Missile Attack: ప్రపంచ ఇంధన రవాణాకు అత్యంత కీలకమైన హోర్ముజ్ జలసంధి (Strait of Hormuz) సమీపంలో ఉద్రిక్తతలు మరోసారి పతాక స్థాయికి చేరాయి. ఒమన్ తీరానికి సమీపంలో అంతర్జాతీయ జలాల్లో ప్రయాణిస్తున్న పనామా జెండా కలిగిన వాణిజ్య చమురు ట్యాంకర్ ‘ఎంటీ ఆన్ పీస్’ (MT On Peace) పై గుర్తుతెలియని ప్రాంతం నుంచి ప్రయోగించిన క్షిపణి (projectile/missile) దాడి చేసింది.
ఈ తీవ్ర దాడి ఘటనలో నౌకలో విధులు నిర్వహిస్తున్న 11 మంది భారతీయ నావికులు తీవ్రంగా గాయపడ్డారు. ఈ విషయాన్ని భారత విదేశీ వ్యవహారాల మంత్రిత్వ శాఖ (MEA) మంగళవారం అధికారికంగా ధ్రువీకరించింది.
సహాయక చర్యలు – ఒమన్‌లోని ఖసబ్‌లో వైద్యం:
-
నౌకలో ఎక్కువమంది భారతీయులే..దాడికి గురైన ‘ఎంటీ ఆన్ పీస్’ నౌకలో మొత్తం 19 మంది సిబ్బంది ఉండగా, అందులో 17 మంది భారతీయులే ఉన్నారు.
-
12 మందికి గాయాలు – 11 మంది భారతీయులు..క్షిపణి నౌకను తాకిన వెంటనే భారీ పేలుడు సంభవించి మొత్తం 12 మంది సిబ్బంది గాయపడ్డారు. వీరిలో 11 మంది భారతీయ నావికులు ఉన్నారు.
-
ఒమన్ అధికారుల సాయంతో రక్షణ..దాడి జరిగిన వెంటనే భారత ప్రభుత్వం, ఒమన్ రాయబార కార్యాలయం అప్రమత్తమయ్యాయి. ఒమన్ నావికాదళం, భద్రతా దళాల సహకారంతో గాయపడిన నావికులను సురక్షితంగా నౌక నుంచి కిందికి దించి.. తక్షణ చికిత్స నిమిత్తం ఒమన్‌లోని ఖసబ్ (Khasab) ప్రాంత ఆసుపత్రికి తరలించారు. ప్రస్తుతం వారికి మెరుగైన వైద్యం అందుతోందని విదేశాంగ శాఖ వెల్లడించింది. క్లిష్ట సమయంలో సాయం అందించినందుకు ఒమన్ ప్రభుత్వానికి భారత్ కృతజ్ఞతలు తెలిపింది.
పౌర నౌకలపై దాడులు తక్షణమే ఆగాలి.. భారత్ తీవ్ర ఖండన
ఈ దాడిని భారత ప్రభుత్వం తీవ్రంగా ఖండించింది:
-
వాణిజ్య నౌకలు, అమాయక నావికులు, పౌర మౌలిక సదుపాయాలను లక్ష్యంగా చేసుకుని దాడులు చేయడం ముమ్మాటికీ ఆమోదయోగ్యం కాదని విదేశాంగ శాఖ స్పష్టం చేసింది.
-
ఈ ప్రాంతంలో శాంతిభద్రతలను కాపాడటానికి, అంతర్జాతీయ జలమార్గాల్లో స్వేచ్ఛాయుత వాణిజ్యాన్ని పునరుద్ధరించడానికి ఇలాంటి హింసాత్మక దాడులు తక్షణమే నిలిచిపోవాలని డిమాండ్ చేసింది.
అక్టోబర్ మొదటి వారంలోనే 7 ట్యాంకర్లపై దాడులు – యుద్ధ మేఘాలు..
హోర్ముజ్ జలసంధి పరిసరాల్లో ఇటీవల కాలంలో వాణిజ్య నౌకలపై దాడులు ప్రమాదకర స్థాయిలో పెరిగిపోయాయి. అమెరికా-ఇరాన్ మధ్య శాంతి చర్చలు విఫలం కావడం, సముద్ర మార్గాలపై ఆంక్షల నేపథ్యంలో పరస్పర దాడులు తీవ్రరూపం దాల్చాయి:
-
రాయిటర్స్ నివేదిక ప్రకారం.. కేవలం అక్టోబర్ మొదటి వారంలోనే హోర్ముజ్ ప్రాంతంలో కనీసం 7 ట్యాంకర్లపై దాడులు నమోదయ్యాయి. ఇందులో కువైట్ జెండా కలిగిన ‘ఎంటీ కాజిమా III’, లైబీరియా జెండా కలిగిన ‘లిప్సి’ నౌకలు కూడా ఉన్నాయి.
-
అంతకుముందు జూలైలో యూఏఈకి చెందిన రెండు నౌకలపై జరిగిన దాడిలో రోహన్ కుమార్ అనే భారతీయ నావికుడు మరణించగా, 10 మంది గాయపడ్డారు.
-
సెప్టెంబర్ 23న కూడా ‘ఎంవీ కేప్ దావో’ అనే నౌకపై జరిగిన దాడిలో సూరజ్ యాదవ్ అనే మరో భారత నావికుడు ప్రాణాలు కోల్పోయారు. తాజా ఘటనతో భారతీయ నావికుల భద్రతపై కుటుంబాల్లో తీవ్ర ఆందోళన వ్యక్తమవుతోంది.
ప్రపంచానికి ‘హోర్ముజ్ జలసంధి’ ఎందుకు అత్యంత కీలకం?
పర్షియన్ గల్ఫ్, ఒమన్ గల్ఫ్ మరియు అరేబియా సముద్రాలను కలిపే ఈ సన్నని సముద్ర మార్గం ప్రపంచ ఇంధన రవాణాకు జీవనాడి లాంటిది:
-
ప్రపంచ చమురులో 20 శాతం ఇక్కడి నుంచే:ప్రపంచవ్యాప్తంగా రవాణా అయ్యే ముడి చమురు, ద్రవీకృత సహజ వాయువు (LNG)లో దాదాపు ఐదో వంతు (20%) ఈ జలసంధి గుండానే వెళ్తుంది.
-
పెరగనున్న రవాణా ఖర్చులు, ఇంధన ధరలు:ఇక్కడ జరిగే దాడుల వల్ల చమురు సరఫరాలో తీవ్ర జాప్యం జరగడమే కాకుండా.. నౌకల బీమా ఖర్చులు, కంటైనర్ రవాణా ఛార్జీలు (ఫ్రైట్ ఛార్జీలు) భారీగా పెరిగి ప్రపంచవ్యాప్తంగా పెట్రోల్, డీజిల్, గ్యాస్ ధరలు పెరిగే ప్రమాదం ఉంది.
-
ఈ రిస్క్‌ను ముందే పసిగట్టిన భారత్.. హోర్ముజ్ మార్గంపై ఆధారపడటాన్ని తగ్గించుకునేందుకు ప్రత్యామ్నాయ దేశాల నుంచి ఎల్ఎన్‌జీ కొనుగోళ్లను వేగవంతం చేస్తోంది.