KCR: కేసీఆర్‌ విజ్ఞప్తిని అంగీకరించిన కాళేశ్వరం కమిషన్… విచారణ ఎప్పుడంటే?

KCR: కాళేశ్వరం ఎత్తిపోతల పథకం నిర్మాణంలో భాగంగా నిర్మించిన అన్నారం, సుందిళ్ల బ్యారేజీలపై జరుగుతున్న విచారణలో కీలక మలుపు వచ్చింది. జస్టిస్ పీసీ ఘోష్ నేతృత్వంలోని కమిషన్ ఇప్పటికే బ్యారేజీల డిజైన్, నిర్మాణ నాణ్యత, ఖర్చులపై విచారణ జరుపుతోంది.

ఈ దర్యాప్తులో పలు శాఖల ఉన్నతాధికారులు, నిర్మాణ కంపెనీల ప్రతినిధులను కమిషన్ ఇప్పటికే విచారించింది. వీరంతా ముఖ్యమంత్రి సమక్షంలోనే నిర్ణయాలు జరిగాయని చెప్పటంతో, మాజీ సీఎం కల్వకుంట్ల చంద్రశేఖర్ రావు (కేసీఆర్) కు కమిషన్ నోటీసులు జారీ చేసింది. ఇక మాజీ మంత్రులు హరీష్ రావు, ఈటల రాజేందర్‌లకు కూడా కమిషన్ నోటీసులు జారీ చేసింది.
కమిషన్ మొదటగా కేసీఆర్‌ను జూన్ 5న, హరీష్ రావును జూన్ 6న, ఈటలను జూన్ 9న హాజరు కావాలని సూచించింది. అయితే, కేసీఆర్ విజ్ఞప్తి మేరకు విచారణ తేదీ జూన్ 11కు మార్చబడింది. దీంతో కేసీఆర్ ఇప్పుడు జూన్ 11న జస్టిస్ పీసీ ఘోష్ కమిషన్ ఎదుట విచారణకు హాజరుకానున్నారు.