Kurnool: కర్నూలు నగరంలో పాత కక్షలు ఒక మహిళా వైద్యురాలి ప్రాణాల మీదకు తెచ్చిన దారుణ ఘటన కలకలం రేపింది. తాను ప్రేమించిన వ్యక్తి వేరే మహిళను వివాహం చేసుకున్నాడన్న అసూయతో, ఒక మాజీ ప్రియురాలు పథకం ప్రకారం చేసిన ఈ దాడి పోలీసుల విచారణలో వెలుగులోకి వచ్చింది. వివరాల్లోకి వెళితే, కర్నూలుకు చెందిన ఒక ప్రైవేట్ డాక్టర్ గతంలో వసుంధర అనే మహిళతో సన్నిహితంగా ఉండేవారు. అయితే, అనివార్య కారణాల వల్ల వారిద్దరూ విడిపోగా, సదరు డాక్టర్ మరొక మహిళా వైద్యురాలిని పెళ్లి చేసుకున్నారు. తనను కాదని వేరొకరిని పెళ్లి చేసుకున్నారనే ద్వేషంతో రగిలిపోయిన వసుంధర, ఆ దంపతులను ఎలాగైనా విడదీయాలని లేదా వారిని దెబ్బతీయాలని ఒక భయంకరమైన కుట్రకు తెరలేపింది.
ఈ నెల 9వ తేదీన బాధితురాలు (మహిళా డాక్టర్) తన విధులను ముగించుకుని స్కూటీపై ఇంటికి వెళ్తుండగా, కెసి కెనాల్ సమీపంలో వసుంధర పంపిన నిందితులు ఆమెను అనుసరించారు. ఉద్దేశపూర్వకంగానే వారి వాహనంతో బాధితురాలిని ఢీకొట్టి కింద పడేశారు. ప్రమాదం జరిగినట్టుగా భావించిన బాధితురాలికి సాయం చేస్తున్నట్టు నటించిన ఇద్దరు మహిళలు, ఆమెను ఆటోలో ఎక్కించారు. ఆ ఆటోలో అప్పటికే సిద్ధంగా ఉన్న వసుంధర, బాధితురాలికి ప్రాణాంతకమైన వైరస్ (హెచ్ఐవీ వంటివి) ఉన్న ఇంజెక్షన్ను బలవంతంగా ఇచ్చారు. బాధితురాలు వెంటనే అప్రమత్తమై కేకలు వేయడంతో నిందితులు అక్కడి నుండి పరారయ్యారు.
Also Read: Guntur: గుంటూరు జిల్లాలో దారుణం.. ప్రియుడిపై కోపంతో ఇంటికి నిప్పంటించిన ప్రియురాలు
అదృష్టవశాత్తూ బాధితురాలు వెంటనే ఆసుపత్రిలో చేరి చికిత్స తీసుకోవడంతో పెద్ద ప్రమాదం తప్పింది. తన భార్యపై జరిగిన ఈ దాడిపై ఆమె భర్త పోలీసులకు ఫిర్యాదు చేయడంతో రంగంలోకి దిగిన కర్నూలు త్రీటౌన్ పోలీసులు విచారణ వేగవంతం చేశారు. ఘటన జరిగిన ప్రాంతంలోని సీసీ టీవీ ఫుటేజీలను క్షుణ్ణంగా పరిశీలించిన పోలీసులు, టెక్నాలజీ సాయంతో నిందితులను గుర్తించారు. ఈ కిరాతకానికి పాల్పడిన వసుంధరతో పాటు ఆమెకు సహకరించిన జ్యోతి అనే మహిళను, మరో ఇద్దరు వ్యక్తులను పోలీసులు అరెస్ట్ చేశారు. ప్రస్తుతం నిందితులు రిమాండ్లో ఉన్నారని, బాధితురాలికి ఇచ్చిన వైరస్ ఇంజెక్షన్ దేనికి సంబంధించిందనే దానిపై ఫోరెన్సిక్ నివేదిక వచ్చిన తర్వాత మరిన్ని చర్యలు తీసుకుంటామని పోలీసులు వెల్లడించారు.