Nara Lokesh: కలియుగ దైవం శ్రీ వేంకటేశ్వరస్వామి సాక్షిగా రాష్ట్రంలో కూటమి ప్రభుత్వం విజయవంతంగా రెండేళ్ల పాలన పూర్తి చేసుకుందని, ఈ ప్రజా ప్రభుత్వ హయాంలోనే ప్రజలకు అసలైన స్వేచ్ఛ లభించిందని ఐటీ, ఎలక్ట్రానిక్స్ మరియు విద్యాశాఖ మంత్రి నారా లోకేశ్ స్పష్టం చేశారు. తిరుపతిలో జరిగిన కూటమి భారీ బహిరంగ సభలో ఆయన ముఖ్య ప్రసంగం చేశారు. గత వైసీపీ ప్రభుత్వ అరాచకాలను, దారుణాలను ఎండగడుతూనే.. సీఎం చంద్రబాబు నాయుడు నాయకత్వంలో రాయలసీమను తాము ఎలా అభివృద్ధి పథంలో నడిపిస్తున్నామో లోకేశ్ పవర్ఫుల్ పంచ్లతో వివరించారు.
1. దేవుడితో పెట్టుకుంటే పరిస్థితి ఏంటో ఇవాళ అనుభవిస్తున్నారు!
శ్రీవారి ఆలయ పవిత్రతను భ్రష్టు పట్టించిన నాటి సీఎం జగన్కు దేవుడే సరైన బుద్ధి చెప్పారని లోకేశ్ ఎద్దేవా చేశారు. శ్రీ వేంకటేశ్వరస్వామి జోలికి వెళ్లొద్దని నాడు ముఖ్యమంత్రిగా ఉన్న జగన్ మోహన్ రెడ్డిని నేను స్వయంగా హెచ్చరించాను. కానీ వినలేదు. దేవుడితో పెట్టుకుంటే పరిస్థితి ఎలా ఉంటుందో ఇవాళ వాళ్లు అనుభవిస్తున్నారు. మా ప్రజా ప్రభుత్వ రెండేళ్ల పాలనలో జేసీబీలు, రాజకీయ దాడులు, హత్యలు, బూతులు అనేవి ఎక్కడా లేవు అన్నారు నారా లోకేశ్.
2. “మనది కియా.. వాళ్లది కిడ్నాప్”: వైఫై వర్సెస్ వైసీపీ
కూటమి ప్రభుత్వ అభివృద్ధి సంస్కృతికి, వైసీపీ ఫ్యాక్షన్ సంస్కృతికి ఉన్న వ్యత్యాసాన్ని మంత్రి లోకేశ్ తనదైన శైలిలో పోల్చి చూపారు:
-
అభివృద్ధి Vs నేరాలు: తెలుగుదేశం, కూటమి ప్రభుత్వం అంటే క్రెడిబిలిటీ (విశ్వసనీయత).. వైసీపీ అంటే క్రిమినాలిటీ (నేరప్రవృత్తి). మనది ఫైటర్ జెట్ లాంటి వేగవంతమైన ప్రగతి.. వాళ్లది ఫ్యాక్షన్ మైండ్సెట్. మనది రాష్ట్రానికి ‘కియా’ లాంటి పరిశ్రమలు తేవడం.. వాళ్లది ‘కిడ్నాప్’లు చేయడం.
-
గత ప్రభుత్వ దారుణాలు: నాడు కనీసం ఒక మాస్క్ అడిగినందుకు దళిత వైద్యుడు డాక్టర్ సుధాకర్ను వేధించి చంపేశారని, సొంత డ్రైవర్ సుబ్రహ్మణ్యాన్ని చంపేసి వైఎస్సార్సీపీ ఎమ్మెల్సీ డోర్ డెలివరీ చేసిన ఘోరాలను రాష్ట్రం ఎప్పటికీ మరువదన్నారు. టీడీపీ జెండా లేకుండా చేస్తామని విర్రవీగిన వైసీపీ నేతల జెండాలను ఇవాళ ప్రజలే పీకేసి, కేవలం 11 సీట్లతో ‘టీమ్ 11’ గా మార్చి తీర్పు ఇచ్చారని గుర్తుచేశారు.
3. “రాయలసీమను.. రాయల్ సీమగా మార్చాం”
రాయలసీమ ప్రాంతంపై నందమూరి, నారా కుటుంబాలకు ఉన్న ప్రేమాభిమానాలను లోకేశ్ గుర్తుచేసుకున్నారు:
-
ఎన్టీఆర్ ప్రేమ: సీమ అంటే దివంగత నేత ఎన్టీఆర్కు ఎంతో ప్రేమని, నాడు ఇక్కడ కరవు వస్తే జోలె పట్టుకుని తిరిగి సీమ ప్రజలను ఆదుకున్నారని చెప్పారు. మహిళల కోసం ప్రత్యేకంగా పద్మావతి మహిళా వర్సిటీని తిరుపతిలో ఏర్పాటు చేసింది ఎన్టీఆరేనని కొనియాడారు.
-
రత్నాల సీమ: ముఖ్యమంత్రి చంద్రబాబు నాయుడు (CBN) హయాంలో పరిశ్రమలు, ప్రాజెక్టులు తీసుకువచ్చి రాయలసీమలో రత్నాలు పండేలా చేశారని, వెనుకబడిన సీమను తాము నిజమైన ‘రాయల్ సీమ’గా మార్చి చూపించామని గర్వంగా ప్రకటించారు.
“రప్పా రప్పా అంటే ఊరుకోం.. రెడ్ బుక్ పని జరుగుతూనే ఉంటుంది!”
విపక్షాల బెదిరింపులకు కూటమి ప్రభుత్వం భయపడే ప్రసక్తే లేదని లోకేశ్ హెచ్చరించారు. “రాష్ట్రంలో ఎన్ని ఆర్థిక ఇబ్బందులు ఉన్నప్పటికీ.. ఎన్నికల్లో ఇచ్చిన ప్రతి హామీని నిలబెట్టుకుంటూ అమలు చేస్తున్నాం. ఇప్పుడు వచ్చి కొందరు రప్పా రప్పా అంటూ గాల్లో మాటలు చెప్తే చూస్తూ ఊరుకునేది లేదు. వైసీపీ అరాచకాలను చూస్తూ కూటమి ప్రభుత్వం మౌనంగా ఉండదు. శాంతిభద్రతలకు విఘాతం కలిగిస్తే.. ‘రెడ్ బుక్’ (Red Book) తన పని తాను చేసుకుంటూ పోతుంది, చట్టం ఎవరినీ వదిలిపెట్టదు” అని మంత్రి నారా లోకేశ్ పరుషమైన పదజాలంతో హెచ్చరించారు.