Kalvakuntla Kavitha: తెలంగాణ జాగృతి అధ్యక్షురాలు కవిత ఆదివారం జరిగిన మీడియా సమావేశంలో కాంగ్రెస్ మరియు బీఆర్ఎస్ పార్టీలపై తీవ్రస్థాయిలో విమర్శలు గుప్పించారు. సింగరేణి టెండర్ల వ్యవహారంలో రెండు పార్టీలు పరోక్షంగా ఒక్కటయ్యాయని, రాష్ట్రంలో ఒక కొత్త తరహా రాజకీయ ట్రెండ్ నడుస్తోందని ఆమె ఆరోపించారు. ముఖ్యంగా నైనీ బొగ్గు బ్లాకు టెండర్లలో భారీ అవకతవకలు జరుగుతున్నాయని ఆమె మండిపడ్డారు.
ఈ టెండర్ల వెనుక ఒక పెద్ద కుట్ర దాగి ఉందని, “మెగా కృష్ణారెడ్డి” అనే కాంట్రాక్టర్కు ప్రయోజనం చేకూర్చేందుకే ఈ ప్రయత్నాలు జరుగుతున్నాయని కవిత ఆరోపించారు. అందరి దృష్టిని సృజన్ రెడ్డి వైపు మళ్లించి, అసలైన “తిమింగళాన్ని” (మెగా కృష్ణారెడ్డిని) కాపాడటానికి కొందరు ప్రయత్నిస్తున్నారని ఆమె విమర్శించారు. బీఆర్ఎస్ నేత కేటీఆర్ను ఉద్దేశించి మాట్లాడుతూ, రాష్ట్రంలో మహిళా అధికారులపై జరుగుతున్న ప్రచారంపై ఆయన ఎందుకు స్పందించడం లేదని ప్రశ్నించారు. బీఆర్ఎస్ పార్టీ ప్రజల పక్షాన ఉండాలి తప్ప, కాంట్రాక్టర్ల పక్షాన కాదని ఆమె హితవు పలికారు.
ఇది కూడా చదవండి: Harish Rao: సింగరేణి స్కాంపై దేశవ్యాప్తంగా చర్చ..
సింగరేణి సంస్థ భవిష్యత్తుపై ఆమె ఆందోళన వ్యక్తం చేశారు. మార్చి నెలలో ఉద్యోగులకు జీతాలు ఇచ్చే పరిస్థితి కూడా సింగరేణిలో లేదని, ఈ పరిస్థితులకు పాలకులు బాధ్యత వహించాలని అన్నారు. సింగరేణిలో ప్రస్తుతం ఉన్న ఎం.డి.ఓ (MDO) విధానాన్ని పూర్తిగా రద్దు చేయాలని డిమాండ్ చేస్తూ ఉపముఖ్యమంత్రి భట్టి విక్రమార్కకు లేఖ రాయనున్నట్లు ఆమె తెలిపారు. నైనీ బొగ్గు బ్లాకును 25 ఏళ్ల పాటు అవినీతిపరులకు కట్టబెట్టే ప్రయత్నాలను తాము అడ్డుకుంటామని స్పష్టం చేశారు.
రాష్ట్రంలో జర్నలిస్టుల అరెస్టులపై కూడా ఆమె స్పందించారు. గతంలో బీఆర్ఎస్ హయాంలో యూట్యూబ్ జర్నలిస్టులను అరెస్టు చేస్తే, ఇప్పుడు కాంగ్రెస్ ప్రభుత్వం శాటిలైట్ ఛానల్ జర్నలిస్టులను కూడా అరెస్టు చేస్తూ పరిధులు దాటుతోందని విమర్శించారు. తెలంగాణ మరియు ఆంధ్రప్రదేశ్ రాష్ట్రాల్లో ఉన్న బొగ్గు నిక్షేపాల పరిరక్షణపై కేంద్ర మంత్రి కిషన్ రెడ్డి ప్రత్యేక దృష్టి సారించాలని ఆమె విజ్ఞప్తి చేశారు.