KCR: సుమారు ఏడాది కాలం తర్వాత ప్రజాక్షేత్రంలోకి వచ్చిన బీఆర్ఎస్ అధినేత కేసీఆర్, తనదైన శైలిలో కాంగ్రెస్ ప్రభుత్వంపై విరుచుకుపడ్డారు. జగిత్యాల మినీ స్టేడియంలో జరిగిన ‘ప్రజా ఆశీర్వాద సభ’లో ఆయన ప్రసంగిస్తూ.. తన ఆరోగ్యంపై వస్తున్న పుకార్లకు చెక్ పెట్టడమే కాకుండా, రాబోయే రాజకీయ పరిణామాలపై స్పష్టమైన సంకేతాలు ఇచ్చారు.
“నేను చావాలని కోరుకుంటున్నారా?”
సభలో కేసీఆర్ అత్యంత భావోద్వేగంగా మాట్లాడుతూ.. “కొందరు కేసీఆర్ చావాలని శాపనార్థాలు పెడుతున్నారు. కానీ గుర్తుపెట్టుకోండి, మీరు వెయ్యి జన్మలెత్తినా కేసీఆర్ చావడు. పిల్లి శాపాలకు ఉట్లు తెగుతాయా? నా చివరి శ్వాస ఉన్నంత వరకు ఈ తెలంగాణ గడ్డ కోసమే, మీ కోసమే పోరాడుతాను” అని గర్జించారు. తన గొంతులో ప్రాణం ఉన్నంత వరకు తెలంగాణ ప్రయోజనాలను తాకట్టు పెట్టనివ్వనని స్పష్టం చేశారు.
జీవన్ రెడ్డికి కీలక బాధ్యతలు
ఈ సభలోనే సీనియర్ నేత టి. జీవన్ రెడ్డికి గులాబీ కండువా కప్పి పార్టీలోకి ఆహ్వానించారు. “జీవన్ రెడ్డి నా 45 ఏళ్ల మిత్రుడు. కేవలం పదవుల కోసం ఆయన రాలేదు, తెలంగాణ ఆత్మగౌరవం కోసం వచ్చారు. ఆయనను బీఆర్ఎస్ రాష్ట్ర ప్రధాన కార్యదర్శిగా నియమిస్తున్నాను. రేపు మనం అధికారంలోకి రాగానే ఆయనకు రాష్ట్ర స్థాయిలో అత్యున్నత బాధ్యతలు అప్పగిస్తాను. ఇది కేసీఆర్ మాట.. ఇస్తే తప్పను” అని హామీ ఇచ్చారు. జగిత్యాల బాధ్యతను కార్యకర్తలకు అప్పగిస్తూ, రాష్ట్రాన్ని తాను, జీవన్ రెడ్డి చూసుకుంటామని భరోసా ఇచ్చారు.
“రైతుబంధుకు రాంరాం పలికారు”
కాంగ్రెస్ వైఫల్యాలను ఎండగడుతూ కేసీఆర్ నిప్పులు చెరిగారు.
-
రైతుబంధు: “కాంగ్రెస్ వస్తే రైతుబంధుకు రాంరాం చెబుతారని నేను ముందే హెచ్చరించాను. ఇప్పుడు అదే జరుగుతోంది. నిధులు ఇవ్వకుండా రైతులను ఏడిపిస్తున్నారు. ఇవాళ మనం ఇక్కడ సభ పెడుతున్నామని భయపడే రెండో విడత నిధులు విడుదల చేశారు. అంటే మూడో విడత కోసం నేను మళ్లీ సభ పెట్టాలా?” అని ఎద్దేవా చేశారు.
-
వ్యవసాయం: యూరియా కోసం రైతులు మళ్లీ క్యూలైన్లలో నిలబడే ‘కాంగ్రెస్ మార్క్’ పాలన తిరిగి వచ్చిందని విమర్శించారు. మోసపూరిత వాగ్దానాలను నమ్మి ప్రజలు ఇబ్బంది పడుతున్నారని ఆవేదన వ్యక్తం చేశారు.
“హైడ్రాను ఎత్తేస్తాం.. మొదటి సంతకం దానిపైనే”
హైడ్రా (HYDRAA) అంశంపై కేసీఆర్ చేసిన వ్యాఖ్యలు సభలో చర్చనీయాంశమయ్యాయి.
-
సంచలన నిర్ణయం: “పేదల ఇళ్లను కూల్చేందుకే హైడ్రాను తెచ్చారు. బీఆర్ఎస్ అధికారంలోకి రాగానే మొదటి సంతకంతో హైడ్రాను రద్దు చేస్తాం” అని ప్రకటించారు.
-
మూసీ ప్రక్షాళన: మూసీ నది బాగు పేరుతో పదివేల ఇళ్లను కూల్చడం ఏంటని ప్రభుత్వాన్ని ప్రశ్నించారు. పేదల ఉసురు పోసుకుంటున్న ఈ ప్రభుత్వానికి రోజులు దగ్గర పడ్డాయని హెచ్చరించారు.