Lucknow Fire Accident: ఉత్తరప్రదేశ్ రాజధాని లక్నోలో సోమవారం మధ్యాహ్నం అత్యంత దారుణమైన విషాదం చోటుచేసుకుంది. అలీగంజ్ పోలీస్ స్టేషన్ పరిధిలోని పురనియా (ఉషా మెహతా మార్గ్) ప్రాంతంలో ఉన్న ఒక మూడు అంతస్తుల వాణిజ్య భవనంలో సోమవారం మధ్యాహ్నం 3 గంటల ప్రాంతంలో ఒక్కసారిగా భారీ అగ్నిప్రమాదం సంభవించింది. ఈ భవనంలో ఒక కంప్యూటర్/లైబ్రరీ కోచింగ్ సెంటర్ తోపాటు గేమింగ్ జోన్, సాఫ్ట్వేర్ ఆఫీస్ నడుస్తుండటంతో ప్రమాద సమయంలో పదుల సంఖ్యలో విద్యార్థులు, యువకులు లోపల చిక్కుకుపోయారు. ఈ ప్రమాద తీవ్రతకు కనీసం 14 మంది విద్యార్థులు, యువకులు సజీవ దహనమయ్యారు. మరికొందరు తీవ్ర గాయాలతో ఆసుపత్రిలో ప్రాణాలతో కొట్టుమిట్టాడుతున్నారు.
1. మృత్యుకూహరంగా మారిన భవనం – రూఫ్టాప్ లాక్ వల్లే అనర్థం:
ప్రత్యక్ష సాక్షులు ఇంకా దర్యాప్తు అధికారుల కథనం ప్రకారం.. భవనం కింద భాగంలో ఉన్న ఒక పెట్ షాపులో మొదట షార్ట్ సర్క్యూట్ కారణంగా నిప్పురవ్వలు ఎగసిపడ్డాయి. ఆ మంటలు క్షణాల వ్యవధిలోనే పై అంతస్తుల్లో ఉన్న కోచింగ్ సెంటర్, గేమింగ్ జోన్కు వేగంగా వ్యాపించాయి.
భవనం మొత్తం దట్టమైన నల్లటి పొగ కమ్మేయడంతో విద్యార్థులు ప్రాణభయంతో అల్లాడిపోయారు. ప్రాణాలు రక్షించుకోవడానికి బిల్డింగ్ పైకప్పు (Rooftop) పైకి వెళ్దామనుకుంటే.. టెర్రస్ తలుపులు లాక్ చేసి ఉండటంతో విద్యార్థులు లోపలే చిక్కుకుపోయారు.
దట్టమైన పొగతో ఊపిరాడకపోవడం, మంటల వేడి తట్టుకోలేకపోవడంతో 7 నుండి 8 మంది విద్యార్థులు ప్రాణాలు దక్కించుకోవడానికి భవనం పై అంతస్తుల కిటికీల నుండి కిందకు దూకేశారు. ఈ క్రమంలో వారికి తీవ్ర గాయాలయ్యాయి. మరికొందరు బిల్డింగ్ బయట ఉన్న వైర్లను పట్టుకుని కిందకు దిగే ప్రయత్నం చేశారు.
2. రంగంలోకి 14 ఫైర్ టెండర్లు – గోడలు బద్దలు కొట్టి రెస్క్యూ:
ప్రమాదంపై సమాచారం అందిన వెంటనే స్థానిక పోలీసులు, డిజాస్టర్ మేనేజ్మెంట్ టీమ్స్తో పాటు హైడ్రాలిక్ ప్లాట్ఫారమ్ వాహనంతో కూడిన 14 ఫైర్ టెండర్లు ఘటనా స్థలానికి చేరుకున్నాయి.
వార్ రూమ్లా మారిన ఏరియా: భవనం లోపల పొగ ఎక్కువగా ఉండటంతో ఫైర్ సిబ్బంది పక్కనే ఉన్న భవనం ద్వారా వచ్చి, ప్రధాన గోడకు రంధ్రం (హోల్) చేసి లోపలికి ప్రవేశించారు. రూమ్-బై-రూమ్, వాష్రూమ్లను గాలిస్తూ దాదాపు 12 మందికి పైగా విద్యార్థులను సురక్షితంగా రక్షించి బయటకు తెచ్చారు. గాయపడిన వారిని కింగ్ జార్జ్ మెడికల్ యూనివర్సిటీ (KGMU) ట్రామా సెంటర్కు తరలించి అత్యవసర చికిత్స అందిస్తున్నారు.
3. సీఎం యోగి, డిప్యూటీ సీఎం తీవ్ర దిగ్భ్రాంతి:
ఈ ఘోర ప్రమాదంపై ఉత్తరప్రదేశ్ ముఖ్యమంత్రి యోగి ఆదిత్యనాథ్ తీవ్ర దిగ్భ్రాంతి వ్యక్తం చేశారు. క్షతగాత్రులకు మెరుగైన ఉచిత వైద్యం అందించాలని లక్నో జిల్లా యంత్రాంగాన్ని ఆదేశించారు. మరోవైపు యూపీ డిప్యూటీ సీఎం బ్రజేష్ పాఠక్ స్వయంగా ఘటనా స్థలానికి చేరుకుని రెస్క్యూ ఆపరేషన్ను పర్యవేక్షించారు. ఆసుపత్రులను, అంబులెన్స్ సేవలను అప్రమత్తం చేశారు. భవనంలో కనీస అగ్నిమాపక భద్రతా ప్రమాణాలు (Fire Safety Norms) పాటించారా లేదా? కోచింగ్ సెంటర్లకు అనుమతులు ఉన్నాయా? అనే కోణంలో ఉన్నత స్థాయి దర్యాప్తునకు ప్రభుత్వం ఆదేశించింది.