ఈ హత్యకు బాధ్యత వహించాలని వారు డిమాండ్ చేశారు. రంగంలోకి దిగిన పోలీసులు నిరసనకారులను చెదరగొట్టి, మల్లన్నతో పాటు పలువురు బీసీ సంఘాల నేతలను అరెస్ట్ చేసి, అనంతరం విడిచిపెట్టారు.
అంత్యక్రియలపై ఆందోళన:
నేడు జరగనున్న సాయి ఈశ్వర్ అంత్యక్రియలు ఎలాంటి ఉద్రిక్తతకు దారి తీయకుండా పోలీసులు ముందు జాగ్రత్తగా చర్యలు తీసుకుంటున్నారు. ఎమ్మెల్సీ మల్లన్నను హౌస్ అరెస్ట్ చేయడం, ఇతర బీసీ నాయకుల కదలికలపై నిఘా ఉంచడం గమనించదగ్గ పరిణామం. ప్రభుత్వం ఈ అంశాన్ని ఎలా పరిష్కరిస్తుందనే దానిపై సర్వత్రా ఆసక్తి నెలకొంది.